Te Muamua Samuelu
27 Ne fai aka a Tavita i tena loto eiloa: “I se aso e tasi ka tamate eiloa au ne Saulo. A te ‵toe mea ‵lei e ‵tau o fai ne au ko te tele+ ki te fenua o tino Filisitia; ko fi‵ta ei a Saulo i te ‵salaga ki a au i kogā fenua katoa o Isalaelu,+ ko sao ei au mai ana lima.” 2 Tenā ne ‵tu aka a Tavita mo tāgata e toko 600+ kolā ne ‵kau ki a ia kae olo atu ki a Akisa+ te tama tagata a Maoka, te tupu o Kata. 3 Ne ‵nofo a Tavita mo Akisa i Kata, ko ia mo ana tāgata, ko tāgata taki tokotasi mo olotou kāiga. Ne olo atu a Tavita mo ana avaga e tokolua, ko Ainoama+ te fafine Ieseleelu mo Apikaila+ te fafine Kalamelu, te avaga a Napalu telā ko mate. 4 I te fakailoatuga ki a Saulo i a Tavita ko oti ne tele ki Kata, ne seki toe ‵sala a ia ki ei.+
5 Tenā ne fai atu ei a Tavita ki a Akisa: “Kafai e fiafia koe ki a au, ke tuku mai la ne latou se koga i se fakai foliki e tasi mo oku nofo, ko te mea ke mafai o nofo au i ei. Kaia e ‵tau ei o nofo tau tavini i te fakai o te tupu fakatasi mo koe?” 6 Ne tuku atu ne Akisa a Sikilaka+ ki a ia i te aso tenā. Tenā te pogai ne fai ei a Sikilaka mo fai se fakai o tupu o Iuta ke oko mai ki te aso nei.
7 A te leva o te taimi* ne nofo ei a Tavita i te fakai foliki o tino Filisitia e tasi te tausaga mo te fa masina.+ 8 Ne olo atu a Tavita mo ana tāgata o taua ki tino Kesula,+ tino Kilisi mo tino Amaleka,+ me ne ‵nofo latou i te laukele telā e vau mai i Telama ke oko atu ki Sula,+ ko fanaifo ei ki te fenua o Aikupito. 9 I te taimi ne taua atu ei a Tavita ki te fenua, e seai se tagata io me se fafine ne fakasao ne ia,+ kae ne puke ne ia olotou lafu mamoe, lafu pulumakau, asini, kamela mo gatu, oti aka, foki atu ei a ia ki a Akisa. 10 Kae ne fesili atu a Akisa: “A koe ne taua i fea i te aso nei?” Kae ne tali atu a Tavita: “I te feitu ki saute* o Iuta”+ io me “I te feitu ki saute o tino Ielameele”+ io me “I te feitu ki saute o tino Keni.”+ 11 Ne seki fakasao ne Tavita se tagata io me se fafine o aumai ki Kata, ana muna: “Ko te mea ke se fakailoa ne latou a mea e uiga ki a tatou kae fai atu, ‘Tenei te mea ne fai ne Tavita.’” (Kae tenā loa te faifaiga masani ne fai ne ia i taimi katoa ne nofo ei a ia i te fakai foliki o tino Filisitia.) 12 Tenā ne talitonu ei a Akisa ki a Tavita, kae fai aka: ‘E mautinoa eiloa me i tino Isalaelu e takalia‵lia ki a ia, tela la, ka fai faeloa a ia mo fai taku tavini.’