Te Lua Tupu
10 E toko 70 a tama tāgata a Aapo+ ne ‵nofo eiloa i Samalia. Tenā ne tusi ei ne Ieu a tusi kae avatu ki Samalia, ki pelenise o Ieseleelu, toeaina+ mo fatamā o tama* a Aapo, ana muna: 2 “Kafai e oko atu te tusi tenei ki a koutou, ko fakatasi atu foki ki a koutou a tama tāgata a te otou aliki, e pelā foki mo kaliota tau, solofanua, se fakai e puipui faka‵lei, mo meatau. 3 Ke fili aka a te ‵toe tama ‵lei a te otou aliki telā e fetaui ‵lei* kae fakasagasaga a ia i te nofogaaliki o tena tamana. Tenā ko taua ei koutou mō te kāiga o te otou aliki.”
4 Kae ne ma‵taku a latou kae fai atu: “Kiloke! Kafai ne seki mafai ne tupu e tokolua o ‵tu atu i ana mua,+ e mafai pefea o ‵tu atu matou?” 5 Tenā ne avatu ei ne te ovasia o te palesi,* te kovana o te fakai, toeaina, mo fatamā a te fekau tenei ki a Ieu: “A matou ko au tavini kae ka fai ne matou a mea katoa e fai mai ne koe. Ka se fai ne matou se isi tino mo fai te tupu. Fai so se mea telā e ‵lei i tau kilokiloga.”
6 Tenā ne tusi ei ne ia ki a latou te lua o tusi, ana muna: “Kafai e ‵kau koutou i a au kae loto fia‵fia o faka‵logo mai ki a au, aumai la a ulu o tama tāgata a te otou aliki kae o‵mai koutou ki a au i Ieseleelu i te taimi penei i te aso ma taeao.”
A tama tāgata e toko 70 a te tupu i te taimi nei e ‵nofo mo tāgata lauiloa o te fakai kolā ne tausi atu ki a latou. 7 I te taimi eiloa ne oko atu ei te tusi ki a latou, ne puke ne latou a tama tāgata a te tupu kae tamate latou, e toko 70 tāgata,+ kae tuku ne latou olotou ulu ki loto i kete kae avatu ki a ia i Ieseleelu. 8 Ne ulu atu te avefekau ki loto kae fai atu ki ei: “Ko oti ne aumai ne latou a ulu o tama tāgata a te tupu.” Tenā ne fai atu ei a ia: “Tuku a mea konā i fakaputuga e lua i te mataloa o te fakai ke oko ki te tafataeao.” 9 I tena fanatuga i te tafataeao, ne tu a ia i mua o tino katoa kae fai atu: “A koutou e se ‵se.* Ao, ne fakatogafiti ne au toku aliki, kae ne tamate ne au,+ kae ko oi ne ‵ta ne ia a tino katoa konei? 10 Ke iloa ne koutou me e seai eiloa se pati ne fai ne Ieova e uiga ki te kāiga o Aapo ka se fakataunu,*+ kae ko oti ne fai ne Ieova ana pati ne fai e auala i tena tavini ko Elia.”+ 11 E se gata i ei, ne ‵ta ne Ieu a tino katoa kolā ne ‵toe mai i te kāiga o Aapo i Ieseleelu, e pelā foki mo ana tāgata lauiloa, ana taugasoa, mo ana faitaulaga+ ke oko ki te taimi ko seai ei se tino e ola.+
12 Tenā ne tu aka ei a ia o fano i tena auala ki Samalia. A te fale* e ‵vele ei a fulufulu o mamoe e tu i te auala tenā. 13 I konā ne fetaui ei a Ieu mo taina o te tupu o Iuta ko Aasaia,+ kae ne fai atu a ia ki a latou, “Ko oi koutou?” Ne fai atu latou: “A matou ko taina o Aasaia, kae ko matou nei e olo i te motou auala o fesili aka me e mata, e ‵lei a tama tāgata a te tupu mo tama tāgata a te tupu fafine.” 14 Ne fai fakavave atu a ia: “Puke mai a latou konā!” Tenā ne puke mai ei latou kae tamate i te vaikeli o te fale e ‵vele ei a fulufulu o mamoe, e toko 42 tāgata. E seai eiloa se tino i a latou ne fakasao ne ia.+
15 I tena auala mai konā, ne fetaui a ia mo Ionatapa+ te tama tagata a Lekapa+ telā ne vau o fakafetaui ki a ia. I te taimi ne fakatalofa* atu ei a ia ki tou tagata, ne fai atu a ia ki tou tagata: “E mata, e katoatoa* eiloa tou loto ki a au e pelā eiloa mo toku loto e fakatasi mo tou loto?”
Ne tali atu a Ionatapa: “Ao.”
“Kafai e penā, tuku mai ki a au tou lima.”
Ne tuku atu ne ia tena lima, kae ne ‵futi aka ne Ieu a ia ki luga i te kaliota ki a ia. 16 Ne fai atu a ia: “Vau i a au ke lavea ne koe me e se faka‵sao ne au a tino kolā e ‵teke ki a Ieova.”+ Tenā ne ‵tele tasi ei lāua i luga i tena kaliota tau. 17 Ne oko atu a ia ki Samalia, kae ne ‵ta ne ia a tino katoa kolā ne ‵toe mai i te kāiga o Aapo i Samalia ke oko ki te taimi ko oti ei ne fakaseai katoa ne ia latou,+ e ‵tusa eiloa mo pati a Ieova ne fai ki a Elia.+
18 E se gata i ei, ne fakamaopoopo fakatasi ne Ieu a tino kae fai atu ki a latou: “A Aapo ne tapuaki malie fua ki a Paala,+ kae ko Ieu ka tapuaki malosi atu ki a ia. 19 Tela la, ‵kami mai a pelofeta katoa a Paala,+ ana tino tapuaki katoa, mo ana faitaulaga katoa+ ki a au. Sa fai ke galo se tino e tokotasi i a latou, me ka ofo atu ne au se taulaga lasi ki a Paala. So se tino e galo ka se ola.” Kae ko Ieu ne fai tena togafiti ke ‵ta fakapalele atu a tino tapuaki a Paala.
20 Ne toe fai atu a Ieu: “Fakailoa atu me ka fai se maopoopoga ‵malu mō Paala.” Tenā ne fakailoa atu ei ne latou te mea tenā. 21 Oti aka, ne avatu te fekau a Ieu i loto i Isalaelu, kae ne o‵mai katoa a tino tapuaki a Paala. E seai eiloa se tino i a latou ne seki vau. Ne ulu atu latou ki te fale tapuaki o Paala,+ kae ne ‵fonu eiloa te Fale o Paala mai te mata e tasi ke oko ki te suā mata. 22 Ne fai atu a ia ki te tino e pule i te sefe gatu: “Aumai ki tua a gatu mō tino tapuaki a Paala.” Aumai ei ne ia a gatu mō latou. 23 Tenā ne ulu atu ei a Ieu mo Ionatapa+ te tama tagata a Lekapa ki loto i te fale o Paala. Ne fai atu a ia ki tino tapuaki o Paala: “Onoono faka‵lei ke seai ne tino tapuaki o Ieova i konei, kae ko tino tapuaki fua o Paala.” 24 Fakamuli ifo, ne o‵mai latou ki loto o ofo atu a taulaga mo taulaga ‵sunu. Ne faka‵tu ne Ieu ana tāgata e toko 80 i tua kae fai atu: “Kafai e sao se tino i tāgata konei ko tuku atu ne au ki otou lima, ka sui tena ola ki se ola o koutou.”
25 I te otiga eiloa ne ofo atu ne ia a te taulaga ‵sunu, ne fai atu a Ieu ki leoleo mo ofisa o te kautau: “O‵mai ki loto kae ‵ta katoa a latou! Ke mo a eiloa e tuku ke sao se tino!”+ Tenā ne ‵ta ei ne leoleo mo ofisa o te kautau a latou ki te pelu kae ‵pei ki tua, kae ne ‵ta eiloa ne latou ke oko ki te potu* tafa ki loto o te fale o Paala. 26 Ne puke mai ne latou a pou fatu tapu+ o te fale o Paala kae ‵sunu a pou takitasi konā.+ 27 Ne ofa ne latou ki lalo a pou fatu tapu+ o Paala, kae ofa ne latou ki lalo a te fale o Paala+ kae ‵fuli ke fai pelā me ne falevatie, kae koi ‵tu mai eiloa ke oko ki te aso nei.
28 Tenā ne fakaseai ei ne Ieu a te tapuakiga a Paala i Isalaelu. 29 Kae ko Ieu ne seki ‵fuli kea‵tea mai agasala kolā ne fai ne Ielopoamo te tama tagata a Nepata ke agasala ei a Isalaelu e pelā mo pulumakau aulo kolā ne faka‵tu aka i Peteli mo Tanu.+ 30 Ne fai atu a Ieova ki a Ieu: “Ona ko mea ‵lei ne fai ne koe kae fai foki ne koe a mea kolā e ‵lei i taku kilokiloga mai te faiga o mea katoa i toku loto ke fai ki te kāiga o Aapo,+ e fa kautama o au tama tāgata ka saga‵saga i te nofogaaliki o Isalaelu.”+ 31 Kae ko Ieu ne seki fakaeteete o sasale i Tulafono a Ieova te Atua o Isalaelu mo tena loto kātoa.+ Ne seki fulitua a ia ki agasala ne fai ne Ielopoamo ke agasala ei a Isalaelu.+
32 I aso konā ne kamata o katikati* malie ne Ieova a laukele o Isalaelu. Ne taua atu faeloa a Hasaeli ki a latou i koga katoa o Isalaelu,+ 33 mai te feitu ki saegala o te Iolitana, laukele katoa o Kileata—ko tino Kato, tino Leupena mo tino Manase+—mai Aloela, telā e tu pili ki te Vanu o Alinona ke oko ki Kileata mo Pasana.+
34 Kae ko te tala fakasolopito kātoa o Ieu, ana mea katoa ne fai mo tena malosi katoatoa, e a, e se tusi katoa i te tusi o tala fakasolopito i taimi o tupu o Isalaelu? 35 Tenā ne takato ifo ei a Ieu o malō‵lo fakatasi mo ana tupuga, kae ne tanu ne latou a ia i Samalia; kae ko tena tama tagata ko Ioasasa+ ne fai mo tupu e sui ei a ia. 36 A te leva* o te pulega a Ieu i Isalaelu e ‵tusa mo te 28 tausaga i Samalia.