Te Tusi Muamua ki te Kau Kolinito

12 E uiga ki meaalofa faka-te-agaga,+ e oku taina, e se manako au ke se iloa ne koutou a mea konā. 2 E iloa ne koutou i te taimi koi fai ei koutou mo tino o fenua fakaa‵tea,* ne fakamalosi aka koutou kae takitaki ‵se atu ki tupua konā e seai ne leo,+ kae tau‵tali ki so se koga e ‵taki ne latou koutou ki ei. 3 Tela la, e fakailoa atu ne au ki a koutou me e seai se tino telā e faipati e auala i te agaga o te Atua, e mafai o fai atu: “A Iesu e malaia!” kae e seai se tino e mafai o fai atu: “A Iesu ko te Aliki!” kae na ko latou fua kolā e takitaki ne te agaga tapu.+

4 E isi ne meaalofa kese‵kese, kae e tasi eiloa te agaga;+ 5 e isi ne taviniga kese‵kese+ kae e tokotasi eiloa te Aliki; 6 e isi ne galuega kese‵kese, kae ko te Atua eiloa e tokotasi e fai ne ia a mea katoa konā e auala i tino katoa.+ 7 E lavea atu a te galue o te agaga i loto i tino taki tokotasi, me ne tuku atu ne te Atua ki a latou mō se pogai aoga.+ 8 Me ne tuku atu ki se tino e tokotasi a te poto i te faipati e auala i te agaga, ki te suā tino ko te atamai i te faipati e auala i te agaga eiloa tenā, 9 ki te suā tino ko te fakatuanaki+ e auala i te agaga eiloa tenā, ki te suā tino ko te meaalofa ko te faka‵leiga o masaki+ e auala i te agaga e tasi tenā, 10 ki te suā tino ko te faiga o galuega ‵mana,+ ki te suā tino ko te faiga o valoaga, ki te suā tino ko te malamalama i pati fakaosofia,+ ki te suā tino ko te faipati ki ‵gana kese‵kese,+ kae ki te suā tino ko te ‵fuliga o pati ki nisi ‵gana.+ 11 Kae ko galuega katoa konei e fai ne te agaga eiloa e tasi, kae e tufa atu ki tino taki tokotasi e ‵tusa mo te loto o te Atua.

12 Me e pelā eiloa mo te foitino e tasi kae e uke ana vaega, kae e tiga te uke o ana vaega kae e tasi fua te foitino,+ e penā foki a Keliso. 13 E auala i te agaga e tasi ne papatiso ei tatou katoa ki loto i te foitino e tasi, faitalia me ne tino Iutaia io me ne tino Eleni, faitalia me ne pologa io me ne tino saoloto, a tatou katoa ne faite ke inu ki te agaga e tasi.

14 Me i te foitino ne seki faite ki se vaega e tasi kae ki vaega e uke.+ 15 Kafai e fai mai te vae, “Au e sē se vaega o te foitino i a au e sē se lima,” e se fakauiga i ei i a ia e sē se vaega o te foitino. 16 Kae kafai e fai mai te taliga, “Au e sē se vaega o te foitino i a au e sē se mata,” e se fakauiga i ei i a ia e sē se vaega o te foitino. 17 Kafai a te foitino kātoa se mata, ka lagona la pefea ne ia a mea? Kafai se taliga, ka ‵sogi la pefea ne ia a mea? 18 Kae ko oti ne faite ne te Atua a vaega kese‵kese o te foitino e ‵tusa eiloa mo te mea e manako a ia ki ei.

19 Kafai e ‵pau katoa ana vaega, ka fai la pefea te foitino? 20 Kae nei la, e uke ana vaega kae e tasi fua te foitino. 21 E se mafai o fai atu te mata ki te lima. “Au e se manako ki a koe,” io me ko te ulu e fai atu ki vae, “Au e se manako ki a koulua.” 22 I lō te fai penā, a vaega o te foitino kolā e foliga mai me e vāi‵vai, e isi eiloa ne olotou aoga, 23 kae ko vaega o te foitino kolā e mafau‵fau tatou me e se tāua malosi, e fakatāua malosi eiloa ne tatou,+ kae ko vaega o ‵tou foitino kolā e foliga mai me e se ‵gali e atafai faka‵lei ne tatou 24 tela la, ko se manakogina ke toe fai se mea ki vaega ‵gali o te foitino. E tiga te feitu tenā, ne tuku fakatasi ne te Atua a vaega o te foitino ke faka‵lasi aka ei te tāua o vaega kolā e se tāua malosi, 25 ko te mea ke seai ne mavae‵vaega i te foitino, kae ke fakatau amanaia te suā vaega ki te suā vaega.+ 26 Kafai e logo‵mae se vaega e tasi, e logo‵mae ana vaega katoa;+ io me kafai e vikia se vaega e tasi, e fia‵fia fakatasi katoa a nisi vaega mo ia.+

27 A koutou ko te foitino o Keliso,+ kae ko tino taki tokotasi i a koutou se vaega o tena foitino.+ 28 Kae ko oti ne ‵tofi ne te Atua a tino taki tokotasi i te fakapotopotoga: muamua ko apositolo;+ te lua ko pelofeta;+ te tolu ko faiakoga;+ tafa atu ki ei ko galuega ‵mana;+ tafa atu ki ei ko meaalofa o te faka‵leiga o masaki;+ ko galuega fesoasoani; te poto o fai te takitakiga;+ ko te faipati ki ‵gana kese‵kese.+ 29 E a, a tino katoa ne apositolo? E a, a tino katoa ne pelofeta? E a, a tino katoa ne faiakoga? E a, e fai ne latou katoa a galuega ‵mana? 30 E a, e maua ne tino katoa a te meaalofa ko te faka‵leiga o masaki? E a, e fai‵pati a tino katoa ki ‵gana kese‵kese?+ E a, e fai a tino katoa e pelā me ne tino ‵fuli pati?+ 31 Kae ke kausaki atu faeloa* ki meaalofa kolā e tāua atu.+ Kae ka fakaasi atu ne au ki a koutou a te uiga telā e tafasili i te tāua.+