Te Muamua Tupu

13 E auala i te fakatonuga a Ieova, ne vau se tagata o te Atua+ mai i Iuta ki Peteli kae ko Ielopoamo e tu i tafa o te fatafaitaulaga+ o fai ke fanaka te au mai te taulaga. 2 Tenā ne kalaga atu ei te tagata tenā ki te fatafaitaulaga e auala i te fakatonuga a Ieova, ana muna: “Te fatafaitaulaga, te fatafaitaulaga! Konei a pati a Ieova ne fai mai: ‘Kiloke! E isi se tamaliki tagata e fakaigoa ki a Iosia+ ka fanau mai i te kāiga o Tavita! Ka ofo atu ne ia a faitaulaga o koga ma‵luga i luga i a koe, kolā e fai ne latou ke fanaka te au mai te taulaga i luga i a koe, kae ka ‵sunu ne ia a ivi o tino i luga i a koe.’”+ 3 Ne tuku atu ne ia se fakailoga i te aso tenā, ana muna: “Tenei te fakailoga telā ne fai mai ne Ieova: Kiloke! A te fatafaitaulaga ka mavaelua, kae ko lefu* i luga i ei ka ma‵ligi ki tua.”

4 I te lagonaga eiloa ne Ielopoamo a pati ne fai mai ne te tagata o te Atua tonu ki te fatafaitaulaga i Peteli, ne ‵kapa atu te lima o Ielopoamo mai te fatafaitaulaga kae fai atu: “Puke mai a ia!”+ I konā eiloa ko te mea eiloa ko makeke* tena lima telā ne ‵kapa atu, kae ko se mafai ne ia o fakafoki mai.+ 5 Tenā ne mavaelua ei a te fatafaitaulaga kae ma‵ligi ki tua a lefu mai te fatafaitaulaga e pelā eiloa mo te fakailoga ne fai mai ne te tagata o te Atua tonu e auala i te fakatonuga a Ieova.

6 Ne fai atu te tupu ki te tagata o te Atua tonu: “Fakamolemole, fakatagi aka ke maua te taliaga a Ieova tou Atua, kae ‵talo mō au ke mafai o toe faka‵lei aka toku lima.”+ I konā ne ‵talo ei te tagata o te Atua tonu kae fakatagi atu ke maua te taliaga a Ieova, kae ne toe ‵lei i ei a te lima o te tupu. 7 Tenā ne fai atu ei te tupu ki te tagata o te Atua tonu: “Vau ke olo tāua ki te fale ke kai koe, kae ke tuku atu foki ne au se meaalofa ki a koe.” 8 Kae ne fai atu te tagata o te Atua tonu ki te tupu: “Kafai foki loa e tuku mai ne koe te āfa o tou palesi, e se fanatu eiloa au i a koe o kai ki meakai io me inu ki vai i te koga tenei. 9 Me tenei te fakatonuga ne tuku mai ne Ieova ki a au: ‘E se ‵tau mo koe o kai ki meakai io me inu ki vai, kae e se ‵tau mo koe o toe foki i te auala ne vau ei koe.’” 10 Tenā ne fano ei a ia i te suā auala, kae ne seki foki a ia i te auala ne vau ei a ia ki Peteli.

11 E isi se pelofeta matua e nofo i Peteli, kae ne o‵mai ana tama tāgata ki te fale kae fakamatala atu ne latou ki a ia a mea katoa ne fai ne te tagata o te Atua tonu i te aso tenā i Peteli mo pati ne fai atu ne ia ki te tupu. I te otiga ne fai atu ne latou a te mea tenei ki te lotou tamana, 12 ne fesili atu te lotou tamana ki a latou: “Ko te auala fea ne fano ei a ia?” Tenā ne fakaasi atu ei ne ana tama tāgata a te auala ne fano i ei a te tagata o te Atua tonu mai i Iuta. 13 Ne fai atu a ia ki ana tama tāgata: “Fakatoka a te asini.” Ne fakatoka ne latou te asini mō ia, kae ne sopo a ia ki ei.

14 Ne tautali atu a ia i te tagata o te Atua tonu kae maua atu ne ia e sagasaga mai lalo o se lakau lasi. Tenā ne fai atu ei a ia ki tou tagata: “A koe ko te tagata o te Atua tonu telā ne vau mai i Iuta?”+ Ne tali atu tou tagata: “Ko au eiloa.” 15 Ne fai atu a ia ki ei: “Vau ke olo tāua ki te fale ke kai koe.” 16 Kae ne fai atu tou tagata: “E se mafai ne au o olo mo koe io me talia tau ‵kamiga, io me kai ki meakai io me inu ki vai fakatasi mo koe i te koga tenei. 17 Me ne fai mai te fakatonuga a Ieova ki a au, ‘E se ‵tau mo koe o kai ki meakai io me inu ki vai i konā. E se ‵tau mo koe o toe foki i te auala ne vau ei koe.’” 18 Tenā ne fai atu ei a ia ki tou tagata: “Au foki se pelofeta e pelā mo koe, kae ne fai mai se agelu ki a au e auala i te fakatonuga a Ieova penei, ‘Puke mai tou tagata ke ‵foki tasi mo koe ki tou fale ko te mea ke kai ki meakai kae inu ki vai.’” (Ne fakaloiloi ne ia tou tagata.) 19 Tenā ne ‵foki tasi ei a ia mo tou tagata ko te mea ke kai ki meakai kae inu ki vai i tena fale.

20 I te taimi ne saga‵saga ei lāua i te taipola, ne oko atu te fakatonuga a Ieova ki te pelofeta telā ne fakafoki mai ne ia tou tagata, 21 ne kalaga atu a ia ki te tagata o te Atua tonu mai i Iuta ana muna, “Konei a pati ne fai mai ne Ieova: ‘Ona ko koe ne ‵teke ki te tulafono a Ieova kae seki fakalogo ki te fakatonuga ne tuku atu ne Ieova tou Atua ki a koe, 22 kae ne foki koe o kai ki meakai kae inu ki vai i te koga telā ne fai atu ki a koe penei, “Sa kai ki meakai io me inu ki vai,” a tou foitino mate ka se tuku ki loto i te tanuga o ou tupuga.’”+

23 I te taimi ko oti ei ne kai kae inu te tagata o te Atua tonu, ne fakatoka ne te pelofeta matua a te asini ma te pelofeta telā ne fakafoki mai ne ia. 24 Tenā ne fano ei a ia i tena auala, kae ne fetaui a ia mo se leona i te auala, tamate ei a ia ne te leona.+ Ne ‵pei atu a tena foitino mate ki te auala, kae ne tu a te asini i tafa i ei; a te leona ne tu foki i tafa o te foitino mate tenā. 25 E isi ne tāgata ne o‵mai i konā kae lavea ne latou te foitino mate e ‵pei atu i te auala mo te leona e tu i tafa o te foitino mate. Ne olo atu latou kae fakamatala a te mea tenā i te fakai e nofo i ei a te pelofeta matua.

26 I te logoga a te pelofeta telā ne fakafoki mai ne ia tou tagata mai te auala e uiga ki te mea tenā, ne fai fakavave atu a ia: “Ko te tagata tenā o te Atua tonu telā ne ‵teke ki te tulafono a Ieova;+ tenā ne tuku atu ei ne Ieova a ia ki te leona ke ta kae tamate a ia, e ‵tusa mo te fakatonuga a Ieova ne fai atu ki a ia.”+ 27 Tenā ne fai atu ei a ia ki ana tama tāgata: “Fakatoka te asini.” Tenā ne fakatoka ei ne latou. 28 Tenā ne fanatu ei tou tagata kae maua atu ne ia a te fotino mate e ‵pei i te auala, mo te asini mo te leona e ‵tu i ana tafa. A te leona ne seki kai ne ia te foitino mate, io me ta ne ia te asini. 29 Ne sau aka ne te pelofeta a te foitino mate o te tagata o te Atua tonu kae tuku atu ki luga i te asini, kae aumai ne ia ki tena fakai o tagi fanoanoa kae tanu ne ia. 30 Tenā ne fakatakato ne ia te foitino mate i tena koga e tanu ei a tino ‵mate, kae ne ‵tagi faeloa latou penei ona ko ia: “Ko oko loa i te masei e toku taina!” 31 I te otiga ne tanu ne ia, ne fai atu a ia ki ana tama tāgata: “Kafai au e mate, e ‵tau o tanu ne koutou au i te koga ne tanu i ei a te tagata o te Atua tonu. Tuku oku ivi i tafa o ana ivi.+ 32 A pati ne fai ne ia e auala i te fakatonuga a Ieova ki te fatafaitaulaga i Peteli e pelā foki mo fale tapuaki katoa i koga ma‵luga+ i fakai o Samalia ka taunu eiloa.”+

33 I te otiga ne tupu a te mea tenei, ne seki fulitua eiloa a Ielopoamo ki tena amioga masei, kae ne faka‵sopo aka faeloa ne ia a faitaulaga mō koga ma‵luga mai i tino valevale.+ Ne fakasopo aka ne ia so se tino e manako a ia ki ei ke fai pelā me se faitaulaga, ana muna: “Ke fai a ia mo fai se faitaulaga e tokotasi o koga ma‵luga.”+ 34 A te agasala tenei a te kāiga o Ielopoamo+ ne iku atu i ei ki te lotou fakamaseiga mo te fakaseaiga katoatoa o latou mai te lalolagi.+