Te Tusi i te Lua ki te Kau Kolinito

10 Au ko Paulo, e fakatagi atu ki a koutou i te agamalu mo te atafai o te Keliso,+ me e ui eiloa toku fatauva māfai e fakafesagai tatou mata ki mata,+ kae e se mataku au o fakatonu koutou māfai au e galo.+ 2 E fakatagi atu au, me kafai e nofo atu au i a koutou, kāti e se malosi toku loto o fai a ikuga ‵mafa kolā e fakamoemoe au ke fai ki nisi tino kolā e ‵kilo mai ki a matou i a matou e sa‵sale i manakoga o te foitino. 3 Me e tiga eiloa e sa‵sale matou i te foitino, kae e se taua atu matou e ‵tusa mo manakoga o te foitino. 4 Me i meatau o te motou taua e se ne meatau faka-te-foitino,+ kae ko te ‵mana mai te Atua+ ke ‵fuli ei a mea kolā ko leva ne ‵mau olotou aka. 5 Me ko ‵fuli ne matou ki lalo a manatu ‵se mo mea ma‵luga katoa kolā e ‵teke atu ki te poto o te Atua,+ kae e fakatakavale* ne matou a manatu katoa ko te mea ke faka‵logo ki te Keliso; 6 kae e toka matou o fakasala so se tino telā e se fakalogo,+ i te taimi eiloa telā e faka‵logo katoatoa ei koutou.

7 E ‵kilo atu koutou ki mea e ‵tusa mo olotou foliga i tua. Kafai e talitonu se tino i a ia se tino o Keliso, ke fakaasi mai la ne ia me e tonu a te mea tenā: Kafai a ia se tino o Keliso, e penā foki matou. 8 Me kafai foki e faipati fakamatamata malosi au e uiga ki te malosi pule telā ne tuku mai ne te Aliki ki a matou ke ati aka ei koutou i lō te fakavāivāi atu,+ e se ‵tau o mā au i ei. 9 Me e se manako au ke fakafoliga atu me e taumafai au o fakamatakutaku koutou ki aku tusi. 10 Me e fai mai latou: “E ‵mafa kae ma‵losi a pati i ana tusi, kae i tena fakatasi mai ki a tatou e foliga mai me e vāivāi fua a ia kae e seai se aoga o ana pati.” 11 Ke mafaufau a te tino tenā me i mea kolā e fai atu ne matou i tusi māfai e ‵galo matou, ko mea eiloa kolā ka fai ne matou māfai e fakatasi atu matou ki a koutou.+ 12 Me e se ma‵nako matou ke faka‵pau io me fakatusatusa matou ki nisi tino kolā e taku ‵lei ne latou a latou eiloa.+ Kae kafai e fua aka ne latou a latou eiloa, kae fakatusatusa aka a latou ki a latou eiloa, e seai eiloa se lotou malamalama.+

13 Kae ka se fai‵pati fakamata‵mata matou i tua o tuakoi o koga talai kolā e seki tuku mai ki a matou, kae i loto i te koga talai telā ne ‵tofi aka ne te Atua mō matou, ko te mea ke oko atu eiloa ki a koutou.+ 14 Se mea tonu me e seki tolo tuakoi matou ko te mea ke oko atu matou ki a koutou, me ko matou eiloa a tino muamua ne oko atu ki a koutou mo te tala ‵lei e uiga ki te Keliso.+ 15 Ikai, e se fai‵pati fakamata‵mata matou i tua o tuakoi ne tuku mai ki a matou e uiga ki galuega ne fai ne se isi tino, kae e fakamoe‵moe matou me kafai e gasolo faeloa ki mua te otou fakatuanaki, a mea ne fai ne matou ka gasolo aka o uke i te motou koga talai. Kae ka uke atu a galuega e fai ne matou 16 ko te mea ke folafola atu ne matou te tala ‵lei ki fenua kolā e ‵mao atu i a koutou, ko te mea ke se fai‵pati fakamata‵mata matou i galuega ko oti ne fai i koga talai o nisi tino. 17 “Kae ko te tino telā e faipati fakamatamata, ke na faipati fakamatamata eiloa i a Ieova.”*+ 18 Me e se ko te tino telā e taku ‵lei ne ia a ia eiloa e taliagina,+ kae ko te tino telā e taku ‵lei ne Ieova.*+