Failauga
1 Ko pati a te failauga,*+ te tama tagata a Tavita, te tupu i Ielusalema.+
2 Muna a te failauga, “Te ‵toe mea sē aoga!”
“Te ‵toe mea sē aoga! A mea katoa e seai ne aoga!”+
3 Se a te mea e maua ne se tino mai i ana galuega ‵mafa katoa
Kolā e galue malosi a ia ki ei i lalo o te la?+
4 E fanatu se kautama, kae vau te suā kautama,
Kae ko te lalolagi e tumau eiloa ki te se-gata-mai.+
6 E agi atu a te matagi ki saute kae toe agi fakatamilo mai ki mātū;
E agi fakatamilomilo, kae agi fakapukupuku; e agi fakatamilo faeloa a te matagi.
7 A tamā vaitafe katoa e ‵tafe ki te tai, kae e se mafai eiloa o ‵fonu a te tai.+
A te koga ne ‵tafe mai i ei a tamā vaitafe, e toe ‵foki atu eiloa ki ei ko te mea ke toe ‵tafe mai i ei.+
8 A mea katoa ne mea fakafi‵ta;
E seai se tino e mafai o faipati e uiga ki ei.
A te mata e se lotomalie i te kilo atu ki ei;
Io me ‵fonu te taliga i te fakalogologo atu ki ei.
9 A te mea ko oti ne tupu ko te mea eiloa telā ka tupu,
A te mea telā ko oti ne fai, ka toe fai foki;
E seai se mea fou i lalo o te la.+
10 E a, e isi se mea e mafai o fai mai i ei se tino, “Kiloke ki te mea tenei—se mea fou”?
A te mea tenā se mea ko leva ne isi mai taimi mua;
Ko leva eiloa ne isi mai mua o ‵tou taimi.
11 E seai se tino e masaua ne ia a tino i taimi mua;
Io me ka masaua ne se tino a latou kolā ka o‵mai fakamuli;
Io me ka masaua latou ne tino kolā koi o‵mai fakamuli ifo.+
12 Au, ko te failauga, ne fai mo tupu o Isalaelu i Ielusalema.+ 13 Ne fakatoka ne au toku loto ke sukesuke kae iloilo ne au mo te poto+ a mea katoa kolā ne fai mai lalo o te lagi+—ko galuega fakafi‵ta kolā ne tuku mai ne te Atua ki tama a tāgata ke fakalave‵lave latou i ei.
14 Ne lavea ne au a galuega katoa ne fai mai i lalo o te la,
Kae kiloke! a mea katoa e seai ne aoga, ko te afuliga fua o te matagi.+
15 A te mea pikopiko e se mafai o fai ke ‵tonu,
Kae e se mafai lele eiloa o lau aka a mea kolā e seai.
16 Tenā ne fai aka ei au i toku loto: “Kiloke! Ko oti ne maua ne au a te poto sili, e sili atu i lō so se tino mai mua atu i a au i Ielusalema,+ kae ne maua ne toku loto a te poto mo te iloaga sili.”+ 17 Ne fakagalue aka ne au a toku loto ke iloa ne ia te poto kae ke iloa a te fakavalevale kae ke iloa a te valea,+ kae fai foki te mea tenei e pelā mo te afuliga fua o te matagi.
18 Me ko te lasi o te poto e aumai i ei a fakalavelave e uke,
Tela la, so se tino e momea aka te lasi o tena iloaga e momea aka foki i ei te lasi o te logo‵mae.+