Numela

12 Ne kamata a Miliama mo Alona o faipati ‵teke atu ki a Mose ona ko te fafine Kusi telā ne avaga a ia ki ei.+ 2 Ne fai aka lāua: “E mata, ko Mose fua ne faipati ki ei a Ieova? E a, e seki faipati mai foki a ia e auala i a tāua?”+ Kae ne fakalogologo eiloa a Ieova ki a lāua.+ 3 A te tagata ko Mose ko te ‵toe tagata agamalu* eiloa i tāgata+ katoa i te lalolagi.

4 Ne fai atu a Ieova ki a Mose mo Alona mo Miliama: “Olo ki tua, a koutou tokotolu ki te faleie o maopoopoga.” Tenā ne olo ei a latou tokotolu ki tua. 5 Kae ne fanaifo a Ieova i se pou kaumana+ kae tu i te mataloa o te faleie kae kalaga atu ki a Alona mo Miliama. Ne olo atu lāua ki mua. 6 Ne fai atu a ia: “Ke na faka‵logo mai ki aku pati, fakamolemole. Kafai e isi se pelofeta a Ieova i a koutou, e fakaasi eiloa au ki ei e auala i se fakaasiga,+ kae ka faipati au ki a ia e auala i se moemiti.+ 7 Kae e se penā eiloa a taku tavini ko Mose! Ko oti ne tuku atu ki a ia a mea katoa i toku fale.*+ 8 Au e faipati atu ki a ia mata ki mata, e faipati ‵tonu atu au ki ei,+ kae e se fakaaoga ne au i ei a pati fakauiga; kae e lavea ne ia a foliga o Ieova. Kaia e se ma‵taku ei koulua o faipati ‵teke ki taku tavini ko Mose?”

9 Ne kaitaua malosi a Ieova ki a lāua, fano ei kea‵tea mai i a lāua. 10 Ne gasue te kaumana kea‵tea mai luga i te faleie, kae kiloke! ne poko a Miliama ne te lepela telā ko ‵kena eiloa e pelā me se kiona.+ Tenā ne mafuli atu a Alona ki a Miliama, kae lavea ne ia me ko poko ne te lepela.+ 11 I konā eiloa ne fai atu a Alona ki a Mose: “Toku aliki! Fakamolemole ke se fakasala ne koe māua ona ko te agasala tenei! A te mea ne fai ne māua se mea valea fua. 12 Fakamolemole sa fai ne koe a ia e pelā me se pepe ne fanau mai ko mate kae ko ‵pala te feitu e tasi o tena foitino!” 13 Kae ko Mose ne kamata o tagi atu ki a Ieova, ana muna: “Te Atua, fakamolemole faka‵lei atu a ia! Fakamolemole loa!”+

14 Ne tali atu a Ieova ki a Mose: “Kafai e puaki ne tena tamana ana mata, e a, ka se fai i ei ke masiasi tou fafine i aso e fitu? Tuku atu a ia i tua o te fakai+ i aso e fitu, ka oti ko toe fakafoki mai ei a ia.” 15 Tenā ne tuku ei a Miliama i tua o te fakai i aso e fitu,+ kae ne seki tiaki ne tino a te koga tenā ke oko ki te taimi ne toe aumai ei a Miliama ki loto i te fakai. 16 Tenā ne olo atu ei a tino mai Haselota+ kae kamata o ‵nofo i te koga lavaki o Palana.+