Failauga
6 E isi se suā fakalavelave ne lavea ne au i lalo o te la, kae se mea e masani ki ei a tino: 2 E tuku atu ne te Atua tonu ki se tagata a te maumea mo kope mo te ‵malu, ko te mea ke maua ne ia a mea e manako a ia ki ei; kae ne fai ne te Atua tonu ke seai se fiafia e maua ne ia i mea konā, faitalia me fiafia ki ei a te tino fakaa‵tea. A te mea tenei e seai se aoga kae se puapuaga lasi ‵ki. 3 Kafai e fai se tagata mo fai se tamana fakaselau taimi kae ola i tausaga e uke kae ko matua foki, kae e se fiafia a ia ki mea ‵lei e maua ne ia kae koi tuai o oko atu a ia ki te tanuga, e fai atu au me e ‵lei atu a te tamaliki telā ne fanau mai e mate i lō te tagata tenā.+ 4 Me seai se aoga o tena vauga kae ne fano i te pouliga, kae ko galo atu tena igoa i te pouliga. 5 E tiga eiloa e seki lavea ne ia te la io me iloa ne ia se mea, koi ‵lei atu eiloa a ia i lō te tino muamua.+ 6 Se a te aoga o te ola i te lua afe tausaga kae seai se fiafia? E a, e se olo atu a tino katoa ki te koga e tasi?+
7 A galuega ‵mafa katoa a se tagata e fai ke faka‵fonu ei tena gutu;+ kae e se mafai eiloa o lotomalie a ia. 8 Se a te aoga o te tino poto ki luga i te tino valea,+ io me se a te aoga ki te tagata mativa māfai e iloa ne ia te auala e tumau ei a ia i te ola? 9 E ‵lei atu ke fiafia ki mea e lavea ki mata i lō te kausaki ki manakoga o te loto. A te mea foki tenei e seai se aoga, ko te afuliga fua o te matagi.
10 A te mea ko oti ne oko mai, ko oti ne fakaigoa, kae ko iloa foki a te tulaga o te tagata; kae e se mafai ne ia o kinau atu ki te tino telā e malosi atu i a ia. 11 Ko te uke o pati, ko te lasi foki o te sē aoga; kae se a te aoga o mea konā ki te tagata? 12 Ko oi e iloa ne ia te ‵toe mea ‵lei ke fai ne te tagata i te olaga i nai aso koi ‵toe o tena olaga sē aoga, telā e fakaaoga ne ia e pelā me se ata?+ Me ko oi e mafai o fakailoa atu ne ia ki te tagata a mea ka ‵tupu i lalo o te la māfai ko galo atu a ia?