Te Muamua Samuelu
30 I te taimi ne oko atu ei a Tavita mo ana tāgata ki Sikilaka+ i te tolu o aso, a tino Amaleka+ ko oti ne fakamasei ne latou te feitu ki saute* mo Sikilaka, kae ne taua atu latou ki Sikilaka kae ‵sunu ki te afi. 2 Ne ave fakapagota ne latou a fāfine+ mo tino katoa i ei, mai te ‵toe tamaliki foliki ke oko ki te ‵toe tino matua. Ne seki tamate ne latou se tino, kae ne puke katoa ne latou kae olo i te lotou auala. 3 I te taimi ne oko atu ei a Tavita mo ana tāgata ki te fakai, ne lavea ne latou me ko oti ne ‵sunu a mea katoa i ei, kae ko olotou avaga, mo olotou tama tāgata mo olotou tama fāfine ko oti ne ave fakapagota. 4 Ne kamata a Tavita mo ana tāgata o ‵tagi paka‵laga ke oko ki te taimi ko seai ei se lotou malosi o ‵tagi. 5 A avaga e tokolua a Tavita ne ave fakapagota foki, ko Ainoama mai Ieseleelu mo Apikaila te avaga a Napalu te tino Kalamelu, telā ko mate.+ 6 Ne mafatia malosi a Tavita me i ana tāgata ko fai‵pati ke peipei a ia ki fatu, ona ko te kaitāua o latou i te ‵galo atu o olotou tama tāgata mo tama fāfine. Kae ne fakamalosi aka ne Tavita a ia eiloa e auala i a Ieova tena Atua.+
7 Muna a Tavita ki a Aviata+ te faitaulaga, te tama tagata a Aimeleka: “Fakamolemole, aumai te efota ki konei.”+ Tenā ne avatu ei ne Aviata te efota ki a Tavita. 8 Ne fesili atu a Tavita ki a Ieova:+ “E mata, e ‵tau o afuli ne au te potukau tenei o tino kai‵soa? E mata, ka maua ne au latou?” Tenā ne fai atu ei a Ia ki ei: “Fano o afuli latou, me ka maua eiloa ne koe latou, ko faka‵sao ei ne koe a mea katoa mo ou tino.”+
9 Ne olo fakavave atu a Tavita mo ana tāgata e toko 600,+ kae ne olo atu latou ke oko eiloa ki te Vanu o Pesola, kae ko nisi tāgata ne ‵nofo i konā. 10 Ne tumau eiloa a Tavita mo ana tāgata e toko 400 i te afuliga o latou, kae ko tāgata e toko 200 kolā ko tō fi‵ta ma olo atu ki te suā feitu o te Vanu o Pesola ne ‵nofo i konā.+
11 Ne maua ne latou se tagata Aikupito i te vao kae avatu ne latou ki a Tavita. Ne tuku atu ne latou ki a ia ne meakai mo ana kai mo vai mo ana inu, 12 e pelā foki mo se potu keke o mati ma‵lo mo keke e lua o vine ma‵lo. I tena otiga ne kai, ne toe maua tena malosi, me i a ia e seki kai eiloa ki meakai io me inu ki vai i ao e tolu mo po e tolu. 13 Ne fesili atu a Tavita ki ei: “Ko oi tou matai, kae ko koe ne vau mai fea?” Kae ne fai atu a ia: “Au se tavini Aikupito, se pologa a te tagata Amaleka, kae ne tiaki au ne toku matai i a au ne masaki i aso e tolu ko ‵teka. 14 Ne fakamasei ne matou a te feitu ki saute* o te fenua o tino Keleti+ mo kogā fenua o Iuta i te feitu ki saute o Kalepo,+ kae ne ‵sunu ne matou a Sikilaka ki te afi.” 15 Tenā ne fai atu ei a Tavita: “E mafai ne koe o ‵taki au ki te potukau tenei o tino kai‵soa?” Ne tali atu a ia: “Kafai e tauto mai koe ki a au i te igoa o te Atua me ka se tamate ne koe au kae ka se tuku atu foki ne koe au ki lima o toku matai, ka ‵taki eiloa ne au koe ki te potukau tenei o tino kai‵soa.”
16 Ne ‵taki ne ia a Tavita ki te koga telā ne ‵nofo i ei a latou i te fenua kātoa tenā, e ‵kai kae inu kae fai olotou fakafiafiaga ona ko olotou mea katoa ne puke mai i fenua o tino Filisitia mo te fenua o Iuta. 17 Tenā ne ‵ta ei latou ne Tavita mai te tafataeao ‵malu ke oko ki te fakaafiafi; e seai eiloa se tagata ne sao+ kae na ko tāgata e toko 400 kolā ne ‵tele i kamela. 18 Ne maua ne Tavita a mea katoa kolā ne puke ne tino Amaleka,+ kae faka‵sao foki ne Tavita ana avaga e tokolua. 19 E seai eiloa se lotou mea ne galo, mai te ‵toe tamaliki foliki ke oko ki te ‵toe tino matua. Ne toe maua ne latou olotou tama tāgata mo tama fāfine mo mea katoa kolā ne puke i te taua;+ ne toe maua ne Tavita a mea katoa kolā ne puke ne latou. 20 Tenā ne puke ei ne Tavita a lafu mamoe mo lafu pulumakau katoa, kae takitaki atu ne latou mai mua o olotou lafu manu. Olotou muna: “A mea konei ne maua i te taua i a Tavita.”
21 Ne oko atu a Tavita ki tāgata e toko 200 kolā ne fi‵ta ma olo fakatasi mo Tavita kae kolā ne ‵nofo i te Vanu o Pesola,+ kae ne o‵mai latou o fakafetaui ki a Tavita mo tino kolā ne olo mo ia. I te piliatuga a Tavita ki tāgata konā, ne fesili atu a ia me e a mai latou. 22 Kae ko tāgata ma‵sei kae e se aoga katoa i a latou kolā ne olo mo Tavita ne fai aka: “Ona ko te mea ne seki o‵mai latou i a tatou, ka seai ne vaega o te taua ka tuku atu ne tatou ki a latou kae tuku atu fua olotou avaga mo olotou tama tāgata ko tuku atu ei ke olo.” 23 Kae ne fai atu a Tavita: “Oku taina, e se ‵tau o fai ne koutou te mea tenei ki mea ne tuku mai ne Ieova ki a tatou. Ne puipui ne ia tatou kae tuku mai ki ‵tou lima a te potukau o tino kai‵soa kolā ne o‵mai o taua mai ki a tatou.+ 24 Ko oi e lotomalie ki te mea a koutou tenei? E ‵tau o ‵pau a te tusaga e maua ne te tino telā ne fano ki te taua mo te tusaga o te tino telā ne sagasaga i tafa o kope.+ E ‵pau eiloa a tusaga e maua ne tino katoa.”+ 25 Mai te aso tenā o fano ki mua, ne fai eiloa ne ia te mea tenā e pelā me se tulafono mo se mea masani i Isalaelu ke oko mai eiloa ki te aso nei.
26 I te fokiatuga a Tavita ki Sikilaka, ne ave ne ia a nisi mea ne maua mai te taua ki toeaina o Iuta kolā e taugasoa mo ia, kae fai atu: “Tenei te meaalofa* ki a koutou ne maua mai i te taua mo fili o Ieova.” 27 Ne avatu ne ia ki tino i Peteli,+ ki tino i Lamota i te Nekepi, ki tino i Iatila,+ 28 ki tino i Aloela, ki tino i Sifimota, ki tino i Esetemoa,+ 29 ki tino i Lakala, ki tino i fakai o tino Ielameele,+ ki tino i fakai o tino Keni,+ 30 ki tino i Holema,+ ki tino i Polasana, ki tino i Ataka, 31 ki tino i Hepelona,+ mo koga katoa kolā ne masani o olo ki ei a Tavita mo ana tāgata.