Levitiko

11 Muna a Ieova ki a Mose mo Alona: 2 “Fai atu ki tino Isalaelu, ‘Konei a manu ola o te laukele e mafai o ‵kai koutou ki ei:+ 3 So se manu telā e va tena alofivae kae maisi i loto i ei, kae kai fakalua tena mama e mafai o ‵kai ki ei.

4 “‘Kae e se ‵tau mo koutou o ‵kai ki manu konei, ko manu kolā e ‵kai fakalua olotou mama io me va olotou alofivae: te kamela, e kai fakalua tena mama kae e se va tena alofivae. A te manu tenā e se ‵ma mō koutou.+ 5 E pelā foki mo te lokipatia,+ me e kai fakalua tena mama kae e se va tena alofivae. A te manu tenā e se ‵ma mō koutou. 6 E pelā foki mo te lapiti, me e kai fakalua tena mama kae e se va tena alofivae. A te manu tenā e se ‵ma mō koutou. 7 E pelā foki mo te puaka,+ me e va tena alofivae kae maisi i loto i ei, kae e se kai fakalua tena mama. A te manu tenā e se ‵ma mō koutou. 8 E se ‵tau mo koutou o ‵kai ki ‵kano o manu konā, io me pa‵tele ki olotou foitino ‵mate. A manu konā e se ‵ma mō koutou.+

9 “‘Konei a mea o te tai e mafai o ‵kai koutou ki ei: So se mea o te tai telā e isi ne ana tala mo unafi, faitalia me se mea i te tai io me i vaitafe, a te mea tenā e mafai o ‵kai+ koutou ki ei. 10 Kae ko so se mea i te tai mo vaitafe telā e seai ne ana tala mo unafi, mai mea ola katoa kolā e oloolo fakatasi mo so se mea ola i loto i te tai, a te mea tenā se mea fakatakalialia ki a koutou. 11 E tonu, e ‵tau o fai pelā me ne mea fakatakalia‵lia ki a koutou, kae e se ‵tau mo koutou o ‵kai ki olotou ‵kano+ kae e ‵tau mo koutou o takalia‵lia ki olotou foitino ‵mate. 12 A mea katoa o te tai kolā e seai ne olotou tala mo unafi ne mea fakatakalia‵lia ki a koutou.

13 “‘Konei a manu eva e ‵tau o takalia‵lia koutou ki ei; e se ‵tau o ‵kai ki ei me ne mea fakatakalia‵lia: te aeto,+ te pusate, te valatua uli,+ 14 te kite kula mo so se vaegā kite uli, 15 so se vaegā leveni, 16 te osetelite, te lulu, te kanapu, so se vaegā falakone, 17 te lulu foliki, te komolane, te lulu taliga ‵loa, 18 te suani, te pelikane, te valatua, 19 te sikala, so se vaegā matuku, te hupose mo te pate. 20 Ko manu fai kapakau katoa kolā e oloolo fakatasi* kae sa‵sale ki olotou vae e fa, e fai pelā me ne mea fakatakalia‵lia ki a koutou.

21 “‘Mai i manu fai kapakau kolā e oloolo fakatasi kae sa‵sale ki olotou vae e fa, e mafai fua o ‵kai koutou ki manu kolā e isi ne olotou vae mō evaeva i luga i te laukele. 22 E mafai o ‵kai koutou ki mea konei: so se vaegā seakelise telā ko matua kae mafai o eva, nisi seakelise+ kolā e ‵lei i te kai, kilikiti mo sikusikulauniu. 23 A nisi manu fai kapakau katoa kolā e oloolo fakatasi kae taki fa olotou vae ne mea fakatakalia‵lia ki a koutou. 24 E mafai o fai ne mea konei ke se ‵ma koutou. So se tino e patele ki olotou foitino ‵mate ka se ‵ma eiloa ke oko ki te afiafi.+ 25 So se tino e sau ne ia so se vaegā manu mate penā e ‵tau o ‵ta ana gatu;+ ka se ‵ma eiloa a ia ke oko ki te afiafi.

26 “‘So se manu telā e va tena alofivae, kae e se maisi kae e se kai fakalua tena mama e se ‵ma mō koutou. So se tino e patele ki ei ka se ‵ma eiloa a ia.+ 27 A manu ola katoa kolā e sa‵sale ki olotou alofivae mai manu kolā e sa‵sale ki olotou vae e fa, e se ‵ma mō koutou. A tino katoa e pa‵tele ki olotou foitino ‵mate ka se ‵ma eiloa ke oko ki te afiafi. 28 A te tino telā e sau ne ia olotou foitino ‵mate e ‵tau o ‵ta ana gatu,+ kae ka se ‵ma eiloa a ia ke oko ki te afiafi.+ A manu konā e se ‵ma mō koutou.

29 “‘Konei a mea ola o te laukele kolā e oloolo fakatasi kae e se ‵ma mō koutou: te mole, te kimoa,+ mo so se vaegā pili, 30 te moko, te pili lasi, te pili leta, te pili hometa mo te pili telā e fulifuli tena lanu. 31 A mea ola kolā e oloolo fakatasi e se ‵ma mō koutou.+ A tino katoa e pa‵tele ki olotou foitino ‵mate ka se ‵ma eiloa ke oko ki te afiafi.+

32 “‘So se mea e ‵to ki ei a manu konā māfai ko ‵mate ka se ‵ma eiloa, faitalia me se meāfale e faite ki lakau, se gatu, se pa‵kili manu, io me se gatu lautaga. So se meāfale telā e fakaaoga sāle e ‵tau o ufi ki loto i vai, kae ka se ‵ma eiloa ke oko ki te afiafi; ko ‵ma ei. 33 Kafai e ‵to a manu konā ki loto i se ulo kele, e ‵tau o ‵pei ne koutou ke malipilipi, kae ko mea katoa i loto i ei ka se ‵ma.+ 34 So se vaegā meakai telā e patele ki vai i loto i te ulo tenā ka se ‵ma, kae ko vai inu i loto i te ulo tenā ka se ‵ma foki. 35 So se mea e ‵to ki ei olotou foitino ‵mate ka se ‵ma. Faitalia me se ogaumu io me se tamā ogaumu, e ‵tau eiloa o ofa likiliki. A mea konā e se ‵ma kae ka tumau eiloa te lotou sē ‵ma mō koutou. 36 Ko te vaipuna fua mo te vaisameni kolā e tuku i ei a vai ka tumau i te ‵ma, kae ko so se tino e patele ki olotou foitino ‵mate ka se ‵ma eiloa. 37 Kafai e ‵to atu olotou foitino ki luga i se fuaga o te lakau telā ka fai o ‵toki, e ‵ma eiloa te mea tenā. 38 Kae kafai e isi ne vai i luga i se fuaga, kae tō atu se vaega o olotou foitino ‵mate ki luga i ei, ka se ‵ma eiloa a te fuaga tenā ki a koutou.

39 “‘Kafai e mate se manu telā e ‵kai sāle koutou ki ei, so se tino e patele ki tena foitino mate ka se ‵ma eiloa ke oko ki te afiafi.+ 40 So se tino e kai ki se vaega o tena foitino mate e ‵tau o ‵ta ana gatu, kae ka se ‵ma a ia ke oko ki te afiafi.+ So se tino e sau kea‵tea ne ia te foitino mate tenā e ‵tau o ‵ta ana gatu, kae ka se ‵ma a ia ke oko ki te afiafi. 41 A manu katoa kolā e oloolo fakatasi sāle i te laukele ne mea fakatakalia‵lia.+ E se ‵tau o ‵kai ki ei. 42 E se ‵tau mo koutou o ‵kai ki so se mea ola telā e ‵tolo ki tena tinae, so se mea ola telā e sasale ki ana vae e fa, io me ko mea ola katoa o te laukele kolā e oloolo fakatasi sāle kae uke olotou vae, me i mea konā ne mea fakatakalia‵lia.+ 43 Ke mo a ma fai koutou mo fai ne mea fakatakalia‵lia e auala i mea ola kolā e oloolo fakatasi sāle, kae sa fakalai‵lai io me fai ne koutou a koutou eiloa ke se ‵ma ona ko mea konei.+ 44 Me i a au ko Ieova te otou Atua,+ kae e ‵tau mo koutou o fakatapu a koutou eiloa ko te mea ke tapu+ koutou, me i a au e tapu.+ Tela la, e se ‵tau mo koutou o fai ke se ‵ma koutou e auala i mea ola kolā e oloolo fakatasi sāle i luga i te laukele. 45 Me i a au ko Ieova telā ne ‵taki ne ia koutou kea‵tea mai te fenua o Aikupito ko te mea ke fakatalitonu atu ki a koutou me i a au ko te Atua o koutou,+ kae e ‵tau mo koutou o tapu,+ me i a au e tapu.+

46 “‘Tenei te tulafono e uiga ki manu vae fa, manu eva, mea ola katoa kolā e olo sāle i te tai, mo mea ola katoa kolā e oloolo fakatasi sāle i luga i te laukele, 47 ko te mea ke iloa ne koutou a te ‵kese o te mea sē ‵ma mai i te mea ‵ma, mo manu ola kolā e ‵tau o ‵kai ki ei mo manu kolā e se ‵tau o ‵kai ki ei.’”+