Levitiko

19 Ne toe faipati atu a Ieova ki a Mose, ana muna: 2 “Faipati atu ki te fakapotopotoga kātoa o tino Isalaelu kae fai atu ki a latou, ‘E ‵tau mo koutou o tapu, me i a au, Ieova te otou Atua, e tapu.+

3 “‘E ‵tau mo koutou taki tokotasi o āva* ki otou mātua mo otou tamana,+ kae e ‵tau o tausi ne koutou aku sapati.+ Au ko Ieova te otou Atua. 4 Ke mo a ma ‵fuli atu koutou ki atua sē aoga+ io me faite ne atua ki fiti+ mō koutou. Au ko Ieova te otou Atua.

5 “‘Nei la, kafai e ofo atu ne koutou se taulaga ‵kai fakatasi ki a Ieova,+ e ‵tau o ofo atu ne koutou i se auala telā ka maua ei ne koutou te taliaga a te Atua.+ 6 E ‵tau o kai ne koutou i te aso e ofo atu ei te otou taulaga mo te suā aso, kae ko mea kolā e ‵toe mai i ei i te tolu o aso e ‵tau o ‵sunu ki te afi.+ 7 Kae kafai e isi ne mea i ei e kai i te tolu o aso, a te mea tenā se mea matagā kae ka se mafai o talia. 8 A te tino telā e kai ki ei e ‵tau o fakasala ona ko tena mea ‵se, me ko oti ne fakalailai ne ia se mea tapu a Ieova, kae e ‵tau o tapale kea‵tea* a te tino tenā mai i ana tino.

9 “‘Kafai e tau ne koutou a fuataga o otou laukele, ke mo a ma tau ne koutou ke palele a feitu ki tua o otou fatoaga, kae ke mo a ma taetae ne koutou a fuataga kolā ne tatela‵tela ki lalo.+ 10 Ke mo a foki ma taetae ne koutou a mea kolā ne ‵toe mai i otou togavine io me taetae a vine kolā ne tatela‵tela valevale i otou togavine. E ‵tau o tuku ne koutou a mea konā ma tino ma‵tiva*+ mo tino fakaa‵tea. Au ko Ieova te otou Atua.

11 “‘E se ‵tau mo koutou o kaisoa,+ e se ‵tau mo koutou o fakaloiloi tino,+ kae e se ‵tau o fakatogafiti ne koutou a koutou eiloa. 12 E se ‵tau mo koutou o tauto fakaloiloi i toku igoa+ kae fakalailai ne koutou te igoa o te otou Atua. Au ko Ieova. 13 E se ‵tau mo koe o fakatogafiti tou tuakoi,+ kae e se ‵tau mo koe o kaisoa.+ E se ‵tau mo koe o taofi a te peofuga o se tino galue i te po kātoa ke oko ki te tafataeao.+

14 “‘E se ‵tau mo koe o pati masei se tino taliga ‵tuli io me tuku atu se mea ki mua o se tino ‵kivi+ ke fakalavelave atu ki a ia, kae e ‵tau mo koe o mataku ki tou Atua.+ Au ko Ieova.

15 “‘E se ‵tau mo koe o fai ne fakamasinoga sē ‵tonu. E se ‵tau mo koe o fakaasi atu te fakailoga tino ki tino ma‵tiva io me fakaasi atu te fapito ki tino mau‵mea.+ E ‵tau mo koe o fakamasino a tou tuakoi mo te fakamaoni.

16 “‘E se ‵tau mo koe o fatufatu valevale a nisi tino ki ou tino.+ E se ‵tau mo koe o salasala ki auala ke fakaseai ei* te ola* o tou tuakoi.*+ Au ko Ieova.

17 “‘E se ‵tau mo koe o takalialia ki tou taina i tou loto.+ E ‵tau mo koe o polopoloki tou tuakoi+ ko te mea ke se kau atu koe ki tena agasala.

18 “‘E se ‵tau mo koe o taui ma sui+ io me ita fakamoemoe ki se tino o tou fenua, kae e ‵tau mo koe o alofa ki tou tuakoi e pelā mo tou alofa ki a koe eiloa.+ Au ko Ieova.

19 “‘E ‵tau mo koutou o tausi aku tulafono fakavae: E se ‵tau mo koe o fakaavaga ne manu mai i itukaiga kese‵kese e lua. E se ‵tau mo koe o ‵toki tau fatoaga ki fuaga kese‵kese e lua,+ kae e se ‵tau mo koe o pei ki se gatu telā ne faite ki filo kese‵kese e lua.+

20 “‘Kafai e ‵moe fakatauavaga se tagata mo se fafine, kae ko tou fafine se tavini telā ko oti ne filifili aka mo fai te avaga a te suā tagata, kae e seki kātoa tena ‵togi io me seki fakasaoloto tou fafine, e ‵tau eiloa o fai se fakasalaga. Kae e se ‵tau mo latou o tamate a lāua, me e seki fakasaoloto a tou fafine. 21 E ‵tau o aumai ne te tagata tenā a tena taulaga mō mea ‵se ki a Ieova i te mataloa o te faleie o maopoopoga, se mamoe mo fai te taulaga mō mea ‵se.+ 22 Ka fai ne te faitaulaga a te faka‵māga o tou tagata ki te mamoe o te taulaga mō mea ‵se i mua o Ieova ona ko te agasala telā ne fai ne ia, kae ka fakamagalo a ia mai te agasala telā ne fai ne ia.

23 “‘Kafai e o‵mai koutou ki loto i te fenua kae ‵toki ne koutou so se lakau kaina, e ‵tau o fai ne koutou ana fuataga e pelā me e se ‵ma kae e tapu.* E tolu tausaga e tapu* ei a fuataga konā. E se ‵tau o ‵kai ki ei. 24 Kae i te fa o tausaga ka fakatapu i ei ana fuataga katoa e pelā me se mea fakafiafia i mua o Ieova.+ 25 Kae i te lima o tausaga ko mafai ei o ‵kai koutou ki ana fuataga ke fakaopoopo atu ki fuataga o tau fatoaga. Au ko Ieova te otou Atua.

26 “‘E se ‵tau mo koutou o ‵kai ki mea e isi ne toto i ei.+

“‘E se ‵tau mo koutou o ‵sala ki mea ka ‵tupu i aso mai mua io me fai a faifaiga faivailakau.+

27 “‘E se ‵tau mo koutou o ‵vele* a laulu i tafatafa o otou ulu* io me ‵kati valevale otou talafa.+

28 “‘E se ‵tau mo koutou o katikati otou foitino mō se tino mate,+ kae e se ‵tau mo koutou o fai ne ta‵tau i otou foitino. Au ko Ieova.

29 “‘Ke mo a ma fakamasiasi ne koe tau tama fafine mai te fai e pelā me se fafine talitāgata,+ ko te mea ke seai ne faifaiga talitāgata i luga i te fenua kae fai ei ke ‵fonu i amioga fai valevale.+

30 “‘E ‵tau mo koutou o tausi aku sapati+ kae fakaasi atu te āva* ki toku koga tapuaki. Au ko Ieova.

31 “‘Sa ‵fuli atu ki tino kolā e fesokotaki mo agaga,+ kae sa olo ki tino fakamatala mea ‵tupu i aso mai mua,+ i a koutou ma sē ‵ma i a latou. Au ko Ieova te otou Atua.

32 “‘E ‵tau mo koe o tu ki luga i mua o tino ulu sinā,+ kae e ‵tau mo koe o fakaasi atu te āva ki se toeaina,+ kae e ‵tau mo koe o mataku ki tou Atua.+ Au ko Ieova.

33 “‘Kafai e ‵nofo fakatasi koutou mo se tino fakaa‵tea i te otou fenua, e se ‵tau mo koutou o fai fakamasei a ia.+ 34 A te tino fakaa‵tea telā e ‵nofo fakatasi mo koutou e ‵tau o fai ne koutou e pelā me se tino tonu o te fenua;+ kae e ‵tau mo koe o alofa ki a ia e pelā mo tou alofa ki a koe eiloa, me i a koutou ne ‵nofo e pelā me ne tino fakaa‵tea i te fenua o Aikupito.+ Au ko Ieova te otou Atua.

35 “‘E se ‵tau o fakaaoga ne koutou a fua sē ‵tonu mo fua te ‵loa, te ‵mafa, io me ko mea vai‵vai.+ 36 E ‵tau o fakaaoga ne koutou a fua mea ‵mafa ‵tonu, fatu ‵mafa tonu, se fua o mea mā‵lo tonu* mo se fua tonu o mea vai‵vai.*+ Au ko Ieova te otou Atua telā ne aumai ne ia koutou kea‵tea mai te fenua ko Aikupito. 37 Tela la, e ‵tau mo koutou o tausi aku tulafono fakavae katoa mo ikuga o aku fakamasinoga katoa, kae e ‵tau mo koutou o tau‵tali i ei.+ Au ko Ieova.’”