Esoto
31 Ne toe faipati atu a Ieova ki a Mose, ana muna: 2 “Kiloke, ko oti ne filifili* ne au a Pesaleli+ te tama tagata a Uli, te tama tagata a Hulo mai te matakāiga o Iuta.+ 3 Ka faka‵fonu ne au a ia ki te agaga o te Atua, kae tuku atu ki a ia te poto, te malamalama mo te iloa i te faitega o mea kese‵kese, 4 te ‵lomiga o ata, te faitega o mea ki aulo, siliva mo kopa, 5 te ‵katiga mo te fakatokaga o fatu tāua,+ mo te faitega o so se mea ki lakau.+ 6 E se gata i ei, ko oti ne fakasopo ne au a Oliapo+ te tama tagata a Aisamako mai te matakāiga o Tanu ke fesoasoani atu ki a ia, kae ka tuku atu ne au a te poto ki loto o tino kolā e apo,* ko te mea ke faite ne latou a mea katoa kolā e fakatonu atu ne au ki a koe:+ 7 ko te faleie o maopoopoga,+ te pusa o te Feagaiga+ mo te ‵pono+ i luga i ei, ko meāfale katoa o te faleie, 8 te taipola+ mo ana meāfale katoa, te tugamoli telā ne faite ki te tinā aulo mo ana meāfale katoa,+ te fatafaitaulaga o mea ma‵nogi,+ 9 te fatafaitaulaga o taulaga ‵sunu+ mo ana meāfale katoa, te pesini mo tena tulaga,+ 10 ko gatu kolā ne ‵laga faka‵lei, ko gatu tapu mō te faitaulaga ko Alona, ko gatu o ana tama tāgata kolā ka tavini e pelā me ne faitaulaga,+ 11 te sinu mo faū a tino, mo mea ma‵nogi mō te koga tapuaki.+ Ka fai ne latou a mea katoa ne fakatonu atu ne au ki a koe.”
12 Ne toe fai atu a Ieova ki a Mose: 13 “Faipati ki tino Isalaelu kae fai atu ki a latou, “E ‵tau eiloa o tausi ne koutou aku sapati,+ me i te mea tenā se fakailoga i toku va mo koutou i otou kautama katoa ko te mea ke iloa ne koutou me i a au, Ieova, e faka‵malu ne au koutou. 14 E ‵tau o tausi ne koutou te Sapati me se mea e tapu ki a koutou.+ So se tino e soli ne ia e ‵tau eiloa o tamate. Kafai se tino e fai sena galuega i te aso tenā, e ‵tau o tapale kea‵tea* a te tino tenā mai ana tino.+ 15 E mafai o fai a galuega i aso e ono, kae ko te fitu o aso ko te sapati, se aso malōlō.+ A te aso tenā e tapu ki a Ieova. So se tino e fai galuega i te Sapati e ‵tau o tamate. 16 E ‵tau o tausi ne tino Isalaelu a te Sapati; e ‵tau o tausi ne latou a te Sapati i olotou kautama katoa. A te mea tenā se feagaiga ki te se-gata-mai. 17 A te mea tenā se fakailoga tumau i toku va mo tino Isalaelu,+ me ne faite ne Ieova a te lagi mo te lalolagi i aso e ono, kae ko te fitu o aso ne mānava ei a ia kae malōlō.’”+
18 I te otiga eiloa o tena faipatiga i te Mauga o Sinai, ne tuku atu ei ne ia ki a Mose a papa fatu e lua o te Feagaiga,*+ ne papa fatu kolā ne tusi ki te matikao lima o te Atua.+