Levitiko

18 Ne toe faipati atu a Ieova ki a Mose, ana muna: 2 “Faipati ki tino Isalaelu kae fai atu ki a latou, ‘Au ko Ieova te otou Atua.+ 3 E se ‵tau mo koutou o fai a amioga e fai ne tino o Aikupito, te fenua ne ‵nofo koutou i ei, kae e se ‵tau mo koutou o fai a amioga e fai ne tino i te fenua ko Kanana, te koga ka aumai ne au koutou ki ei.+ Kae e se ‵tau mo koutou o tau‵tali i olotou tulafono fakavae. 4 E ‵tau o tau‵tali koutou i ikuga o aku fakamasinoga kae tausi aku tulafono fakavae kae tau‵tali i ei.+ Au ko Ieova te otou Atua. 5 E ‵tau o tausi ne koutou aku tulafono fakavae mo ikuga o aku fakamasinoga; so se tino e fai penā ka ola e ‵tusa mo mea konā.+ Au ko Ieova.

6 “‘E seai se tagata i a koutou e ‵tau o fakapilipili atu ki sena kāiga ‵pili ke ‵moe fakatauavaga* mo ia.+ Au ko Ieova. 7 E se ‵tau mo koe o ‵moe fakatauavaga mo tou tamana, kae e se ‵tau mo koe o ‵moe fakatauavaga mo tou mātua. A ia ko tou mātua kae e se ‵tau mo koe o ‵moe fakatauavaga mo ia.

8 “‘E se ‵tau mo koe o ‵moe fakatauavaga mo te avaga a tou tamana.+ Ko fakamasiasi ne koe i ei a tou tamana.

9 “‘E se ‵tau mo koe o ‵moe fakatauavaga mo tou tuagane, faitalia me ko te tama fafine a tou tamana io me ko te tama fafine a tou mātua, faitalia me ne fanau a ia i loto i tou kāiga io me i tua.+

10 “‘E se ‵tau mo koe o ‵moe fakatauavaga mo te tama fafine a tau tama tagata io me ko te tama fafine a tau tama fafine, me e fakamasiasi ne ia koe.

11 “‘E se ‵tau mo koe o ‵moe fakatauavaga mo te tama fafine a te avaga a tou tamana, ko te tama a tou tamana, me i a ia ko tou tuagane.

12 “‘E se ‵tau mo koe o ‵moe fakatauavaga mo te tuagane o tou tamana. A ia ko te kāiga o tou tamana i te toto.+

13 “‘E se ‵tau mo koe o ‵moe fakatauavaga mo te taina o tou mātua, me i a ia ko te kāiga o tou mātua i te toto.

14 “‘E se ‵tau mo koe o fakamasiasi te taina o tou tamana mai te ‵moe fakatauavaga mo tena avaga. A ia ko tou fakamātua.+

15 “E se ‵tau mo koe o ‵moe fakatauavaga mo te avaga a tau tama tagata.+ A ia ko te avaga a tau tama tagata, kae e se ‵tau mo koe o ‵moe fakatauavaga mo ia.

16 “‘E se ‵tau mo koe o ‵moe fakatauavaga mo te avaga a tou taina,+ me e fakamasiasi atu ki tou taina.

17 “‘E se ‵tau mo koe o ‵moe fakatauavaga mo se fafine mo tena tama fafine.+ E se ‵tau mo koe o puke te tama fafine a tena tama tagata mo te tama fafine a tena tama fafine ke ‵moe fakatauavaga mo koe. A latou ko kāiga ‵pili o tou fafine; a te mea tenā se faifaiga fakatakalialia.*

18 “‘E se ‵tau mo koe o avaga mo te taina o tau avaga ke fakalogo‵mae+ atu ki a ia kae ‵moe fakatauavaga mo ia i te taimi koi ola ei tena taina.

19 “‘E se ‵tau mo koe o fakapilipili atu ki se fafine i te taimi e lailai ei i tena masaki fakafafine ke ‵moe fakatauavaga mo ia.+

20 “‘E se ‵tau mo koe o ‵moe fakatauavaga mo te avaga a tou taugasoa,* ko se ‵ma+ ei koe.

21 “‘E se ‵tau mo koe o talia sau tamaliki ke ofo atu* ki a Moleka.+ E se ‵tau mo koe o fakamasei te igoa o tou Atua i te auala tenā.+ Au ko Ieova.

22 “‘E se ‵tau mo koe o ‵moe fakatasi mo se tagata e pelā loa mo koe ma ‵moe mo se fafine.+ A te mea tenā se faifaiga fakatakalialia.

23 “‘E se ‵tau mo se tagata o ‵moe fakatauavaga mo se manu kae fai ei ke se ‵ma a ia; io me se fafine ke talia ne ia ke ‵moe fakatauavaga a ia mo se manu.+ A te mea tenā e sē se faifaiga masani.

24 “‘Ke mo a ma fai ne koutou a koutou eiloa ke se ‵ma i te faiga o se mea i mea konei, me konei eiloa a mea ne fai ne tino o fenua fakaa‵tea kolā ka afuli ne au kea‵tea mai i a koutou, ke se ‵ma ei latou.+ 25 Tela la, a te laukele ko se ‵ma, kae ka fakasala ne au te laukele ona ko olotou mea ‵se konā, kae ka luaki ne te laukele ana tino ki tua.+ 26 Kae e ‵tau mo koutou o tausi ki aku tulafono fakavae mo ikuga o aku fakamasinoga,+ kae e se ‵tau mo koutou o fai se mea i mea fakatakalia‵lia konei, faitalia me se tino tonu o te fenua io me se tino fakaa‵tea telā e ‵nofo mo koutou.+ 27 Me i mea fakatakalia‵lia katoa konei ne fai ne tāgata kolā ne ‵nofo mai mua o koutou i te fenua tenā,+ kae nei ko se ‵ma a te laukele. 28 Tenā ko se luaki ei koutou ki tua ne te laukele mō tena fakalailaiga e pelā mo te auala ne luaki ei ne ia ki tua a fenua fakaa‵tea mai mua o koutou. 29 Kafai e fai ne se tino se mea i mea fakatakalia‵lia konei, a tino katoa kolā e fai ne latou a mea konā ka tapale kea‵tea* mai i olotou tino. 30 E ‵tau mo koutou o tausi te otou tiute ki a au mai te sē fai ne koutou a tu fakatakalia‵lia kolā ne fai mai mua atu o koutou,+ ko te mea ke se fai ne koutou a koutou ke se ‵ma i mea konā. Au ko Ieova te otou Atua.’”