Esoto
15 I te taimi tenā, ne usu atu ne Mose mo tino Isalaelu te pese tenei ki a Ieova:+
“Ka usu atu ne au te pese ki a Ieova, me ko oti ne fakamaluga aka a ia ke maluga ‵ki eiloa.+
Ko oti ne ‵pei atu ne ia te solofanua mo tena tino fakatele ki te tai.+
2 A Ioa* ko toku malosi mo toku ‵mana, me ko oti ne fai a ia mo fai toku fakaolataga.+
Tenei toku Atua, kae ka tavae ne au a ia;+ ko te Atua o toku tamana,+ kae ka fakamaluga ne au a ia.+
3 A Ieova se toa mafi.+ A tena igoa ko Ieova.+
4 Ko oti ne ‵pei ne Ia a kaliota a te Falao mo tena kautau ki loto i te tai,+
Kae ko ana toa ‵mafi ‵lei ne ‵pulu ki lalo i te Tai Kula.+
5 Ne ‵galo latou ki lalo i te tai sou; kae ne ‵pulu latou ki lalo i koga ‵poko e pelā me se fatu.+
6 A tou lima fakaatamai, e Ieova, e sili tena malosi;+
A tou lima fakaatamai, e Ieova, e mafai o tuki pala ne ia se fili.
7 Ona ko te seai o se tapula ki tou malosi, e mafai o ‵pei ne koe ki lalo a latou kolā e fai taua atu ki a koe;+
E fakaoko mai ne koe tou kaitaua telā e ‵ka pelā me se afi, kae folo i ei latou e pelā me ne mouku.
8 E auala i te mānava mai i ou puisu, ne ‵luku fakatasi ei ne koe a tai;
Ne ‵tu filemu a latou o taofi a lofiaga;
Ne makeke te tai sou i te kogaloto o te tai.
9 Muna a te fili: ‘Ka afuli ne au! Ka ‵poa ne au!
Ka vaevae ne au olotou kope ke oko ki te taimi ko lotomalie ei au!
Ka tapale taku pelu! Ka fakatakavale ne au a latou!’+
10 Ne ‵pusi ne koe tou mānava, ne ‵galo latou i te tai;+
Ne ‵pulu latou e pelā me se pōlo faka‵mafa i te tai sou.
11 Ko oi la atua e ‵pau mo koe, e Ieova?+
Ko oi e ‵pau mo koe, i te fakaasiatuga ne koe a te lasi o tou ‵malu?+
Ko te Atua telā e ‵tau o ma‵taku kae usu ki ei a pese o tavaega, ko te Atua telā e fai ne ia a galuega fakaofoofogia.+
12 Ne ‵fola atu ne koe tou lima fakaatamai, kae ne folo latou ne te laukele.+
13 Ona ko tou alofa fakamaoni ne takitaki ne koe a tino kolā ne faka‵sao ne koe;+
Ona ko tou malosi ka takitaki ne koe a latou ki tou koga nofo telā e ‵malu.
14 E ‵tau o ‵logo a tino;+ ka pole‵pole latou i te ma‵taku;
Ka maua ne tino Filisitia a logo‵maega* e uke.
15 I te taimi tenā, ka ma‵taku a ulualiki* o Etoma,
Kae ka pole‵pole a pule ma‵losi* o Moapi.+
A tino Kanana katoa ka loto vāi‵vai.+
16 Ka oko atu te mataku mo te polepole ki a latou.+
Ona ko te malosi o tou lima ka se gasue‵sue latou e pelā me se fatu
Ke oko ki te taimi e faka‵sili aka ei ou tino i konei, e Ieova,
Ke oko ki te taimi e faka‵sili+ aka ei a tino kolā ne aumai+ ne koe.
17 Ka aumai ne koe latou ke ‵nofo i te mauga telā ne fai ne koe mo fai tou tofi,+
Ko te koga tumau telā ko oti ne fakatoka ne koe mo ou nofo, e Ieova,
Se koga tapuaki, e Ieova, telā ne faite ne koe ki ou lima.
18 A Ieova ka pule e pelā me se tupu ki te se-gata-mai, se-gata-mai eiloa.+
19 I te oloifoga o solofanua a te Falao mo ana kaliota tau mo ana sotia i luga i solofanua ki loto i te tai,+
Tenā ne fakafoki ifo ei ne Ieova te tai ki luga i a latou,+
Kae ko tino Isalaelu ne sa‵sale i te laukele malō i loto i te tai.”+
20 Tenā ne puke ei ne Miliama te pelofeta fafine, te tuagane o Alona, a te samupelini i tena lima, kae ne tau‵tali atu a fāfine katoa mo olotou samupelini i a ia kae saka‵saka. 21 Ne usu ne Miliama se pese ke tali atu ki te pese a tāgata:
“Usu atu se pese ki a Ieova, me ko oti ne fakamaluga aka a ia ke maluga ‵ki eiloa.+
Ko oti ne ‵pei atu ne ia te solofanua mo tena tino fakatele ki te tai.”+
22 Fakamuli ifo, ne ‵taki atu ne Mose a tino Isalaelu kea‵tea mai i te Tai Kula, kae ne olo atu latou ki te koga lavaki o Sula kae toe sa‵sale atu i aso e tolu i te koga lavaki, kae seki ai eiloa ne vai ne maua ne latou. 23 Ne oko atu latou ki Mala,*+ kae ne seki mafai o inu latou ki te vai i Mala me e ‵kona. Tenā te pogai ne fakaigoa ei ne ia ki a Mala. 24 Ne kamata o mui‵mui a tino ki a Mose,+ kae fai atu: “Ne a mea ka inu tatou ki ei?” 25 Ne kalaga atu a Mose ki a Ieova,+ kae ne fakasino atu ne Ieova se lakau ke fano a ia ki ei. I te taimi ne ‵pei atu ei ne ia a te lakau tenā ki loto i te vai, ne magalo ei te vai.
Ne fai ne Ia i konā se tulafono mō latou mō te faiga o fakamasinoga, kae ne tofotofo+ ne Ia a latou i konā. 26 Ana muna: “Kafai e faka‵logo faka‵lei koutou ki te leo o Ieova te otou Atua kae fai te mea tonu i ana mua, kae ‵saga tonu ki ana fakatonuga kae tausi ki ana tulafono fo‵liki katoa,+ ka se aumai ne au ki a koutou a masaki kolā ne aumai ne au ki tino Aikupito,+ me i a au, Ieova, e faka‵lei ne au koutou.”+
27 Mai tua ifo, oko atu ei latou ki Elima, telā e ‵tu i ei a vaipuna e 12 mo lakau ko pama e 70. Ne ‵nofo latou i konā i tafa o te vai.