Te Muamua Samuelu
22 Ne fanatu a Tavita mai i konā+ kae tele ki te ana o Atulama.+ I te taimi ne ‵logo ei ana taina mo te kāiga kātoa o tena tamana i te mea tenei, ne olo ifo latou ki a ia i konā. 2 A tino katoa kolā ne puapuagatia kae isi ne olotou kaitalafu io me e se lotoma‵lie ki se mea,* ne maopoopo atu katoa ki a ia kae ne fai a ia mo olotou takitaki. E nofo ki se toko 400 tāgata ne ‵kau atu ki a ia.
3 Fakamuli ifo, ne fanatu a Tavita mai i konā ki Mesepa i Moapi kae fai atu ki te tupu o Moapi:+ “Fakamolemole talia mai ke ‵nofo koutou mo toku tamana mo toku mātua ke oko ki te taimi ko iloa ei ne au a mea ka fai ne te Atua mō au.” 4 Tenā ne tuku ei ne ia lāua i konā i te tupu o Moapi, kae ne ‵nofo lāua mo ia i konā i taimi katoa ne nofo ei a Tavita i tena koga ‵muni.+
5 E se leva kae fai atu a Kato+ te pelofeta ki a Tavita: “Sa nofo i te koga ‵muni tenā. Tiaki te koga tenā kae fano ki te fenua o Iuta.”+ Tenā ne tiaki ei ne Tavita te koga tenā kae fano ki te vao o Heleti.
6 Ne logo a Saulo me ko oti ne maua a Tavita mo tāgata kolā ne ‵kau atu ki a ia. I te taimi tenā a Saulo e sagasaga i Kipea+ mai lalo o te lakau ko te tamalisi* i te koga maluga mo te tao i tena lima, kae ko ana tavini katoa e ‵tu i ana tafa. 7 Tenā ne fai atu ei a Saulo ki ana tavini kolā e ‵tu i ana tafa: “Fakamolemole, faka‵logo mai koutou e tino Peniamina. E mata, ka tuku atu foki ne te tama tagata a Iese+ ne fatoaga mo togavine ki a koutou katoa? E mata, ka faka‵sopo aka ne ia koutou ke fai mo takitaki o taki tokoafe mo takitaki o taki tokoselau?+ 8 A koutou katoa ko ‵kau fakatasi o ‵teke mai ki a au! E seai se tino ne fakailoa mai ne ia ki a au me e isi se feagaiga ne fai ne taku tama tagata mo te tama tagata a Iese!+ E seai se tino i a koutou e alofa mai ki a au o fakailoa mai me ko taku tama eiloa ne fakamalosi ne ia taku tavini ke ‵teke mai ki a au kae ke ‵muni a ia o taua mai ki a au, e pelā mo te mea ko tupu i te aso nei.”
9 Tenā ne tali+ atu ei a Toeka+ te tino Etoma telā ne nofo atu i konā o tausi a tavini a Saulo, “Ne lavea ne au a te tama tagata a Iese ne fanatu ki a Aimeleka te tama tagata a Aitupa+ i Nopa. 10 Kae ne fesili atu a ia ki a Ieova e uiga mō tou tagata kae ne tuku atu ne ia a meakai ki ei. Ne tuku atu foki ne ia te pelu a Koliata te tino Filisitia+ ki a ia.” 11 I konā ne avatu te fekau a te tupu ki a Aimeleka te tama tagata a Aitupa te faitaulaga mo faitaulaga katoa i te kāiga o tena tamana i Nopa. Tenā ne o‵mai ei a latou katoa ki te tupu.
12 Ne fai atu a Saulo: “Fakamolemole, fakalogo mai e te tama tagata a Aitupa!” kae ne tali atu a ia: “Tenei au e toku aliki.” 13 Ne fai atu a Saulo ki a ia: “Kaia ne ‵kau ei koulua o ‵teke mai ki a au, ko koulua mo te tama tagata a Iese, kae tuku atu ki a ia a falaoa mo te pelu kae fesili atu foki koe ki te Atua e uiga mō ia? Ne ‵teke ne ia au, kae tenā e ‵muni o taua mai ki a au, e pelā mo te mea ko tupu i te aso nei.” 14 I konā ne tali atu a Aimeleka ki te tupu: “Ko oi foki la mai i au tavini katoa e fakatuagagina* e pelā mo Tavita?+ A ia ko te avaga a te tama fafine a te tupu+ kae ko te takitaki o au leoleo kae āva malosi ki ei a tino i tou kāiga.+ 15 E mata, tenei te taimi muamua ke fesili atu au ki te Atua e uiga mō ia?+ E se taitai eiloa o fai ne au a mea konā ne fai mai ne koe! Ke mo a eiloa e fai ne te tupu se mea ki tena tavini mo te kāiga kātoa o toku tamana, me e seai eiloa se mea e iloa ne tau tavini e uiga ki te mea tenei.”+
16 Kae ne fai atu te tupu: “A koe ka mate eiloa+ e Aimeleka, ko koe fakatasi mo kāiga katoa o tou tamana.”+ 17 Tenā ne fai atu ei a te tupu ki leoleo e ‵tu i ana tafa: “‵Fuli atu o tamate a faitaulaga a Ieova, me e ‵kau latou i a Tavita! E iloa ne latou me ne tele a ia kea‵tea, kae e seki fakailoa mai ne latou ki a au!” Kae ko tavini a te tupu ne seki ma‵nako o fakaoko atu olotou lima o tamate a faitaulaga a Ieova. 18 Tenā ne fai atu ei te tupu ki a Toeka:+ “‵Fuli atu koe o tamate a faitaulaga!” I konā eiloa ne fanatu a Toeka te tino Etoma+ kae tamate ne ia a faitaulaga. Ne tamate ne ia i te aso tenā a tāgata e toko 85 kolā e ‵pei ki efota lino.+ 19 Ne ‵ta foki ne ia ki te pelu a tino i Nopa,+ te fakai o faitaulaga; ko tāgata mo fāfine, tama‵liki mo pepe, pulumakau, asini mo mamoe, ne tamate katoa ne ia ki te pelu.
20 Kae e tokotasi te tama tagata a Aimeleka te tama tagata a Aitupa, telā e fakaigoa ki a Aviata,+ ne sao kae tele o tautali i a Tavita. 21 Ne fai atu a Aviata ki a Tavita: “Ko oti ne tamate ne Saulo a faitaulaga a Ieova.” 22 Tenā ne fai atu ei a Tavita ki a Aviata: “E iloa ‵lei ne au i te aso tenā,+ i te laveaga ne au a Toeka te tino Etoma i konā, me ka fakailoa eiloa ne ia ki a Saulo. Ko au eiloa ko te pogai ne ‵mate ei a tino katoa i te kāiga o tou tamana. 23 Nofo i konei i a au. Sa mataku, me ko so se tino e ‵sala ki tou ola e ‵sala foki ki toku ola; a koe e nofo mai lalo i taku puipuiga.”+