Te Tusi a Maleko
7 Ne maopoopo atu ki tafa o Iesu i te taimi tenā a Falesaio mo nisi failautusi kolā ne o‵mai i Ielusalema.+ 2 Kae ne lavea ne latou ana nisi soko e ‵kai mo olotou lima e lai‵lai, kae seki ‵fulu. 3 (Me e se mafai o ‵kai te kau Falesaio mo tino Iutaia katoa seiloga ke ‵fulu muamua olotou lima ke oko ki tulilima, e ‵tusa mo tuu mo aganuu a tino i aso mua, 4 kae kafai ko ‵foki mai latou i te maketi, e se mafai latou o ‵kai seiloga ke faka‵ma muamua latou. E uke aka foki a nisi tuu mo aganuu kolā ne maua ne latou kae puke ‵mau ki ei, e pelā mo te papatisoga o ipu, sioki, mo mea e faite ki kopa.)+ 5 Ne fesili atu a Falesaio mo failautusi ki a ia: “Kaia e se tau‵tali ei ou soko ki tuu mo aganuu a tino i aso mua, kae e ‵kai latou mo olotou lima e lai‵lai?”+ 6 Ana muna ki a latou: “Ne fakasino tonu atu eiloa ki a koutou tino ‵loi, a te valoaga a Isaia, e pelā eiloa mo ana muna ne tusi, ‘A tino konei e āva mai fua ki a au i olotou laugutu, kae ko olotou loto e ‵mao ‵ki mai i a au.+ 7 E seai se aoga e tapuaki mai ei latou ki a au, me e fakavae olotou akoakoga ki fakatonuga a tāgata.’+ 8 Ne tiakina ne koutou a tulafono a te Atua, kae taofi ‵mau koutou ki tuu mo aganuu a tāgata.”+
9 E se gata i ei, ne fai atu a ia ki a latou: “Ko ‵poto aka eiloa koutou o tiaki a tulafono a te Atua ko te mea ke tausi ne koutou otou tuu mo aganuu.+ 10 E pelā mo te mea tenei, ne fai atu penei a Mose, ‘Āva ki tou tamana mo tou mātua,’+ kae ko ‘Te tino telā e taku fakamasei* ne ia tena tamana io me ko tena mātua e ‵tau o tamate.’+ 11 Kae e fai mai koutou, ‘Kafai e fai atu se tino ki tena tamana io me ko tena mātua: “So se mea a aku telā e mafai o aoga ki a koulua, a te mea tenā se kopani (ko tena uiga, ko taku meaalofa tenā ki te Atua),”’ 12 ko fai ne koutou te tino tenā ke se fai ne ia se mea e tasi mō tena tamana io me ko tena mātua.+ 13 Tela la, ko fakaseaoga ne koutou a te muna a te Atua ona ko otou tuu mo aganuu kolā ne tuku fakasolo ifo ne koutou.+ Kae e fai foki ne koutou a mea e uke kolā e tai ‵pau mo te mea tenei.”+ 14 Ne kalaga atu tou tagata ke toe olo atu te vaitino ki a ia, kae fai atu ki a latou: “Faka‵logo mai ki a au, koutou katoa, kae ke malama‵lama foki koutou i tena uiga.+ 15 E seai se mea mai tua e ulu ki loto i se tagata e mafai o fakalailai atu ki a ia; kae ko mea kolā e olo ki tua mai se tagata ko mea konā e fakalailai ei a ia.”+ 16* ——
17 I tena uluatuga ki se fale e tai ‵mao mai te vaitino, ne kamata ana soko o fesili atu ki a ia e uiga ki te tala fakatusa.+ 18 Tenā ne fai atu ei a ia ki a latou: “E a, e se malamalama foki koutou e pelā mo tino konā? E se iloa ne koutou me e seai se mea mai tua e ulu atu ki loto i se tagata e mafai o fakalailai atu ki te tagata tenā, 19 me e se ulu atu te mea tenā ki tena loto, kae ki loto i tena tinae ko fano ei ki tua?” Ne fakaasi mai ne ia i konā me e ‵ma a meakai katoa. 20 Ne toe fai atu a ia: “A te mea telā e vau ki tua mai se tagata ko te mea tenā e fakalailai ei a ia.+ 21 Me mai i loto o tāgata e olo ei ki tua a mafaufauga ma‵sei,+ ko amioga fakatauavaga sē ‵tau, te kaisoa, te tatino, 22 faifaiga o te mulilua, te kaimanako, faifaiga matagā, te faitogafiti, te amio matafatu mo te sē āva, matakanokano, te pati masei, te fakamatamata, mo uiga faiga‵ta. 23 A mea ma‵sei katoa konei e maua mai i te loto kae e fakalailai ei te tagata.”
24 Ne tu aka a ia ki luga kae fanatu ki te kogā koga o Tulo mo Saitonu.+ Ne ulu atu a ia ki loto i se fale kae ne seki manako ke iloa ne se tino te mea tenā, kae ne seki mafai o sao a ia i tino. 25 Ne logo fakavave se fafine telā e pukea tena tamaliki fafine ne se agaga masei e uiga ki a ia, fanatu ei tou fafine kae totuli ifo i ana vae.+ 26 A te fafine tenā se tino Eleni mai Foinikia, kae ne fakamolemole atu faeloa tou fafine ki a ia ke afuli aka kea‵tea te temoni mai tena tama. 27 Kae ne fai atu a ia ki tou fafine: “E ‵tau o ma‵kona muamua a tama‵liki, me e sē se mea tonu ke puke a falaoa a tama‵liki kae ‵pei atu ki tamā kuli.”+ 28 Kae ne tali atu te fafine ki a ia: “Tou ‵malu, e tonu koe, kae ko tamā kuli mai lalo o te taipola e ‵kai foki ki mea kolā e ma‵tutu ifo mai tama‵liki konā.” 29 Tenā ne fai atu ei a ia ki te fafine: “Ona ko au pati konā, fano la; ko oti ne fano kea‵tea te temoni mai tau tama.”+ 30 Ne fano te fafine ki tena fale kae ne maua atu ne ia a tena tama e takato i luga i te moega, kae ko oti ne fano kea‵tea te temoni mai i a ia.+
31 I te fokiatuga a Iesu mai te kogā koga ko Tulo, ne ui atu a ia i Saitonu ki te Vai o Kalilaia i te kogā koga ko Tekapoli.+ 32 Ne aumai ne tino i konā ki a ia se tagata taliga ‵tuli kae gūgū,+ kae ne fakatagi atu latou ke tuku atu fua ana lima ki luga i a ia. 33 Kae ne ave ne ia te tagata tenei kea‵tea mai te vaitino. Tenā ne tuku atu ei ana matikao ki taliga o te tagata, kae i te otiga ne puaki atu ki ei, fakapatele atu ei a ia ki te alelo o tou tagata.+ 34 Ne kilo aka ana mata ki te lagi, ‵pusi tena mānava kae fai atu ki a ia: “Efata,” ko tena uiga, “Ke ma‵tala.” 35 I konā loa ne ma‵tala ana taliga+ kae ne ‵lei foki tena faipati kae ne kamata ei a ia o faipati e pelā eiloa mo te masani. 36 Kae ne fakatonu atu a Iesu ki a latou ke mo a ma fakailoa atu te mea tenā ki se isi tino;+ kae ko te uke o ana fakatonuga e fai atu ko te uke foki o fakasalalauga e fai ne latou e uiga ki ei.+ 37 E tonu, ne ofo malosi eiloa a latou+ kae fai aka olotou pati: “Ko oti ne fai ne ia a mea katoa ke ‵lei. Ke oko ki tino taliga ‵tuli ko ‵logo mo tino gūgū ko fai‵pati faka‵lei.”+