Te Tusi a Mataio
7 “Sa fakamasino+ atu ko te mea ke se fakamasinogina koutou, 2 me i te fakamasinoga telā e fai ne koutou ka fakamasino foki koutou ki ei,+ kae ko te fua telā e fua atu ne koutou, ka fua mai foki ne latou ki a koutou.+ 3 Kaia la e kilo ei koe ki te mouku i te mata o tou taina kae e se matea ne koe te potu lakau i tou mata?+ 4 Io me e mafai pefea o fai atu koe ki tou taina, ‘Talia mai ke ‵seu kea‵tea ne au te mouku i tou mata,’ kae kiloke! e isi ei se potu lakau* i tou mata? 5 Te tino loi! Tapale muamua te potu lakau i tou mata, ko matea faka‵lei ei ne koe te auala ke ‵seu ei kea‵tea te mouku i te mata o tou taina.
6 “Sa tuku atu a mea tapu ki kuli io me ‵pei atu otou penina ki mua o puaka,+ ko te mea ke se lakalaka ne latou a mea konā i lalo i olotou vae kae ma‵fuli mai ko saesae ei koutou.
7 “Tumau i te fakamolemole atu, kae ka tuku mai ki a koutou;+ tumau i te salasala atu, kae ka maua ne koutou; tumau i te tukituki atu, kae ka ‵tala mai ki a koutou;+ 8 me i so se tino e fakamolemole atu, ka tuku atu ki a ia,+ kae ko so se tino e salasala atu ka maua ne ia; kae ko so se tino e tukituki atu, ka ‵tala atu ki a ia. 9 E tonu, ko oi te tino i a koutou e mafai o tuku atu ne ia se fatu ki tena tama, māfai e fakamolemole mai ki se falaoa? 10 Io me kafai e fakamolemole atu ki se ika kae tuku atu ki a ia se gata? 11 Tela la, kafai a koutou ne tino ma‵sei, kae e iloa ne koutou o tuku atu a meaalofa ‵lei ki otou tama‵liki, e sili fakafia atu la te fia tuku atu ne te otou Tamana telā i te lagi a mea ‵lei+ ki tino kolā e fakamolemole atu ki a ia!+
12 “Tela la, a mea katoa kolā e ma‵nako koutou ke fai atu ne tino ki a koutou, e ‵tau foki mo koutou o fai ki a latou.+ Tenei eiloa te uiga o te Tulafono mo tusi a Pelofeta.+
13 “Ulu atu koutou ki te mataloa mataliki+ me e lauefa te mataloa kae saosao te auala telā e tau atu ki te fakaseaiga, kae e tokouke a tino e olo atu i ei; 14 kae e mataliki te mataloa kae sai‵tia te auala telā e tau atu ki te ola, kae e mu‵tana fua a tino e maua ne latou.+
15 “Ke fakaeteete koutou i pelofeta ‵loi+ kolā e o‵mai ki a koutou kae fakafoliga mai pelā me ne mamoe,+ kae i loto i a latou e fe‵kai eiloa e pelā me ne kuli vao.+ 16 Ka matea ne koutou a latou i olotou fuataga. E a, e mafai o tau ne tino a fuagavine mai i lakau tala‵tala io me ko mati mai i lakau makai‵kai?+ 17 Tela la, a lakau ‵lei e ‵fua mai i ei a fuataga ‵lei, kae ko lakau ma‵sei e ‵fua mai i ei a fuataga ma‵sei.+ 18 E se mafai o fua mai i se lakau ‵lei a fuataga ma‵sei, io me fua mai i se lakau masei a fuataga ‵lei.+ 19 A lakau katoa kolā e se ‵fua mai i ei a fuataga ‵lei ka ‵kati ki lalo kae ‵pei ki te afi.+ 20 Tela la, ka matea eiloa ne koutou a tino konā i olotou fuataga.+
21 “E se ko tino katoa kolā e fai mai ki a au, ‘Te Aliki, te Aliki,’ ka ulu ki loto i te Malo o te lagi, kae ko ia fua telā e fai ne ia te loto o toku Tamana telā i te lagi.+ 22 E tokouke a tino ka fai mai ki a au i te aso tenā: ‘Te Aliki, te Aliki,+ e a, ne seki ‵valo atu matou i tou igoa kae ‵tuli a temoni i tou igoa kae fai a galuega ‵mana i tou igoa?’+ 23 Kae ka fakailoa atu ne au ki a latou: ‘E se iloa lele ne au koutou! Olo kea‵tea mai i a au, koutou tino amio ma‵sei!’+
24 “Tela la, so se tino e lagona ne ia aku pati konei kae fai ne ia ka fai pelā me se tagata poto, telā e fakatu tena fale i luga i te kaupapa.+ 25 Kae ne ‵to ‵lotu te vaiua, ne oko mai te lofiaga, ne agi te matagi ki luga i te fale, kae ne seki siga eiloa, me ne tu tena fakavae i luga i te kaupapa. 26 E se gata i ei, so se tino e lagona ne ia aku pati konei kae e se fai ne ia ka fai pelā me se tagata valea, telā e fakatu tena fale i luga i te one.+ 27 Kae ne ‵to ‵lotu te vaiua, ne oko mai te lofiaga, ne agi te matagi kae poko ki te fale tenā,+ siga ei ki lalo, kae malepe valevale.”
28 I te taimi ne oti ei a pati konei a Iesu, ne ofo masei te vaitino i te auala ne akoako atu ei a ia,+ 29 me ne akoako atu ne ia latou e pelā me se tino e isi sena pule+ kae e se pelā mo olotou failautusi.