Neemia

2 I te masina o Nisani,* i te 20 tausaga+ o te Tupu ko Aletaseta,+ e isi ne uaina ne fakatoka i ana mua, kae e pelā mo te masani ne puke ne au a te uaina kae tuku atu ki te tupu.+ Kae ne seki mata fanoanoa eiloa au penei i ana mua. 2 Ne fai mai te tupu ki a au: “Kaia ko mata fanoanoa ei koe, i a koe e se masaki? E seai eiloa se pogai kae na ko te mafatia fua o te loto.” Tenā ne gasolo ei au o mataku malosi.

3 Kae ne fai atu au ki te tupu: “Ke ola leva te tupu! Kaia e se mata fanoanoa ei au me i te fakai, te koga ne tanu ei oku tupuga ko masei valevale, kae ko ana mataloa ko oti ne ‵sunu ki te afi?”+ 4 Tenā ne fai mai ei te tupu ki a au: “Se a te mea e manako koe ki ei?” I konā eiloa, ‵talo ei au ki te Atua o te lagi.+ 5 Tenā ne fai atu ei au ki te tupu: “Kafai e fiafia ki ei te tupu kae kafai e fiafia foki koe ki tau tavini, uga mai au ke fano ki Iuta, ki te fakai ne tanu i ei oku tupuga ke toe faite aka ne au.”+ 6 Tenā ne fai mai ei te tupu, telā e saga‵saga fakatasi mai mo te tupu fafine, ki a au: “E pefea te leva o tau malaga, kae ka foki mai koe mafea?” Ne fiafia a te tupu ke uga ne ia au,+ kae ne tuku atu ne au te taimi tonu e foki mai ei au.+

7 Tenā ne fai atu ei au ki te tupu: “Kafai e fiafia ki ei te tupu, tuku mai ke fano mo au ne tusi ki kovana o kogā koga i te Suā Feitu o te Vaitafe,*+ ke fakasaoloto au o malaga i ei ke oko eiloa ki Iuta, 8 e pelā foki mo se tusi ki a Asafo te pule o te vao a te tupu, ko te mea ke mafai o tuku mai ne ia ne laupapa mo fai a ‵saga o mataloa o te ‵Pui Malosi+ o te Fale* mo ‵pui o te fakai+ mo te fale ka fano au ki ei.” Tenā ne tuku mai ei ne te tupu a tusi konā ki a au,+ me i lima ‵lei o toku Atua ne fakatasi mai ki a au.+

9 Fakamuli loa, ne fanatu au ki kovana o koga i te Suā Feitu o te Vaitafe kae tuku atu ki a latou a tusi a te tupu. Ne uga mai foki ne te tupu a takitaki kautau mo tāgata faka‵tele solofanua ke olo tasi mo au. 10 I te ‵logoga a Sanipalata+ te tino Holono mo Tovia+ te ofisa* Amoni+ i te mea tenei, ne seki fia‵fia lāua me isi se tino ko fanatu o fai se mea ‵lei mō tino Isalaelu.

11 E seki leva kae oko atu au ki Ielusalema, nofo ei au i konā i aso e tolu. 12 Ne tu aka au i te po, ko au mo nai tagata ne ‵nofo mo au, kae ne seki fai eiloa ne au ki se tino a te mea ko oti ne tuku ne te Atua ki toku loto ke fai mō Ielusalema, e seai ne aku manu kae na ko te manu telā ne sopo au i ei. 13 Ne fanatu au i te po i loto i te Mataloa ki te Vanu,+ kae fanatu i mua o te Vaipuna o te Gata Lasi o fano ki te Mataloa o Kaiga,+ kae ne iloilo ne au a ‵pui o Ielusalema kolā ko oti ne ofa ki lalo mo ana mataloa kolā ne ‵sunu ki te afi.+ 14 Ne fanatu au ki te Mataloa o Vaipuna+ mo te Vai Koukou o te Tupu, kae ko te manu ne sopo au i ei ko seai sena auala ke fano i ei. 15 Ne fanatu eiloa au ki te vanu+ i te po o iloilo a te ‵pui, oti aka, foki ei au kae ulu atu i loto i te Mataloa ki te Vanu, foki mai ei au.

16 A sui pule+ e se iloa ne latou te koga ne fano au ki ei mo mea ne fai ne au, me seki ai eiloa saku pati ne fai ki tino Iutaia, faitaulaga, tino tāua, sui pule mo te ‵toega o tino ga‵lue. 17 Oti aka loa, fai atu ei au ki a latou: “Ko lavea ne koutou te masei o te tulaga ko oko tatou ki ei, ko oti ne fakamasei a Ielusalema kae ‵sunu ana mataloa ki te afi. O‵mai, ke toe faite ne tatou a ‵pui o Ielusalema, ko te mea ke fakagata te masiasi tenei.” 18 Tenā ne fai atu ei au ki a latou me i lima ‵lei o toku Atua e fakatasi mai ki a au+ e pelā foki mo pati ne fai mai ne te tupu ki a au.+ Kae ne fai mai latou: “Tatou ka ‵tu ki luga o fai te galuega.” Tenā ne fakama‵losi ei latou o fai a te galuega ‵lei.+

19 I te ‵logoga a Sanipalata te tino Holono mo Tovia+ te ofisa* Amoni+ mo Gesemu te tino Alapi+ i te mea tenei, ne kamata o fakatauemu mai ne latou a matou+ kae fakaasi mai te lotou takalia‵lia i olotou pati: “Ne a otou mea e fai? E a, ko ‵teke koutou ki te tupu?”+ 20 Kae ne tali atu au: “A te Atua o te lagi ko te Atua telā ka tuku mai ne ia te manuia ki a matou,+ kae ko matou ana tavini ka ‵tu aka o fai te galuega; kae ko koutou ka seai se otou vaega io me se aiā io me se mea ke masaua ei koutou i loto i Ielusalema.”+