Te Muamua Samuelu

19 Fakamuli ifo, ne faipati atu a Saulo ki a Ionatana tena tama tagata mo ana tavini katoa e uiga ki tena taumafaiga ke tamate+ a Tavita. 2 Kae ona ko Ionatana te tama tagata a Saulo ne alofa malosi ki a Tavita,+ ne fai atu a Ionatana ki a Tavita: “A toku tamana ko Saulo e manako o tamate koe. Fakamolemole, a koe ke fakaeteete i te tafataeao, kae fano o ‵muni i se koga e se maua ei koe. 3 Au ka fano o tu i tafa o toku tamana i te laukele telā e nofo koe i ei. Ka faipati au ki toku tamana e uiga ki a koe, kae kafai e iloa ne au se mea, ka fakailoa atu eiloa ne au.”+

4 Tenā ne fai atu ei ne Ionatana a mea ‵gali e uiga ki a Tavita+ ki tena tamana ko Saulo. Ana muna ki a ia: “A te tupu e se ‵tau o agasala ki tena tavini ko Tavita, me ne seki agasala a ia ki a koe kae ko mea ne fai ne ia mō koe ne aoga eiloa ki a koe. 5 Ne talia ne ia ke tu tena ola i se tulaga fakamataku ke tamate te tino Filisitia,+ tenā ne aumai ei ne Ieova se manumaloga* lasi ki Isalaelu kātoa. Ne lavea ne koe te mea tenā, kae ne fiafia malosi koe i ei. Tela la, kaia e ‵tau ei o agasala koe i toto o se tino telā e seai sena mea ‵se ne fai kae tamate a Tavita e aunoa mo se pogai ‵tau?”+ 6 Ne fakalogologo a Saulo ki a Ionatana kae ne tauto atu a Saulo: “E pelā eiloa mo Ieova e ola, ka se tamate eiloa ne au a ia.” 7 Mai tua ifo, ne kalaga atu a Ionatana ki a Tavita kae fai atu ne ia a mea katoa konei. Tenā ne aumai ei ne Ionatana a Tavita ki a Saulo, kae ne toe tavini atu a tou tagata ki a ia e pelā eiloa mo taimi mua.+

8 Fakamuli ifo, ne toe tupu se taua, kae ne fanatu a Tavita o taua ki tino Filisitia kae ‵ta valevale ne ia a tino e tokouke i ei, kae ne ‵tele latou kea‵tea mai i a ia.

9 Kae ne oko atu te agaga masei mai i a Ieova ki a Saulo+ i te taimi ne sagasaga ei a ia i loto i tena fale mo tena tao i tena lima, kae ko Tavita e tātā tena kitala+ i te taimi tenā. 10 Ne taumafai a Saulo o velo a Tavita ki te tao ke ‵mau ki te ‵pui, kae ne fakaseke ne ia a Saulo tenā ne tu ei te tao i te ‵pui. Ne tele a Tavita kae ne sao a ia i te po tenā. 11 Fakamuli ifo, ne uga atu ne Saulo a avefekau ki te fale o Tavita o lamalama a ia kae ke tamate tou tagata i te tafataeao,+ kae ko te avaga a Tavita ko Mekala ne fai atu ki a ia: “Kafai koe e se tele ke sao i te po tenei, ka mate eiloa koe i te aso taeao.” 12 I konā eiloa ne tuku ifo ne Mekala a Tavita i te famalama ko te mea ke mafai o tele a ia ke sao. 13 Ne puke ne Mekala te tupua faite* kae tuku ki luga i te moega, kae tuku atu ne ia se gatu ne faite ki fulufulu o kouti i tena ulu, kae pulou ne ia ki se gatu.

14 Ne uga ne Saulo ana avefekau ke puke mai a Tavita, kae ne fai atu tou fafine: “A ia e masaki.” 15 Ne toe uga ne Saulo ana avefekau ki a Tavita kae fai atu ki a latou: “Aumai tou tagata ki a au i luga i tena moega ke tamate.”+ 16 I te uluatuga a avefekau ki loto, a te tupua faite* e moe mai i luga i te moega mo te gatu ne faite ki fulufulu o kouti i tena ulu. 17 Ne fai atu a Saulo ki a Mekala: “Kaia ne fakatogafiti ei ne koe au penei kae uga kea‵tea toku fili+ ko te mea ke sao a ia?” Ne tali atu a Mekala ki a Saulo: “Ne fai mai a ia ki a au, ‘Tuku mai au ke fano i a koe ma tamate ne au!’”

18 Ne tele kea‵tea a Tavita kae sao, fanatu ei a ia ki a Samuelu i Lama.+ Ne fai atu ne ia a mea katoa ne fai ne Saulo ki a ia. Tenā ne olo atu ei lāua mo Samuelu o ‵nofo i Naiota.+ 19 Fakamuli ifo, ne fakailoa atu ki a Saulo: “Kiloke! A Tavita telā e nofo i Naiota i Lama.” 20 I konā eiloa uga atu ei ne Saulo a avefekau ke puke mai a Tavita. I te laveaga ne latou a pelofeta ma‵tua e ‵valo fakapelofeta, kae ko Samuelu e tu o takitaki ne ia latou, ne oko atu te agaga o te Atua ki luga i avefekau a Saulo, kae ne kamata foki latou o amio e pelā me ne pelofeta.

21 I te taimi ne fai atu ei ne latou te mea tenā ki a Saulo, ne toe uga fakavave ne ia nisi avefekau, kae ne kamata foki latou o amio e pelā me ne pelofeta. Ne toe uga ne Saulo a nisi avefekau, te tolu o potukau, kae ne kamata foki latou o amio pelā me ne pelofeta. 22 Oti aka loa, fanatu ei a ia ki Lama. I tena okoatuga ki te vaikeli lasi i Seku, ne fesili atu a ia: “Kofea a Samuelu mo Tavita?” Ne tali atu latou: “Konā i Naiota+ i Lama.” 23 I te auala o Saulo mai konā ki Naiota i Lama, ne oko atu foki ki a ia te agaga o te Atua, kae ne sasale atu a ia kae amio e pelā me se pelofeta ke oko atu eiloa ki Naiota i Lama. 24 Ne tapale foki ne ia ana gatu, kae ne amio foki a ia e pelā me se pelofeta i mua o Samuelu, kae ne moe a ia i konā i te aso kātoa mo te po kātoa, kae seai ne ana gatu. Tenā te pogai ne fai aka ei latou: “E a, a Saulo nei se tino foki e tokotasi o te kau pelofeta?”+