Neemia

13 I te aso tenā, ne faitau atu ei a te tusi a Mose ke lagona ne tino,+ kae ne maua aka me e tusi i loto i ei me e se ‵tau eiloa mo se tino Amoni io me se tino Moapi+ o ulu mai ki loto i te fakapotopotoga a te Atua tonu,+ 2 me ne seki fakafetaui atu latou ki tino Isalaelu o avatu a meakai mo vai, kae ne ‵togi ne latou a Palaamo ke fakamalaia a latou.+ Kae ko te motou Atua ne ‵fuli ne ia a te fakamalaiaga tenā ki se fakamanuiaga.+ 3 I te lagonaga eiloa ne latou te Tulafono, kamata ei o ‵vae kea‵tea ne latou mai i Isalaelu a tino kolā ne ‵tupu mai i fenua fakaa‵tea.+

4 Mai mua o te mea nei, a te faitaulaga telā e pule i potu ‵teu koloa* i te fale* o te ‵tou Atua+ ko Eliasipa,+ se kāiga o Tovia.+ 5 Ne fai ne ia mō tou tagata a te potu ‵teu koloa* lasi tenā, telā ne tuku sāle i ei a taulaga meakai, mea fakama‵nogi, mo meāfale mo te tasi-vae-sefulu o saito, te uaina fou, mo te sinu,+ kolā e ave ma tino Levi,+ tino usuusu, mo tino tausi mataloa, fakatasi mo meaalofa ma te kau faitaulaga.+

6 I taimi katoa konā kae ko au e galo mai Ielusalema, i a au ne fano ki te tupu i te 32 tausaga+ o te pulega a te tupu o Papelonia ko Aletaseta;+ kae fakamuli ifo ne fakamolemole au ki te tupu ke talia mai ko au ke toe foki. 7 Tenā ne fanatu ei au ki Ielusalema kae iloa aka ne au te mea matagā ne fai ne Eliasipa+ mō Tovia,+ mai te faiga ne ia o te potu ‵teu koloa mō tou tagata i te koga ateatea o te fale o te Atua tonu. 8 Ne fakafanoanoa eiloa a te mea tenei ki a au, tenā ne ‵pei ei ne au ki tua a kope o Tovia mai te potu ‵teu koloa. 9 Oti aka, ne fai taku fakatonuga kae ne ‵fulu faka‵ma ne latou a potu ‵teu koloa;* kae ne toe faka‵foki ne au ki loto i ei a meāfale o te fale o te Atua tonu,+ fakatasi mo taulaga meakai mo mea fakama‵nogi.+

10 Ne iloa aka foki ne au me ko seai ne vaega o tino Levi+ e avatu sāle ki a latou,+ tela la, ko olo kea‵tea a tino Levi mo tino usuusu kolā ne fai ne latou te taviniga, ko tino taki tokotasi ki olotou laukele.+ 11 Ne kote ne au a sui pule+ kae fai atu: “Kaia ko tuku tiaki ei te fale o te Atua tonu?”+ Tenā ne toe fakamaopoopo mai ei ne au a latou katoa kae toe faka‵foki latou ki olotou tulaga. 12 Kae ko Iuta kātoa ne aumai ne latou te tasi-vae-sefulu+ o saito, te uaina fou, mo te sinu ki potu ‵teu koloa.+ 13 Kae ne fai ne au a Selemia te faitaulaga, Satoka te tino laga tusi* mo Petaia mai tino Levi ke pule i potu ‵teu koloa, kae ko Hananu te tama tagata a Sakula te tama tagata a Matania ko te lotou tino fesoasoani, me i tāgata konei ne tino fakatuagagina. I o latou te tiute ke tufa atu a mea ki olotou taina.

14 Ke masaua mai au,+ e toku Atua, ona ko te mea tenei, kae ke mo a ma ‵solo kea‵tea ne koe aku faifaiga alofa fakamaoni ne fai mō te fale o toku Atua mo tena taviniga.+

15 I aso konā, ne lavea ne au a tino i Iuta e ‵tau uaina* i te Sapati,+ kae aumai ne latou a fakaputuga o saito kae tuku atu ki luga i asini, kae aumai ne latou a uaina, fuagavine, mati mo amoga valevale ki loto i Ielusalema i te aso o te Sapati.+ Tenā ne faipati atu ei au ki a latou ke se toe fakatau atu olotou mea i te aso tenā.* 16 Kae ko tino Tulo kolā e ‵nofo i te fakai ne aumai olotou ika mo nisi mea valevale o fakatau atu ki tino o Iuta mo Ielusalema i te Sapati.+ 17 Ne kote ne au a tino tāua o Iuta kae fai atu ki a latou: “Se a te mea matagā tenei ko fai ne koutou, e fakaseaoga ei ne koutou te aso o te Sapati? 18 E a, e se tenei te mea ne fai ne otou tupuga, ko aumai ei ne te ‵tou Atua a fakalavelave katoa konei ki a tatou mo te fakai tenei? Nei la, ko toe fakaopoopo atu ne koutou a tena kaitaua telā e ‵ka pelā me se afi ki luga i Isalaelu mai te fakaseaogaga ne koutou a te Sapati.”+

19 Tela la, i te taimi eiloa ko kamata ei o pouli i Ielusalema mai mua o te Sapati, ne fai taku fakatonuga ke ‵pono a mataloa o te fakai. Ne fai atu foki au ke se ‵tala eiloa ne latou ke oko ki te taimi ko palele ei te Sapati, kae ne faka‵tu ne au aku nisi tino fesoasoani i mataloa o te fakai ko te mea ke seai eiloa ne amoga e aumai ki loto i te aso o te Sapati. 20 A tino fai pisinisi mo tino fakatau mea valevale ne ‵moe i te po mai tua o Ielusalema fakatasi io me fakalua taimi. 21 Tenā ne faipati atu ei au ki a latou: “Kaia e ‵moe ei koutou i te po mai mua o te ‵pui? Kafai e toe fai ne koutou te mea tenei, ka afuli ne au koutou kea‵tea.” Mai te taimi tenā o fano ki mua ne seki toe o‵mai eiloa latou i te Sapati.

22 Kae ne fai atu au ki tino Levi me e ‵tau o faka‵ma faeloa latou ko o‵mai ei o leoleo a mataloa o te fakai ke fai ei te Sapati ke ‵malu.+ Ona ko te mea foki tenei, ke masaua mai au e toku Atua, kae fakaasi mai te alofa ki a au e ‵tusa mo te lasi o tou alofa fakamaoni.+

23 I aso konā ne lavea foki ne au a tino Iutaia kolā ne a‵vaga* ki fāfine+ Asetota,+ Amoni mo Moapi.+ 24 A te āfa o olotou tama tāgata e fai‵pati i te ‵gana Asetota mo ‵gana a tino fakaa‵tea, kae e seai se tino i a latou e iloa ne ia o faipati i te ‵gana a tino Iutaia. 25 Ne kote ne au latou kae fakamalaia atu latou kae ‵kini a nisi tāgata+ kae unu kea‵tea olotou laulu kae fai ke tauto latou i mua o te Atua: “E se ‵tau o tuku atu ne koutou otou tama fāfine ki olotou tama tāgata, kae e se ‵tau o talia ne koutou a olotou tama fāfine ki otou tama tāgata io me ki a koutou eiloa.+ 26 E a, e se ko te mea foki tenei ne agasala ei a te tupu o Isalaelu ko Solomona? E seai se tupu i fenua e uke e ‵pau mo ia;+ kae ne alofa tena Atua ki a ia,+ tenā ne fai ei a ia ne te Atua ke fai mo tupu i Isalaelu kātoa. Kae ko ana avaga mai fenua fakaa‵tea ne fai ne latou a ia ke agasala.+ 27 Ko oko loa i te faigata ke tali‵tonu matou me ne fai ne koutou te mea matagā tenei mai te otou sē fakamaoni ki te ‵tou Atua kae a‵vaga ki fāfine mai fenua fakaa‵tea!”+

28 E tokotasi te tama tagata a Ioiata+ te tama tagata a Eliasipa+ ne avaga ki te tama fafine a Sanipalata+ te tino Holono. Ne afuli ne au a ia kea‵tea mai i a au.

29 Ke masaua ne koe latou, e toku Atua, me ne fakalailai ne latou a te tofi fakafaitaulaga mo te feagaiga o te tofi fakafaitaulaga+ mo tino Levi.+

30 Kae ne faka‵ma ne au latou mai nisi mea lai‵lai katoa, kae ne tuku atu ne au a nisi tiute ki te kau faitaulaga mo tino Levi, ko tino taki tokotasi ki tena taviniga,+ 31 kae fai se fakatokaga ke aumai a fafie+ i te taimi tonu mo fuataga muamua kolā e ‵pala ‵lei.

Ke masaua faeloa ne koe au e toku Atua.+