Famasino

9 Fakamuli loa, ne fano a Apimeleko+ te tama tagata a Ielupaala ki tuagane o tena mātua i Sekema, kae ne fai atu ki a latou mo kāiga katoa o tena tupuna tagata:* 2 “Fakamolemole, fesili aka ki takitaki* katoa o Sekema, ‘Tefea e ‵lei atu ki a koutou, ko tama tāgata katoa e toko 70 a Ielupaala+ ke pule i luga i a koutou io me se tagata fua e tokotasi ke pule ki luga i a koutou? Kae masaua me i a au ko te otou ivi mo te otou ‵kano.’”*

3 Tenā ne fai atu ei ne tuagane o tena mātua a pati konei ki takitaki katoa o Sekema, kae ne ma‵nako eiloa latou o tau‵tali i a Apimeleko, me ne fai aka latou: “A ia ko te motou taina eiloa.” 4 Tenā ne avatu ei ne latou ki a ia e 70 tupe siliva mai te fale* o Paala-pelita,+ kae ne fakaaoga ne Apimeleko ke ‵togi ki ei a tāgata ma‵sei kae e se aoga ke olo fakatasi mo ia. 5 Oti aka, fanatu ei a ia ki te fale o tena tamana i Ofala+ kae tamate ana taina,+ ko tama tāgata a Ielupaala, e toko 70 tāgata i luga i se fatu e tasi. A te tino fua ne sao mai i ei ko Iotama, te toekimuli tagata a Ielupaala, me ne ‵muni a ia.

6 Tenā ne maopoopo fakatasi ei a takitaki katoa o Sekema mo Petamilo kātoa kae fai ne latou a Apimeleko mo fai te lotou tupu,+ e pili ki te lakau lasi, i tafa o te pou i Sekema.

7 I te taimi ne fakailoa atu ei ne latou te mea tenei ki a Iotama, ne fanatu fakavave a ia o tu i te taulu o te Mauga o Kelisima+ kae kalaga atu i se leo maluga ki a latou: “Faka‵logo mai ki a au, koutou takitaki o Sekema, kae ka fakalogo foki a te Atua ki a koutou.

8 “I te aso e tasi, ne olo atu a lakau o fakasopo se tupu ke pule i a latou. Tenā ne fai atu ei latou ki te lakau ko te olive, ‘Vau o pule i a matou.’+ 9 Kae ne fai atu te lakau ko te olive ki a latou, ‘E a, ka tiaki ne au oku sinu* kolā e fakaaoga ne latou ke fakaaloalo atu ki te Atua mo tino, ke fanatu au o gasuesue i luga i nisi lakau?’ 10 Tenā ne fai atu ei a lakau ki te mati, ‘Vau o pule i a matou.’ 11 Kae ne fai atu a te lakau ko te mati ki a latou, ‘E a, ka tiaki ne au a oku fuaga ma‵galo mo oku fuagalakau ‵lei ke fanatu au o gasuesue i luga i nisi lakau?’ 12 Oti aka, fai atu ei a lakau ki te vine, ‘Vau o pule i a matou.’ 13 Ne tali atu te vine ki a latou, ‘E a, ka tiaki ne au oku uaina ‵fou kolā e fai ne latou te Atua mo tino ke fia‵fia kae ke fanatu au o gasuesue i luga i nisi lakau?’ 14 Fakamuli loa, ne fai atu a lakau ki te lakau talatala, ‘Vau o pule i a matou.’+ 15 Ne fai atu a te lakau talatala ki lakau konā, ‘Kafai e ma‵nako eiloa koutou o fakasopo au ke fai mo tupu o koutou, o‵mai la o faka‵lafi mai lalo i oku malūga. Kafai e se o‵mai koutou, ko te afi eiloa ka oso atu mai te lakau talatala o ‵sunu a alasi o Lepanona.’

16 “Nei la, e mata, ne gasue‵sue eiloa koutou mo te fakamaoni mo te āva o fai a Apimeleko mo fai te tupu,+ e mata, ne fakaasi atu ne koutou a te aga‵lei ki a Ielupaala mo tino o tena kāiga, kae e mata, ne fai ne koutou ki a ia a mea kolā e ‵tau o fai ki a ia? 17 I te taimi ne taua atu ei toku tamana mō koutou,+ ne talia ne ia ke tu tena ola i se tulaga fakamataku ke faka‵sao koutou mai lima o tino Mitiana.+ 18 Kae i te aso nei, ko ‵tu aka koutou o ‵teke ki te kāiga o toku tamana kae tamate ana tama tāgata, e toko 70 tāgata i luga i se fatu e tasi.+ Tenā ne fai ei ne koutou a Apimeleko, te tama tagata a tena pologa fafine,+ ke fai mo tupu i luga i takitaki o Sekema ona fua ko ia ko te otou taina. 19 Ao, kafai koutou e gasue‵sue mo te fakamaoni mo te āva ki a Ielupaala mo tena kāiga i te aso nei, ke fia‵fia koutou ki a Apimeleko kae ke fiafia foki a ia ki a koutou. 20 Kafai e se penā, ke oso atu eiloa te afi mai i a Apimeleko o ‵sunu a takitaki o Sekema mo Petamilo,+ kae ke oso atu foki te afi mai takitaki o Sekema mo Petamilo o ‵sunu a Apimeleko.”+

21 Tenā ko Iotama+ eiloa ko tele ki Pia, kae nofo tou tagata i konā me i a ia e mataku i tena taina ko Apimeleko.

22 Ne pule a Apimeleko i Isalaelu i tausaga e tolu. 23 Tenā ne fai ei ne te Atua ke sae aka se kinauga* i te va o Apimeleko mo takitaki o Sekema, kae ne fakatogafiti ne latou a Apimeleko. 24 Ne tupu te mea tenei ko te mea ke taui atu a faifaiga fakasaua kolā ne fai ki tama tāgata e toko 70 a Ielupaala, ko te mea ke ‵losi atu a toto o latou ki te lotou taina ko Apimeleko mō te tamatega o latou+ mo takitaki foki o Sekema me ne fesoasoani atu latou ki a ia i te tamatega o ana taina. 25 Tenā ne fai ei ne takitaki o Sekema ke olo atu ne tāgata o ‵muni kae ke alamati ne latou a ia i luga i mauga, kae ke kaisoa ne latou a mea katoa a tino kolā e olo atu i te auala tenā. Fakamuli loa, ne fakailoa atu a te mea tenei ki a Apimeleko.

26 Tenā ne olo atu ei Kaala, te tama tagata a Epeto fakatasi mo ana taina ki te suā feitu ki Sekema,+ kae ne tali‵tonu eiloa a takitaki o Sekema ki a ia. 27 Ne olo latou ki te fatoaga kae ‵kati mai a vine mai olotou togavine, ne lakalaka ne latou, kae fai se ‵kaiga fiafia, oti aka olo ei ki loto i te fale o te lotou atua+ o ‵kai kae inu kae fai a pati sē ‵lei ki a Apimeleko. 28 Tenā ne fai aka ei a Kaala te tama tagata a Epeto: “Ko oi a Apimeleko, kae ko oi a Sekema ke tavini atu tatou ki a ia? E a, e se ko ia te tama tagata a Ielupaala,+ kae e a, e se ko Sepula tena komisina? Tavini atu ki tāgata o Hamola te tamana o Sekema! Kaia e ‵tau ei o tavini tatou ki a Apimeleko? 29 Moi fai ne ‵nofo a tino konei mai lalo i taku pule, ko leva ne fakatea ne au a Apimeleko.” Tenā ne fai atu ei a ia ki a Apimeleko: “Fakatokouke tau kautau kae vau ki tua.”

30 I te taimi ne logo ei a Sepula te pelenise o te fakai i pati a Kaala te tama tagata a Epeto, ne kaitaua malosi a ia. 31 Ne uga ‵funa* atu ne ia a avefekau ki a Apimeleko kae fai atu ki ei: “Kiloke! A Kaala te tama tagata a Epeto mo ana taina kolā ko ‵nofo nei i Sekema, kae konei e fakama‵losi ne latou a tino o te fakai ke taua atu ki a koe. 32 Nei la, olo atu koutou i te po, ko koe mo au tāgata, o ‵muni kae faka‵tali i te vao. 33 I te taimi eiloa e sae aka ei te la i te tafataeao, e ‵tau o ‵tu aka koutou o taua atu ki te fakai; kae kafai ko o‵mai a ia mo ana tāgata ki tua o taua atu ki a koutou, fai so se mea e mafai ne koutou o fai ke fakatakavale tou tagata.”

34 Tenā ne ‵tu aka ei a Apimeleko mo ana tino katoa i te po, kae olo atu i potukau e fa o ‵muni kae faka‵tali o taua atu ki Sekema. 35 I te taimi ne fanatu ei a Kaala te tama tagata a Epeto o tu i te mataloa o te fakai, ne ‵tu aka a Apimeleko mo ana tāgata mai olotou koga ‵muni. 36 I te taimi ne lavea ei ne Kaala a tino konā, ne fai atu a ia ki a Sepula: “Kiloke! E isi ne tino kolā e o‵mai mai luga i mauga.” Kae ne fai atu a Sepula ki a ia: “Koe na e kilo fua ki ata o mauga e pelā me ne tino.”

37 Fakamuli ifo, ne fai atu a Kaala: “Kiloke! E isi ne tino kolā e olo ifo mai te kogaloto o te fenua, kae ko te suā potukau e o‵mai i te auala mai te lakau lasi o Meonenima.” 38 Ne tali atu a Sepula ki a ia: “Kofea au pati fakamata‵mata ne fai, ‘Ko oi a Apimeleko ke tavini atu tatou ki a ia?’+ E a, e se ko tino konei ne ‵teke atu koe ki ei? Fano ki tua o taua atu ki a latou.”

39 Tenā ne ‵taki atu ei ne Kaala a takitaki o Sekema o taua atu ki a Apimeleko. 40 Ne afuli ne Apimeleko tou tagata, kae ko Kaala ne tele kea‵tea, kae tokouke a tino ne ‵mate i ei ke oko atu eiloa ki te mataloa o te fakai.

41 Ne nofo eiloa a Apimeleko i Aluma, kae ne afuli ne Sepula+ a Kaala mo ana taina kea‵tea mai Sekema. 42 I te suā aso, ne olo a tino ki tua mo te fakai, kae ne logo a Apimeleko i te mea tenā. 43 Ne puke ne ia tena kau kae vaevae ki potukau e tolu kae olo o ‵muni kae faka‵tali i te vao. I te taimi ne lavea ei ne ia a tino ko o‵mai ki tua mo te fakai, ne taua atu a ia kae tamate latou. 44 Ne ‵tele atu a Apimeleko mo tena kau ki mua o ‵tu i te mataloa o te fakai, kae ko ana potukau aka e lua ne taua atu ki tino i tua o te fakai kae tamate latou. 45 Ne taua atu a Apimeleko ki te fakai i te aso kātoa tenā kae puke ne ia. Ne tamate ne ia a tino i loto i ei, kae ofa ki lalo ne ia te fakai+ kae ‵ligi a masima ki te laukele.

46 I te taimi ne ‵logo ei a takitaki o te taoa o Sekema i te mea tenei, ne olo fakavave atu latou ki te potu malosi o te fale* o Eli-pelita.+ 47 I te taimi ne lipoti atu ei ki a Apimeleko me i takitaki katoa o te taoa o Sekema ko oti ne maopoopo fakatasi, 48 olo atu ei a Apimeleko mo ana tāgata katoa ki luga i te Mauga o Salimona. Ne puke ne Apimeleko se takū i tena lima kae ‵kati ki lalo se kaula o te lakau kae sau aka ki tena tuauma, kae fai atu ki ana tino: “Fai fakavave a te mea telā ne lavea ne koutou ne fai ne au!” 49 Tenā ne ‵kati ei ne tino katoa a kaula kae tau‵tali atu i a Apimeleko. Ne faka‵pale ne latou a kaula konā ki luga i te potu malosi kae ‵sunu a te potu malosi ki te afi. Tenā ne ‵mate ei a tino katoa i loto i te taoa o Sekema, e nofo ki se toko 1,000 tāgata mo fāfine i ei.

50 Tenā ne fano ei a Apimeleko ki Tepesa, ne taua atu a ia ki Tepesa kae puke ne ia. 51 E isi se taoa malosi i te kogaloto o te fakai, kae ne ‵tele a tāgata mo fāfine mo takitaki katoa o te fakai ki ei. Ne ‵loka ne latou kae ‵kake ki te taulu o te taoa. 52 Ne fano a Apimeleko ki te taoa o taua atu. Ne fanatu a ia ki te mataloa o te taoa ke ‵sunu ki te afi. 53 Kae tokotasi te fafine ne ‵pei ifo ne ia se fatu solo saito ki luga i te ulu o Apimeleko, ma‵fa ei tena ulu.+ 54 Ne kalaga fakavave tou tagata ki tena tavini telā e puke i ana meatau kae fai atu ki ei: “Tapale aka tau pelu o tamate au ke mo a ma fai aka latou e uiga ki a au penei, ‘Ne tamate a ia ne se fafine.’” Tenā ne ‵suki ei a ia ne tena tavini ki te pelu, mate atu ei a ia.

55 I te taimi ne lavea ei ne tāgata Isalaelu i a Apimeleko ko mate, ‵foki atu ei a latou katoa ki olotou fale. 56 Ne toe taui atu ne te Atua ki a Apimeleko a mea ma‵sei katoa ne fai ne ia ki tena tamana mai te tamatega ne ia ana taina e toko 70.+ 57 Ne toe taui atu foki ne te Atua ki tāgata Sekema a mea ma‵sei katoa ne fai ne latou. Tela la, ne oko atu eiloa ki a latou a mala kolā ne fai atu ne Iotama+ te tama tagata a Ielupaala+ ki a latou.