Esekielu

18 Kae ne toe oko mai te fekau a Ieova ki a au, ana muna: 2 “Se a te uiga o te faigamuna tenei e fai ne koutou i te fenua o Isalaelu, ‘A tamana ne ‵kai i fuagavine ‵kona, kae ne kalili i ei a nifo o olotou tama’?+

3 “‘E pelā eiloa mo au e ola,’ ko te folafolaga a te Aliki Sili ko Ieova, ‘a koutou ka se tumau i te fai atu faeloa o te faigamuna tenei i Isalaelu. 4 Kiloke! A ola katoa​—i a aku. A te ola o te tamana e pelā foki mo te ola o te tama​—i a aku. A te tino ola telā e agasala ko ia tenā ka mate.

5 “‘Kafai e isi se tagata amiotonu kae fai ne ia te mea tonu kae sao; 6 e se kai a ia ki taulaga ne ofo atu ki tupua i mauga;+ e se kilo aka a ia ki tupua fakatakalia‵lia* a te kāiga o Isalaelu; e se fakalailai ne ia te avaga a tena tuakoi+ io me ‵moe fakatauavaga mo se fafine e masaki fakafafine;+ 7 e se fai fakamasei ne ia se tino,+ kae fakafoki ne ia a te mea ne tuku atu ne te tino fakakaitalafu i se tautoga;+ e se kaisoa ne ia a mea a se tino,+ kae e tuku atu ne ia ana meakai ki te tino e fiakai+ kae pulou ne ia te tino e nofo fuafua ki se gatu;+ 8 e se fakapasene ne ia ana tupe io me fakakaitalafu ana tupe,+ kae e ‵kalo kea‵tea a ia mai te fai mea sē tonu;+ e fai ne ia te fakamasinoga tonu i te va o te tagata e tokotasi mo te suā tagata;+ 9 kae tumau a ia i te sasale i aku tulafono fakavae kae tausi ki ikuga o aku fakamasinoga ko te mea ke gasuesue a ia mo te fakamaoni. A te vaegā tagata penā e amiotonu kae ka tumau eiloa a ia i te ola,’+ ko te folafolaga a te Aliki Sili ko Ieova.

10 “‘Kae kafai ko fai a ia e pelā me se tamana o se tamaliki tagata telā e kaisoa+ io me tatino*+ io me fai ne ia a nisi mea aka penei 11 (e tiga eiloa e seki fai ne te tamana se mea e tasi i mea konei)​—e kai te tamaliki tenā ki taulaga ne ofo atu ki tupua i luga i mauga, e fakalailai ne ia te avaga a tena tuakoi, 12 e fai fakamasei ne ia a tino fakaa‵lofa mo tino ma‵tiva,+ e kaisoa, e se fakafoki ne ia te mea ne tauto a ia ki ei, e kilo aka ki tupua fakatakalia‵lia,+ e aofia i faifaiga fakatakalia‵lia,+ 13 e fakakaitalafu ana tupe kae fakapasene+​—a te tamaliki tagata tenā ka se tumau i te ola. Ona ko mea fakatakalia‵lia katoa konei ne fai ne ia, ka tamate eiloa a ia. Ka i luga eiloa i a ia ana toto.

14 “‘Kae kafai e isi se tama a te tamana telā ne lavea ne ia a agasala katoa ne fai ne tena tamana, kae faitalia me ne lavea ne ia a mea konā, e se fai eiloa ne ia a vaegā mea penā; 15 e se kai a ia ki taulaga ne ofo atu ki tupua i luga i mauga; e se kilo aka a ia ki tupua fakatakalia‵lia a te kāiga o Isalaelu; e se fakalailai ne ia te avaga a tena tuakoi; 16 e se fai fakamasei ne ia se tino; e se taofi ne ia se mea ne tuku atu ne te tino i se tautoga; e se kaisoa ne ia a mea a se tino; e tuku atu ne ia ana meakai ki te tino e fiakai kae pulou ne ia te tino e nofo fuafua ki se gatu; 17 e ‵kalo kea‵tea a ia mai te fakasauaga o tino ma‵tiva; e se fakakaitalafu ana tupe io me fakapasene ne ia; kae e tausi a ia ki ikuga o aku fakamasinoga kae sasale i aku tulafono fakavae. A te vaegā tagata penā ka se mate ona ko te mea ‵se a tena tamana. Ka tumau eiloa a ia i te ola. 18 Kae ona ko tena tamana ne aofia i faifaiga ‵loi, ne kaisoa ne ia a mea a tena taina, kae fai a mea sē ‵lei i tena fenua, ka mate eiloa a ia ona ko ana mea ‵se.

19 “‘Kae ka fai mai koe: “Kaia e se agasala ei te tamaliki tagata ona ko te mea ‵se a tena tamana?” Ona ko te tamaliki tagata ne fai ne ia te mea tonu kae amiotonu, ne tausi ki aku tulafono fakavae katoa kae fakalogo ki ei, ka tumau eiloa a ia i te ola.+ 20 A te tino ola telā e agasala ko ia tenā e mate.+ A te tamaliki tagata ka se agasala ona ko te mea ‵se a tena tamana, kae ko te tamana ka se agasala ona ko te mea ‵se a tena tamaliki tagata. A te amiotonu o te tino amiotonu ka taui atu eiloa ki a ia tokotasi, kae ko amioga ma‵sei a te tino amio masei ka taui atu eiloa ki a ia tokotasi.+

21 “‘Kafai e ‵fuli kea‵tea se tino amio masei mai i agasala katoa ne fai ne ia kae tausi ki aku tulafono fakavae kae fai a te mea tonu kae amiotonu, ka tumau eiloa a ia i te ola. Ka se mate eiloa a ia.+ 22 Ka se masaua eiloa ana amioga solitulafono kolā ne fai ne ia.+ Ka tumau a ia i te ola ona ko te faiga o te amiotonu.’+

23 “‘E a, e fiafia au māfai ko mate se tino amio masei?’+ ko te folafolaga a te Aliki Sili ko Ieova. ‘E a, e se sili atu te ‵lei ki a au māfai ko ‵fuli kea‵tea a ia mai i ana auala kae tumau i te ola?’+

24 “‘Kae kafai e tiaki ne se tino amiotonu a tena amiotonu kae fai a te mea ‵se, kae fai a mea fakatakalia‵lia katoa kolā e fai ne tino amio ma‵sei, e a, ka ola a ia? E seai eiloa se faifaiga amiotonu ne fai ne ia ka masaua atu.+ Mai i tena sē fakamaoni mo te agasala ne fai ne ia, ka mate eiloa a ia.+

25 “‘Kae ka fai mai koutou: “A te auala o Ieova e se tonu.”+ Fakamolemole, ke na faka‵logo mai, e te kāiga o Isalaelu! E mata, ko oku auala eiloa e se ‵tonu?+ E a, e se ko otou auala e se ‵tonu?+

26 “‘Kafai e tiaki ne se tino amiotonu a tena amiotonu kae fai a te mea ‵se kae mate ona ko te mea tenā, ka mate eiloa a ia ona ko tena mea ‵se.

27 “‘Kae kafai e ‵fuli kea‵tea se tino amio masei mai amioga ma‵sei ne fai ne ia kae kamata o fai ne ia te mea tonu kae amiotonu, ka fakasao eiloa ne ia tena ola.+ 28 Kafai e iloa ne ia ana amioga solitulafono katoa kolā ne fai kae ‵fuli kea‵tea mai i ei, ka tumau eiloa a ia i te ola. Ka se mate eiloa a ia.

29 “‘Kae ka fai mai a te kāiga o Isalaelu: “A te auala o Ieova e se tonu.” E mata, ko oku auala eiloa e se ‵tonu, e te kāiga o Isalaelu?+ E a, e se ko otou auala e se ‵tonu?’

30 “‘Tela la, ka fakamasino ne au a tino taki tokotasi e ‵tusa mo olotou auala,+ e te kāiga o Isalaelu,’ ko te folafolaga a te Aliki Sili ko Ieova. ‘‵Fuli kea‵tea, ao, ‵fuli katoatoa kea‵tea mai i otou amioga solitulafono katoa, ko te mea ke se fai pelā me se fatu faka‵siga tino telā e aumai ne ia te agasala ki luga i a koutou. 31 ‵Pei kea‵tea a amioga solitulafono katoa kolā ne fai ne koutou+ kae ke na maua eiloa se loto fou mo se agaga fou,+ me kaia e ‵tau ei koutou o ‵mate,+ e te kāiga o Isalaelu?’

32 “‘Au e se fiafia māfai ko mate se tino,’+ ko te folafolaga a te Aliki Sili ko Ieova. ‘Tela la, ke na ‵fuli mai ke ola koutou.’”+