Te Muamua Tupu

16 Ne oko mai te fakatonuga a Ieova ki a Ieu+ te tama tagata a Hanani+ e uiga ki a Paasa, ana muna: 2 “Ne fakatu aka ne au a koe mai te ‵pefu kae fai koe mo takitaki o oku tino Isalaelu,+ kae ko koe ne tumau i te sasale i auala o Ielopoamo kae fai ne koe oku tino Isalaelu ke agasala ko te mea ke kaitaua au ona ko olotou agasala.+ 3 Tela la, ka ‵teu faka‵ma ne au a Paasa mo tena kāiga, kae ka fai ne au tena kāiga e pelā mo te kāiga o Ielopoamo+ te tama tagata a Nepata. 4 So se tino i te kāiga o Paasa e mate i te fakai ka kai ne kuli; kae ko so se tino o tena kāiga e mate i te vao ka kai ne manu eva o te lagi.”

5 Kae ko te tala fakasolopito kātoa o Paasa, ko mea ne fai ne ia mo tena malosi, e a, e se tusi katoa i te tusi o tala fakasolopito i taimi o tupu o Isalaelu? 6 Tenā ne takato ifo ei a Paasa o malō‵lo fakatasi mo ana tupuga kae ne tanu i Tilesa;+ kae ko tena tama tagata ko Ela ne fai mo tupu e sui ei a ia. 7 E auala foki i te pelofeta ko Ieu te tama tagata a Hanani, ne oko mai ei ki a ia te fakatonuga a Ieova e uiga ki a Paasa mo tena kāiga, ona ko mea ma‵sei katoa ne fai ne ia i te kilokiloga a Ieova mai te faiga ke kaitaua a ia e auala i ana galuega, kae fai ei a ia e pelā mo te kāiga o Ielopoamo, kae ona foki ko te tamatega ne ia o tou tagata.*+

8 I te 26 tausaga o te pulega a te tupu o Iuta ko Asa, ne fai ei a Ela te tama tagata a Paasa mo tupu i Isalaelu i Tilesa, kae ne pule a ia i tausaga e lua. 9 A tena tavini ko Semeli, te takitaki o te āfa o tena kautau i kaliota, ne fakatogafiti ne ia a tou tagata i te taimi ne inu malosi ei a ia ke konā i Tilesa i te fale o Alasa, telā ne pule atu ki te kāiga o te tupu i Tilesa. 10 Ne vau a Semeli ki loto kae ta ne ia+ a tou tagata ke mate i te 27 o tausaga o te pulega a te tupu o Iuta ko Asa, kae ne fai ei a ia mo tupu e sui ei a ia. 11 I te taimi ne fai ei a ia mo tupu, kae i te taimi eiloa ne sagasaga ifo ei a ia ki tena nofogaaliki, ne tamate ne ia a te kāiga kātoa o Paasa. E seai eiloa se tagata ne fakasao ne ia, faitalia me ko ana kāiga* io me ko ana taugasoa. 12 Tenā ne ‵ta fakapalele ei ne Semeli a te kāiga kātoa o Paasa, e ‵tusa mo te fakatonuga a Ieova e uiga ki a Paasa e auala i te pelofeta ko Ieu.+ 13 Ne tupu te mea tenei ona ko agasala katoa kolā ne fai ne Paasa mo tena tama ko Ela mo agasala kolā ne fai ei ne lāua a tino Isalaelu ke agasala kae fai ei ke kaitaua a Ieova te Atua o Isalaelu ona ko olotou tupua sē aoga.+ 14 Kae ko te tala fakasolopito kātoa o Ela, ana mea katoa ne fai, e a, e se tusi katoa i te tusi o tala fakasolopito i taimi o tupu o Isalaelu?

15 I te 27  tausaga o te pulega a te tupu o Iuta ko Asa, ne fai ei a Semeli mo tupu i aso e fitu i Tilesa i te taimi ne olo atu ei te kautau o taua ki Kipetoni,+ se fakai o tino Filisitia. 16 Fakamuli ifo, ne ‵logo a te kautau kolā ne olo o taua i te tala tenei: “A Semeli ne fakatogafiti kae tamate ne ia te tupu.” Tenā ne fai ei ne Isalaelu kātoa a Omeli,+ te takitaki o te kautau, mo fai te tupu i Isalaelu kātoa i te aso tenā i te koga e ‵nofo latou i ei i te taua. 17 Ne olo atu a Omeli mo Isalaelu kātoa mai Kipetoni kae nikoi ne latou a Tilesa. 18 I te laveaga ne Semeli me ko oti ne puke te fakai, ne fanatu a ia ki loto i te taoa malosi i te fale* o te tupu kae ‵sunu ne ia ki lalo a te fale tenā mai luga i a ia, kae ne mate ei a ia.+ 19 Ne tupu te mea tenei ona ko agasala kolā ne fai ne ia mai te faiga o mea ma‵sei i te kilokiloga a Ieova mai te sasale i auala o Ielopoamo mo agasala kolā ne fai ei a tino Isalaelu ke agasala.+ 20 Kae ko te tala fakasolopito kātoa o Semeli mo tena togafiti ne fai, e a, e se tusi katoa i te tusi o tala fakasolopito i taimi o tupu o Isalaelu?

21 Ko te taimi tenā ne vaelua i ei a tino Isalaelu ki potukau e lua. A te potukau e tasi ne tau‵tali atu i a Tipeni te tama tagata a Kinata, telā ne manako ke fai a ia mo tupu, kae ko te suā potukau ne tau‵tali atu i a Omeli. 22 Kae ko tino kolā ne tau‵tali i a Omeli ne manumalo i tino kolā ne tau‵tali i a Tipeni te tama tagata a Kinata. Tenā ne mate ei a Tipeni kae ne fai a Omeli mo fai te tupu.

23 I te 3 1 tausaga o te pulega a te tupu o Iuta ko Asa, ne fai a Omeli mo fai te tupu o Isalaelu, kae ne pule atu a ia ki ei i tausaga e 12. Ne pule a ia ki Tilesa i tausaga e ono. 24 Ne ‵togi ne ia te mauga o Samalia mai i a Someli ki taleni* siliva e lua, kae ne faite ne ia se fakai i luga i te mauga tenā. Ne fakaigoa ne ia te fakai telā ne faite ne ia ki a Samalia,*+ me ko te igoa o Someli te tino i o ia te mauga. 25 Ne fai faeloa ne Omeli a mea ma‵sei i te kilokiloga a Ieova, kae ne masei atu a ia i lō tino katoa mai mua atu i a ia.+ 26 Ne sasale a ia i auala katoa o Ielopoamo te tama tagata a Nepata mo ana agasala kolā ne fai ei a tino Isalaelu ke agasala kae fai ei ke kaitaua a Ieova te Atua o Isalaelu ona ko olotou tupua sē aoga.+ 27 Kae ko te tala fakasolopito kātoa o Omeli mo ana mea ne fai mo tena malosi i te faiga o ana mea, e a, e se tusi katoa i te tusi o tala fakasolopito i taimi o tupu o Isalaelu? 28 Tenā ne takato ifo ei a Omeli o malō‵lo fakatasi mo ana tupuga kae tanu i Samalia; kae ko tena tama tagata ko Aapo+ ne fai mo tupu e sui ei a ia.

29 A Aapo te tama tagata a Omeli ne fai mo tupu o Isalaelu i te 38 tausaga o te tupu o Iuta ko Asa, kae ko Aapo te tama tagata a Omeli ne pule ki Isalaelu i Samalia+ i tausaga e 22. 30 Kae ko Aapo te tama tagata a Omeli ne sili atu te ma‵sei o ana mea ne fai i te kilokiloga a Ieova i lō tino katoa mai mua atu i a ia.+ 31 A te sasale atu i agasala a Ielopoamo+ te tama tagata a Nepata ne fai fua e pelā me se mea sē tāua ki a ia, ne fai ne ia a Iesepela+ te tama fafine a Etepala, te tupu o tino Saitonu+ mo fai tena avaga, kae kamata o tavini atu tou tagata ki a Paala+ kae ifo ki ei. 32 E se gata i ei, ne faite ne ia se fatafaitaulaga ki a Paala i te fale* o Paala+ telā ne faite ne ia i Samalia. 33 Ne faite foki ne Aapo a te pou lakau tapu.*+ E uke atu a mea ne fai ne Aapo ke kaitaua ei a Ieova te Atua o Isalaelu i lō tupu katoa o Isalaelu mai mua atu i a ia.

34 I aso o te pulega a Aapo, ne toe faite ne Ieli te tino Peteli a Ieliko. Ne mate a tena toekimua ko Apilamo i te faitega ne ia o tena fakavae, kae ne mate foki a tena toekimuli ko Sekupa i te faitega o ana mataloa, e ‵tusa eiloa mo te fakatonuga a Ieova ne fai e auala i a Iosua te tama tagata a Nuno.+