Te Lua Tupu

11 I te iloaga ne Atalia,+ te mātua o Aasaia, i tena tama tagata ko mate,+ ne tu aka tou fafine kae tamate katoa ne ia a tino i te kaigā tupu.*+ 2 Kae ko Ieosipa te tama fafine a te Tupu ko Iolama, te tuagane o Aasaia, ne puke ne ia a Ioasa+ te tama tagata a Aasaia kae ave ne ia kea‵tea mai i tama tāgata a te tupu kolā ka tamate, kae tausi a ia fakatasi mo tena nesi i te potu ‵moe tafa ki loto. Ne ‵funa ne latou a ia mai i a Atalia, tenā ne seki tamate ei a ia. 3 Ne ‵nofo a ia mo tou fafine i tausaga e ono o ‵muni i te fale o Ieova, kae ko Atalia ne pule ki te fenua.

4 I te fitu o tausaga, ne avatu te fekau a Ieoiata ki takitaki o taki tokoselau o leoleo a te tupu mo leoleo o te palesi+ ke o‵mai ki a ia i te fale o Ieova. Ne fai ne ia se feagaiga mo latou kae fai ke tauto latou ki ei i te fale o Ieova, tenā ne fakaasi atu ei ne ia ki a latou a te tama tagata a te tupu.+ 5 Ne fakatonu atu a ia ki a latou: “Tenei te mea e ‵tau o fai ne koutou: E tasi-vae-tolu o koutou ka ‵tu i te Sapati kae ka leoleo faka‵lei eiloa ne koutou a te fale* o te tupu,+ 6 a te suā tasi-vae-tolu ka ‵tu i te Mataloa o Fakavae, kae ko te suā tasi-vae-tolu ka ‵tu i te mataloa mai tua o leoleo o te palesi. A koutou ka fakasolosolo o leoleo a te fale. 7 A potukau e lua o koutou kolā e se ‵tu i te Sapati e ‵tau o leoleo faka‵lei ne latou te fale o Ieova o puipui te tupu. 8 E ‵tau o fakatamilo ne koutou te tupu i ana feitu katoa, ko tino taki tokotasi mo olotou meatau i olotou lima. So se tino e ulu mai ki loto i te laina o leoleo e ‵tau o tamate. Olo faeloa mo te tupu i so se koga e fano a ia ki ei.”*

9 Ne fai eiloa ne takitaki o taki tokoselau+ a mea kolā ne fakatonu atu ne Ieoiata te faitaulaga. Tenā ne puke ei ne tino taki tokotasi ana tāgata kolā e ‵tu i te Sapati, fakatasi mo latou kolā e se ‵tu i te Sapati, kae olo atu ki loto i a Ieoiata te faitaulaga.+ 10 Tenā ne tuku atu ei ne te faitaulaga ki takitaki o taki tokoselau a tao mo talita puku‵puku a te Tupu ko Tavita, kolā ne tuku i loto i te fale o Ieova. 11 Kae ko leoleo o te palesi+ ne ‵tu i olotou tulaga, mo olotou meatau i olotou lima, mai te feitu fakaatamai o te fale ke oko ki te feitu fakamaui o te fale, i tafa o te fatafaitaulaga+ mo te fale, o fakatamilo te tupu. 12 Tenā ne aumai ei ne Ieoiata a te tama tagata a te tupu+ ki tua kae tuku atu ki luga i a ia a te foualiki mo te Tusi o te Tulafono,*+ kae fai ne latou a ia mo tupu kae fakaeke a ia. Ne kamata o pati olotou lima kae fai atu: “Ke ola leva te tupu!”+

13 I te lagonaga ne Atalia a tino e ‵tele, ne vau fakavave a ia ki tino i te fale o Ieova.+ 14 Tenā ne lavea ei ne ia te tupu e tu i tafa o te pou e ‵tusa mo tuu masani.+ A takitaki mo tino faka‵tagi pu+ e ‵tu mai mo te tupu, kae ko tino katoa o te fenua ko oko eiloa i te fia‵fia kae faka‵tagi a pu. I konā eiloa ne saesae ne Atalia ana gatu kae kalaga atu: “Se togafiti! Se togafiti!” 15 Kae ne fakatonu atu a Ieoiata te faitaulaga ki takitaki o taki tokoselau,+ ko latou kolā ne faka‵sopo aka ke pule atu ki te kautau, kae fai atu ki a latou: “Puke tou fafine ki tua mai te laina o leoleo, kae kafai e isi se tino e tautali i a ia, tamate atu a ia ki te pelu!” Me ne fai atu te faitaulaga: “Sa tamate tou fafine i loto i te fale o Ieova.” 16 Ne puke ne latou tou fafine, kae i tena okoatuga ki te koga e ulu mai ei a solofanua ki te fale* o te tupu,+ tamate ei a ia i konā.

17 Tenā ne fai ei ne Ieoiata se feagaiga i te va o Ieova mo te tupu mo tino,+ me ka tumau latou i te fai pelā me ne tino o Ieova, kae ne fai foki ne ia se feagaiga i te va o te tupu mo tino.+ 18 Oti aka, ne o‵mai a tino katoa o te fenua ki te fale* o Paala kae ofa ki lalo ana fatafaitaulaga,+ tuki fakalikiliki ana fakatusa,+ kae tamate a Matana te faitaulaga a Paala+ i mua o fatafaitaulaga.

Tenā ne faka‵sopo ei ne te faitaulaga a ovasia ke tausi te fale o Ieova.+ 19 E se gata i ei, ne puke ne ia a takitaki o taki tokoselau,+ ko leoleo o te tupu, ko leoleo o te palesi,+ mo tino katoa o te fenua ke olo atu fakatasi mo te tupu mai te fale o Ieova o avatu ki te fale* o te tupu i te auala o te mataloa o leoleo o te palesi. Tenā ne sagasaga ei a ia i te nofogaaliki o tupu.+ 20 A tino katoa o te fenua ne fia‵fia kae ne filemu te fakai, me ko oti ne tamate ne latou a Atalia ki te pelu i te fale o te tupu.

21 Ko fitu a tausaga o Ioasa+ i te taimi ne fai ei a ia mo fai te tupu.+