Te Lua Tupu
12 I te fitu tausaga o te pulega a Ieu,+ ne fai a Ioasa+ mo fai te tupu, kae ne pule a ia i Ielusalema i tausaga e 40. A te igoa o tena mātua ko Sipea mai Pelesepa.+ 2 Ne fai faeloa ne Ioasa a te mea tonu i te kilokiloga a Ieova i aso katoa me ne akoako a ia ne Ieoiata te faitaulaga. 3 Kae ko koga ma‵luga+ ne seki fakaseai, kae ko tino koi ofo atu eiloa a taulaga kae fai ke fanaka te au mai te taulaga i luga i koga ma‵luga konā.
4 Ne fai atu a Ioasa ki te faitaulaga: “Puke a tupe katoa kolā ne aumai ki te fale o Ieova mo fai a taulaga tapu,+ ko tupe kolā e ‵tau o ‵togi mai ne tino taki tokotasi,+ ko tupe kolā e maua mai tino kolā ne fai olotou tautoga, mo tupe katoa kolā e tuku mai ne tino taki tokotasi mo olotou loto kātoa ki te fale o Ieova.+ 5 Ke puke ne faitaulaga a tupe mai tino kolā e fia fesoasoani* kae fakaaoga mo faka‵lei a mea ma‵sei o te fale, i so se koga e maua ei se mea masei.”*+
6 I te 23 tausaga o te pulega a te Tupu ko Ioasa ne seki faka‵lei eiloa ne faitaulaga a mea ma‵sei o te fale.+ 7 Ne ‵kami mai ne te Tupu ko Ioasa a Ieoiata+ te faitaulaga mo nisi faitaulaga kae fai atu ki a latou: “Kaia e se faka‵lei aka ei ne koutou a mea ma‵sei o te fale? Tela la, sa toe puke ne tupe mai tino fesoasoani seiloga ke fakaaoga a tupe konā mo faka‵lei a mea ma‵sei o te fale.”+ 8 Tenā ne lotoma‵lie ei a faitaulaga ke se toe puke ne tupe mai tino kae ke se pule atu foki latou ki te faka‵leiga o mea ma‵sei o te fale.
9 Ne puke ne Ieoiata se pokisi+ kae fakapu se pūga i te ‵pono kae tuku i tafa o te fatafaitaulaga i te feitu fakaatamai o te tino māfai e ulu ki loto i te fale o Ieova. Tenā te koga e tuku ei ne faitaulaga, kolā e fai pelā me ne tino tausi mataloa, a tupe katoa kolā e aumai ki loto i te fale o Ieova.+ 10 So se taimi e lavea ei ne latou me ko uke a tupe i te pokisi, e o‵mai te failautusi a te tupu fakatasi mo te faitaulaga sili o puke kae lau a tupe kolā ne aumai ki te fale o Ieova.+ 11 E tuku atu ne lāua a tupe kolā ko oti ne lau ki tino kolā ne ‵tofi ke onoono ki te faiga o te galuega i te fale o Ieova. Ko ‵togi atu ei ne latou ki tino e ga‵lue i te faiga o laupapa mo tino kolā e faite ne latou te fale o Ieova,+ 12 e pelā foki mo tino ‵poto i te faite mea ki fatu mo tino ‵kati fatu. Ne ‵togi foki ne latou a laupapa mo fatu kolā ko oti ne ‵kati mo toe faka‵lei a mea ma‵sei o te fale o Ieova kae fakaaoga a tupe mo ‵togi a nisi mea aka katoa mo faka‵lei a mea ma‵sei o te fale.
13 Kae e seai ne tupe mai tupe kolā ne aumai ki te fale o Ieova ne fakaaoga mo faite a pesini siliva, mea tamate moli, pōla, pu+ io me ko so se mea aka ne faite ki aulo io me ko siliva mō te fale o Ieova.+ 14 E tuku atu fua ne latou ki tino kolā e fai ne latou te galuega, kae faka‵lei ne latou ki ei a mea ma‵sei o te fale o Ieova. 15 E se fakamasino ne latou a tāgata kolā ne tuku ki ei a tupe ke tuku ki tino ga‵lue, me i a latou e fakatuagagina.+ 16 Kae ko tupe o taulaga mō mea ‵se+ mo tupe o taulaga mō agasala ne seki avatu ki te fale o Ieova; ne tuku ma faitaulaga.+
17 Ko te taimi tenā ne fanatu ei a Hasaeli+ te tupu o Sulia o taua ki Kata,+ puke ei ne ia, oti aka, fai ei tena fakaikuga ke taua atu ki Ielusalema.+ 18 I konā eiloa, ne puke ne te Tupu ko Ioasa o Iuta a taulaga tapu katoa kolā ne fakatapu ne ana tupuga ko Iosefatu, Iolama mo Aasaia, ko tupu o Iuta, e pelā foki mo tena taulaga tapu mo aulo katoa kolā ne maua atu i potu ‵teu koloa o te fale o Ieova mo te fale o te tupu, kae avatu a mea konā ki a Hasaeli te tupu o Sulia.+ Tenā ne fano ei a ia kea‵tea mai Ielusalema.
19 Kae ko te tala fakasolopito kātoa o Ioasa, ana mea katoa ne fai, e a, e se tusi katoa i te tusi o tala fakasolopito i taimi o tupu o Iuta? 20 Kae ne ‵kau atu ana tavini o fakatogafiti a ia+ kae ta ne latou a Ioasa i te fale o te Koga Maluga,+ i te auala telā e fanaifo ki Siila. 21 A tena tavini ko Iosaka te tama tagata a Simeata mo Ieosepata te tama tagata a Siomeli ne ta ne lāua tou tagata kae tamate.+ Ne tanu ne latou a ia fakatasi mo ana tupuga i te Fakai o Tavita, kae ko tena tama tagata ko Amasia ne fai mo tupu e sui ei a ia.+