Te Muamua Tupu

18 Mai tua ifo, i te tolu o tausaga,+ ne oko atu ei te fakatonuga a Ieova ki a Elia, ana muna: “Fano ki a Aapo, kae ka fai ne au ke ‵to te vaiua ki te laukele.”+ 2 Tenā ne fano ei a Elia ki a Aapo, kae ko te oge ko oko eiloa i te malosi+ i Samalia.

3 I te taimi tenā, ne kalaga atu ei a Aapo ki a Opetaia telā ko te pule o te kāiga. (A Opetaia ne mataku malosi ki a Ieova, 4 kae i te taimi ne tamate ei ne Iesepela+ a pelofeta a Ieova, ne puke ne Opetaia a pelofeta e toko 100 kae faka‵muni ne ia e taki toko 50 i te ana, kae ne avatu faeloa ne ia a meakai mo vai ki a latou.) 5 Ne fai atu a Aapo ki a Opetaia: “Fano i loto i te fenua ki vaipuna katoa mo vanu katoa i ei. E se taumate e mafai o maua ne tatou a mouku e lava ke tausi ki ei a solofanua mo miula ko te mea ke se ‵mate a ‵tou manu katoa.” 6 Tenā ne vaevae ei i a lāua eiloa a laukele ka olo lāua i ei. Ne fano tokotasi a Aapo i te auala e tasi, kae ko Opetaia ne fano tokotasi i te suā auala.

7 I te auala o Opetaia, ne fakafetaui atu a Elia ki a ia. Ne lavea ne ia tou tagata kae totuli ifo mo ana mata e ‵fuli ki te lalo, ana muna: “Toku aliki ko Elia, e a, ko koe eiloa tenei?” + 8 Ne tali atu tou tagata: “Ko au eiloa. Fano o fai ki tou aliki: ‘A Elia tenei ko nofo i konei.’” 9 Kae ne fai atu a ia: “Se a taku agasala ne fai ko ala ei o tuku atu ne koe tau tavini ki a Aapo ke tamate? 10 E pelā eiloa mo Ieova e ola, e seai eiloa se atufenua io me se malo e seki oko ki ei a taumafaiga a toku aliki o ‵sala koe. Mai tua o te faimaiga a latou, ‘A ia e galo i konei,’ ne fai eiloa ne ia ke tauto mai a malo mo atufenua konā me e se mafai o maua ne latou a koe.+ 11 Kae nei ko fai mai koe, ‘Fano o fai ki tou aliki: “A Elia tenei ko nofo i konei.”’ 12 Kafai au ko fano kea‵tea mai i a koe, ko ave ei koe ne te agaga o Ieova+ ki se koga e se iloa ne au, kae kafai e fai atu ne au ki a Aapo kae e se maua ne ia koe, e mautinoa eiloa me ka tamate ne ia au. Kae ko tau tavini ne mataku faeloa ki a Ieova mai te taimi koi talavou ei. 13 E a, e seki fakailoa atu ki toku aliki a te mea ne fai ne au i te taimi ne tamate ei ne Iesepela a pelofeta a Ieova, mo te auala ne faka‵muni ei ne au a pelofeta e toko 100 a Ieova i potukau e taki toko 50 i se ana kae avatu faeloa ne au ki a latou a meakai mo vai?+ 14 Kae nei ko fai mai koe, ‘Fano o fai ki tou aliki: “A Elia tenei ko nofo i konei.”’ Ka tamate eiloa ne ia au.” 15 Kae ne fai atu a Elia: “E pelā eiloa mo Ieova o kautau telā e tavini au ki ei e ola, i te aso nei ka fano eiloa au ki a ia.”

16 Tenā ne fano ei a Opetaia o fakafetaui ki a Aapo kae fai atu ki ei te mea tenā, kae ne fano a Aapo o fakafetaui ki a Elia.

17 I te laveaga eiloa ne Aapo a Elia, ne fai atu a ia ki tou tagata: “E a, ko koe tenei, te tino ne aumai ne ia a fakalavelave e uke ki Isalaelu?”

18 Kae ne fai atu a ia: “Ne seki aumai ne au a fakalavelave ki Isalaelu, kae ko koe mo te kāiga o tou tamana, me ne tiakina ne koutou a fakatonuga a Ieova kae tau‵tali atu i a Paala.+ 19 Kae nei la, ‵kami mai a Isalaelu kātoa ki a au i te Mauga o Kalamelu+ fakatasi mo pelofeta e toko 450 a Paala mo pelofeta e toko 400 o te pou lakau tapu,*+ kolā e ‵kai i te taipola a Iesepela.” 20 Tenā ne uga atu ei te fekau a Aapo ki tino Isalaelu katoa kae fakamaopoopo mai a pelofeta ki te Mauga o Kalamelu.

21 Tenā ne fanatu ei a Elia ki tino katoa kae fai atu: “Ka pefea te leva e fakalotolotolua ei koutou i manatu kese‵kese e lua?”+ Kafai a Ieova ko te Atua tonu, tau‵tali i a ia;+ kafai ko Paala, tau‵tali i a ia!” Kae seai eiloa se tino ne tali atu ki a ia. 22 Ne fai atu a Elia ki tino konā: “Ko au tokotasi fua te pelofeta a Ieova e ‵toe,+ kae ko pelofeta a Paala e toko 450 tāgata. 23 Fai ke tuku mai ne latou ki a tatou ne tamā pulumakau tāgata e lua, kae fai ke filifili ne latou se tamā pulumakau tagata kae katikati ki vaega fo‵liki kae tuku ki luga i fafie, kae e se ‵tau o faka‵ka ne latou te afi ki ei. Ka fakatoka ne au te suā tamā pulumakau tagata, kae ka tuku ne au ki luga i fafie, kae ka se faka‵ka ne au te afi ki ei. 24 Tenā ko ka‵laga ei koutou ki te igoa o te otou atua,+ kae ka kalaga au ki te igoa o Ieova. A te Atua telā e tali mai e auala i se afi e fakaasi mai ei me i a ia ko te Atua tonu.”+ Kae ne tali atu a tino katoa: “A te mea e fai mai ne koe e ‵lei.”

25 Ne fai atu a Elia ki pelofeta a Paala: “Filifili aka se tamā pulumakau tagata e tasi kae fakatoka muamua ne koutou, me i a koutou e tokouke. Ka oti, ko ka‵laga atu ei ki te igoa o te otou atua, kae e se ‵tau o faka‵ka ne koutou te afi.” 26 Tenā ne puke ei ne latou te tamā pulumakau telā ne tuku atu ki a latou, kae fakatoka ne latou, kae ne ka‵laga atu faeloa latou ki te igoa o Paala mai te tafataeao ke oko ki te tutonu, olotou muna: “Paala, tali mai aka ki a matou!” Kae seai eiloa se leo kae seai foki se tino e tali mai.+ Ne ketu‵ketu eiloa latou fakatamilo i te fatafaitaulaga telā ne faite ne latou. 27 I te tutonu ne kamata a Elia o fakaitaita atu ki a latou, ana muna: “Ka‵laga atu i se leo maluga! A ia se atua!+ E se taumate e isi se mea e mafaufau ‵loto ki ei io me ko fano a ia ki ana tinae.* Io me kāti e tō tena moe kae e ‵tau o ‵fagu aka a ia ne se tino!” 28 Ne ka‵laga atu latou i se leo maluga kae katikati olotou foitino ki sīfi mo tao, e ‵tusa mo olotou tuu masani, ke oko ki te taimi ko ‵sali ei olotou toto ki luga i a latou. 29 Mai tua o te fakatutonu ne tumau eiloa latou i te faiga o olotou tāga* ke oko ki te taimi ko ofo atu ei te taulaga o meakai i te afiafi, kae seai eiloa se leo kae seai se tino e tali mai; e seai se tino e saga mai.+

30 E seki leva kae ne fai atu a Elia ki tino katoa: “Fakapili‵pili mai ki a au.” Tenā ne fakapili‵pili atu ei a tino ki a ia. Kae ne faite ne ia te fatafaitaulaga a Ieova telā ne ofa ki lalo.+ 31 Ne puke ne Elia a fatu e 12, e fetaui mo te aofaki o matakāiga o tama tāgata a Iakopo, telā ne oko mai i ei te fakatonuga a Ieova penei: “A Isalaelu ko tou igoa.”+ 32 Ne faite ne ia ki fatu se fatafaitaulaga+ i te igoa o Ieova. Oti aka, ne keli fakatamilo ne ia se lua i te fatafaitaulaga, i se lasi telā e lava ke ‵toki i ei e lua a sea* o fuaga. 33 Mai tua i ei, ne tukutuku faka‵lei ne ia a fafie, katikati te tamā pulumakau tagata ki vaega fo‵liki, kae tuku atu ki luga i fafie.+ Ne fai aka tou tagata: “Faka‵fonu a tiā ‵lasi e fa ki vai kae ‵ligi ki luga i te taulaga ‵sunu mo fafie.” 34 Ne toe fai atu a ia: “‵Toe tasi.” Tenā ne toe fai ei ne latou. Kae ne toe fai atu a ia: “Toe fai i te tolu o taimi.” Tenā ne fai ei ne latou i te tolu o taimi. 35 Kae ne ‵sali atu a vai fakatamilo i te fatafaitaulaga, kae faka‵fonu foki ne ia a te lua ki vai.

36 I te taimi ko ‵tau ei o ofo atu te taulaga meakai o te afiafi,+ ne vau te pelofeta ko Elia ki mua, kae fai atu: “Ieova te Atua o Apelaamo,+ Isaako+ mo Isalaelu, i te aso nei fai aka ke iloa ne tino i a koe ko te Atua o Isalaelu kae ko au ko tau tavini kae e auala i tau fakatonuga ne fai ei ne au a mea katoa konei.+ 37 Tali mai ki a au, e Ieova! Tali mai ki a au ko te mea ke iloa ne tino konei i a koe, e Ieova, ko te Atua tonu kae ko ‵fuli mai ne koe olotou loto ki a koe.”+

38 I konā loa, ko te afi eiloa a Ieova ko tō mai te lagi kae ne ‵ka i ei te taulaga ‵sunu,+ fafie, fatu mo ‵pefu, kae ne ‵miti aka foki i ei a vai i te lua.+ 39 I te laveaga ne tino katoa a te mea tenei, ne to‵tuli ifo latou mo olotou mata e ‵fuli ki lalo kae fai atu: “A Ieova ko te Atua tonu! A Ieova ko te Atua tonu!” 40 Tenā ne fai atu ei a Elia ki a latou: “Puke a pelofeta a Paala! Sa fakasao eiloa se pelofeta!” I konā ne puke ne latou a pelofeta, kae aumai ne Elia ki te vai o Kisona+ kae tamate latou katoa i konā.+

41 Ne fai atu a Elia ki a Aapo: “Fano ki luga, o kai kae inu, me ko lagona atu a te ‵gulu mai o te vaiua ‵lotu.”+ 42 Tenā ne fanaka ei a Aapo o kai kae inu, kae ko Elia ne fanaka ki te taulu o Kalamelu kae totuli ki te laukele, kae punou ifo ana mata i te va o ana tuli.+ 43 Ne fai atu a ia ki tena tavini: “Fano ki luga, kae kilo ki te feitu ki te tai.” Ne fanaka tou tagata kae kilo atu kae fai mai: “E seai se mea e lavea ne au.” E fitu taimi ne fai atu ei a Elia, “Toe foki.” 44 I te fitu o taimi ne fai mai tena tavini: “Kiloke! E isi se tamā kaumana e foliga mai pelā me se lima o se tagata e fanaka mai te tai.” Ne fai atu tou tagata: “Fano ki a Aapo kae fai atu ki ei, ‘Fakatoka te kaliota! Fanaifo ki lalo i a koe ma ‵lave i te vaiua ‵lotu!’” 45 I te taimi tenā, ne pouli te lagi i kaumana, ne agi te matagi, kae ne ‵to ‵lotu te vaiua;+ kae ne tele eiloa a Aapo i tena auala ki Ieseleelu.+ 46 Kae ne oko atu te ‵mana o Ieova ki a Elia, ne faka‵mau tena gatu ki ana kautega kae tele atu i mua o Aapo i te auala ki Ieseleelu.