Galuega a Apositolo
11 Ne ‵logo te kau apositolo mo taina kolā ne ‵nofo i Iuta me ko talia foki ne tino o fenua fakaa‵tea a te muna a te Atua. 2 Tela la, i te fanatuga a Petelu ki Ielusalema, ne fakamasei* a ia ne tino kolā e ‵lago ki te pilitome,+ 3 olotou muna: “A koe ne fano ki loto i te fale o tāgata e seki pilitome kae ‵kai fakatasi mo latou.” 4 Ona ko te mea tenā ne fakamatala atu ei ne Petelu a mea likiliki ki a latou, ana muna:
5 “Au ne nofo i te fakai ko Iopa o ‵talo i ei, kae ne lavea ne au i se fakaasiga se mea pelā me se laugatu lino lasi e tukutuku ifo i ana feitu e fa mai te lagi, kae ne tuku tonu ifo eiloa ki a au.+ 6 Ne kilo ‵tonu atu au ki loto i ei, lavea ei ne au a manu vae fa o te laukele, manu fe‵kai, manu ‵tolo mo manu eva o te lagi. 7 Ne lagona foki ne au se leo e fai mai penei ki a au, ‘Petelu, tu ki luga, ‵ta kae kai!’ 8 Kae ne fai atu au, ‘Ikai, e te Aliki, me ne seki faulu aka eiloa ki toku gutu se mea lailai io me se mea sē ‵ma penā.’ 9 Ne tali mai i te lua o taimi a te leo mai te lagi: ‘Sa toe taku ne koe me e lai‵lai a mea kolā ko oti ne faka‵ma ne te Atua.’ 10 Ne tupu foki te mea tenei i te tolu o taimi, kae ne toe avaka ei a mea katoa ki te lagi. 11 I te taimi foki eiloa tenā ne ‵tu mai ei a tāgata e tokotolu ki te fale telā ne ‵nofo ei matou, ne uga mai latou mai Kaisaleia ki a au.+ 12 Tenā ne fai mai ei te agaga ke fano au i a latou, kae ke mo a eiloa ma fakalotolotolua au. Kae ne olo foki matou mo taina e tokoono konei, kae ne ulu atu matou ki te fale o te tagata tenei.
13 “Ne fakailoa mai ne ia ki a matou a te laveaga ne ia a te agelu i loto i tena fale kae fai atu: ‘Uga atu ne tāgata ki Iopa ke aumai a Simona telā e fakaigoa foki ki a Petelu,+ 14 kae ka fai atu ne ia ki a koe a mea kolā ka mafai o faka‵sao ei koe mo tou kāiga kātoa.’ 15 Kae i te taimi ne kamata ei au o faipati, ne oko ifo te agaga tapu ki luga i tino konā e pelā eiloa mo te taimi ne oko mai ei ki a tatou i te kamataga.+ 16 I konā eiloa, ne masaua ei ne au a pati a te Aliki kolā e fai sāle: ‘A Ioane e papatiso ki te vai,+ kae ko koutou ka papatiso ki te agaga tapu.’+ 17 Tela la, kafai ne tuku atu ne te Atua ki a latou a te meaalofa faivasaga telā ne tuku mai foki ne ia ki a tatou kolā ne tali‵tonu ki te Aliki ko Iesu Keliso, ko oi la au ke ‵teke atu ki te Atua?”*+
18 I te lagonaga ne latou a mea konei, ne fakagata te lotou ‵teke atu, kae tavae atu latou ki te Atua, olotou muna: “Ko tuku atu foki ne te Atua te avanoaga ke sala‵mo a tino o fenua fakaa‵tea ko te mea ke maua ne latou a te ola.”+
19 A tino kolā ne salalau+ valevale ona ko puapuaga ne ‵sae aka i te mate o Setefano ne olo atu ki Foinikia, Kupelu mo Anitioka, kae ne folafola atu fua ne latou a te muna ki tino Iutaia.+ 20 Kae e isi ne tino i a latou, ne tāgata mai Kupelu mo Kulene ne olo atu ki Anitioka kae kamata o fai‵pati atu ki tino kolā e fai‵pati ki te ‵gana Eleni, o folafola atu te tala ‵lei e uiga ki te Aliki ko Iesu. 21 E se gata i ei, ne fakatasi atu a Ieova* ki a latou kae e tokouke a tino ne tali‵tonu kae ‵fuli mai ki te Aliki.+
22 Ne oko atu te tala e uiga ki a latou ki te fakapotopotoga i Ielusalema, kae ne uga atu ne latou a Panapa+ ki Anitioka. 23 I te taimi ne oko atu ei a ia kae lavea ne ia te alofa tauanoa o te Atua, ne fiafia malosi tou tagata kae kamata o fakamalosi atu ki a latou katoa ke ‵piki ‵mau ki te Aliki mo olotou loto kātoa;+ 24 me i a ia se tagata ‵lei kae e ‵fonu i te agaga tapu mo te fakatuanaki. Kae ne fakaopoopo atu ei a tino e tokouke ki te Aliki.+ 25 Tela la, fano ei a ia ki Taso o salasala ki a Saulo.+ 26 I te mauaga ne ia a Saulo, aumai ei ne ia ki Anitioka. Ne ‵nofo fakatasi lāua mo tino i te fakapotopotoga i te tausaga kātoa kae akoako atu ne lāua se vaitino i ei. Ne kamata i Anitioka o fakaigoa a soko ki Kelisiano,+ e ‵tusa eiloa mo te loto o te Atua.
27 I aso konā, ne olo sāle atu a pelofeta+ mai Ielusalema ki Anitioka. 28 Ne tu aka se tokotasi i a latou e igoa ki a Akapasi+ kae folafola mai e auala i te agaga tapu me ko pili o oko mai se oge lasi ki te lalolagi nofoaki kātoa,+ kae ne tupu eiloa te mea tenā i taimi o Kalaotia. 29 Ne fakaiku aka ne soko katoa ke avatu se fesoasoani+ ki taina kolā e ‵nofo i Iuta, e ‵tusa mo te mea e mafai ne latou taki tokotasi o tuku atu.+ 30 Ne fai eiloa ne latou a te mea tenā, kae ne avatu ne latou ki toeaina e auala i a Panapa mo Saulo.+