Ki a Filemoni

1 Au ko Paulo, se pagota+ mō Keliso Iesu, mo Timoteo+ te ‵tou taina, ki a Filemoni te ‵tou taina pele telā e ga‵lue fakatasi tatou, 2 mo Afia te mā tuagane, mo Akepasi+ te mā taina sotia mo te fakapotopotoga tenā i tou fale:+

3 Ke i luga i a koutou te alofa tauanoa mo te filemu mai te Atua te ‵tou Tamana mo te Aliki ko Iesu Keliso.

4 E fakafetai faeloa au ki toku Atua i taimi e faipati ei au e uiga ki a koe i aku ‵talo,+ 5 me e lagona faeloa ne au a tala e uiga ki tou fakatuanaki mo tou alofa ki te Aliki ko Iesu mo tino tapu katoa. 6 Au e ‵talo ko te mea ke fakamalosi aka koe ne te fakatuanaki telā e fakaasi atu ne koe ke matea ne koe a mea ‵lei katoa kolā e maua ne tatou e auala i a Keliso. 7 Me ne maua ne au te fiafia lasi mo fakamafanafanaga e uke i taku logoga i tala e uiga ki tou alofa, me ko oti ne toe fakamalosi aka a loto o tino tapu e auala i a koe, e toku taina.

8 Ona ko te pogai tenei, faitalia eiloa te lasi o toku saolotoga o faipati i te ‵kau fakatasi mo Keliso ke fakatonu koe ki te mea e ‵tau o fai, 9 i lō te fai penā, ona ko te alofa e fakatagi atu au ki a koe, me i a au, Paulo se toeaina matua, ao, ko fai foki nei pelā me se pagota mō Keliso Iesu. 10 E fakatagi atu au ki a koe mō taku tama ko Onosemu,+ telā ko oti ne fai au mo fai tena tamana+ i taku ‵peiga i te falepuipui. 11 Ne seki ai sena aoga ki a koe i aso mua kae nei ko aoga a ia ki a koe e pelā foki ki a au. 12 Ko uga atu ne au a ia ke toe foki atu ki a koe, ao a ia, ko toku fatu eiloa.*

13 E manako au o taofi a ia i konei ke fesoasoani mai ki a au ke sui ei koe i te taimi e ‵pei ei au i te falepuipui mō te tala ‵lei.+ 14 Kae e se manako au o fai so se mea e aunoa mo se taliaga mai i a koe, ko te mea ke fai ne koe te mea ‵lei tenā mo te lotomalie kae e se ko te faimālō.+ 15 Kāti tenā eiloa te pogai ne tiaki ei ne ia koe i se taimi toetoe,* ko te mea ke toe maua ne koe a ia ke oko eiloa ki te se-gata-mai, 16 e se pelā me se pologa+ kae ke sili aka i se pologa, e pelā me se taina pele,+ maise eiloa ki a au, kae e sili atu la ki a koe i te feitu faka-te-foitino mo te Aliki. 17 Tela la, kafai e manatu aka koe i a au se taugasoa, ke talia aka la ne koe a ia mo te atafai e pelā eiloa me ko au tenā. 18 E se gata i ei, kafai ne fai ne ia se mea masei io me e kaitalafu i a koe i so se mea, fakamau aka la te mea tenā ki toku igoa. 19 Au ko Paulo tenei e tusi atu i toku lima eiloa: Ka toe ‵togi atu eiloa ne au ki a koe​—e se fai atu ne au te mea tenei ona ko koe e kaitalafu foki i a au i tou ola. 20 Ao, e toku taina, e mafai o maua ne au te fesoasoani tenei mai i a koe i te ‵kau fakatasi mo te Aliki; fakamalosi aka toku loto i te ‵kau fakatasi mo Keliso.

21 Au e talitonu me ka fai eiloa ne koe te mea tenei, tela la, au e tusi atu mo te iloa me ka fai eiloa ne koe a mea e uke atu i lō mea kolā e fai atu ne au. 22 Kae i tafa o mea konā, fakatoka foki se koga mo oku nofo, i a au e fakamoemoe me e auala i otou talosaga ka toe fakafoki atu au ki a koutou.*+

23 Ko ‵moli atu alofaaga o Epafala,+ toku taina telā e ‵pei fakatasi māua i te falepuipui i te ‵kau fakatasi mo Keliso Iesu, 24 e pelā foki mo Maleko, Alitako,+ Tema+ mo Luka,+ ko oku taina e ga‵lue fakatasi matou.

25 Ke i luga i a koutou te alofa tauanoa o te Aliki ko Iesu Keliso i te agaga telā e fakaasi mai ne koutou.