Galuega a Apositolo
18 I te otiga o mea konei ne tiakina ne Paulo a Atenai kae fanatu ki Kolinito. 2 Kae ne fetaui a ia mo se tino Iutaia e igoa ki a Akuila,+ se tino mai Pono telā ne fatoa vau mai Italia fakatasi mo tena avaga ko Pisila, me ne fakatonu atu a te tupu ko Kalaotia ke olo kea‵tea a tino Iutaia katoa mai Loma. Ne fanatu a ia ki a lāua, 3 kae ne nofo i te lā fale, ne ga‵lue fakatasi latou me e ‵pau olotou galuega,+ ne tino faite faleie. 4 E lāuga* sāle a ia i loto i te sunako+ i sapati+ katoa kae fakamalosi atu ki tino Iutaia mo tino Eleni ke tali‵tonu.
5 I te okomaiga a Sila+ mo Timoteo+ mai Maketonia, ne saga malosi atu a Paulo o folafola a te muna, kae molimau atu foki ki tino Iutaia o fakatalitonu atu i a Iesu ko te Keliso.+ 6 Kae ona ko te lotou ‵teke kae muna ma‵sei atu faeloa ki a ia, ne tuetue ne ia ana gatu+ kae fai atu ki a latou: “Ke i luga i otou ulu otou toto.+ Au e ‵ma i ei.+ Mai te taimi tenei o fano ki mua ka fanatu eiloa au ki tino o fenua fakaa‵tea.”+ 7 Ne fano a ia mai konā* ki te fale o te tagata e igoa ki a Taitusi Tiasitasi, se tino e tapuaki ki te Atua, kae ko tena fale e pili ki te sunako. 8 Kae ko Kilipo,+ te ofisa tausi o te sunako, ne talitonu ki te Aliki fakatasi mo tena kaufale kātoa. Kae e tokouke a tino Kolinito kolā ne lagona ne latou a te muna ne tali‵tonu kae papatiso. 9 E se gata i ei, ne fai atu te Aliki ki a Paulo i te po e auala i se fakaasiga: “Sa mataku, kae faipati atu faeloa kae ke se ‵fiu eiloa koe i te talai atu, 10 me i a au e fakatasi atu ki a koe+ kae e seai se tino ka fakapakia ne ia koe, me e tokouke oku tino i te fakai tenei.” 11 Tenā ne nofo ei a ia i konā i te tausaga e tasi mo te ono masina, o akoako atu ki a latou a te muna a te Atua.
12 Kae koi fai a Kaliona mo kovana* o Akaia, ne taumafai malosi a tino Iutaia o ‵teke atu ki a Paulo kae ‵taki atu ne latou ki te fono fakamasino, 13 olotou muna: “A te tagata tenei e fakamalosi atu ki tino ke tapuaki ki te Atua i se auala telā e ‵teke ki te tulafono.” 14 Kae i te taimi ka faipati atu ei a Paulo, ne faipati atu a Kaliona ki tino Iutaia: “Tino Iutaia, kafai e tonu me e isi se mea ‵se io me se mea masei ‵ki ne fai ne ia, e toka eiloa au o fakalogologo ki otou fakamatalaga. 15 Kae kafai ne kinauga fua e uiga ki lāuga mo igoa mo te otou tulafono,+ e ‵tau eiloa o fai ne koutou. E se manako au o fakamasino a mea konei.” 16 Ona ko te mea tenā, ne afuli ei ne ia a latou ke olo kea‵tea mai te fono. 17 Ne puke ne latou a Sosene,+ te ofisa tausi o te sunako kae kamata o ‵kini ne latou a ia i mua o te fono. Kae ne seki fia saga atu eiloa a Kaliona ki mea katoa konei.
18 Mai tua o nai aso ne nofo ei a Paulo i konā, ne fakatofa atu a ia ki te kautaina, kae folau atu ki Sulia. Ne olo fakatasi latou mo Pisila mo Akuila, kae ne ‵kati ‵mutu ana laulu i Kenikelea+ ona ko tena tautoga. 19 Ne oko atu latou ki Efeso, tiaki ne ia a lāua i konā; kae ne ulu atu a ia ki loto i te sunako kae fakasako‵sako mo tino Iutaia i ei.+ 20 E tiga eiloa ne fakamolemole atu faeloa latou ke nofo mai a ia i se taimi tai leva, ne seki talia ne ia. 21 Ne fakatofa atu a ia ki a latou kae fai atu: “Au e toe foki mai ki a koutou, māfai e loto ki ei a Ieova.” Ne malaga atu a ia mai i Efeso 22 kae oko atu ki Kaisaleia. Ne fanatu a ia o fakafetaui ki tino i te fakapotopotoga, fanaifo ei ki Anitioka.+
23 Mai tua o se vaitaimi ne nofo ei a ia i konā, ne fanatu a ia ki kogā koga kese‵kese i loto i te fenua ko Kalatia mo Felukia+ o fakamalosi a soko katoa i ei.+
24 Ne oko atu ki Efeso a te tino Iutaia e igoa ki a Apolo,+ se tino mai i Alesania, se tagata poto i te faipati; kae e poto foki i muna mai Tusitusiga Tapu. 25 Ne akoakogina a te tagata tenei i auala o Ieova kae ona ko ia ne ‵fonu i te agaga tapu ne faipati kae akoako ‵tonu atu ne ia a mea e uiga ki a Iesu, kae ne masani fua a ia mo te papatisoga a Ioane. 26 Ne kamata tou tagata o faipati mo te loto toa i te sunako kae i te lagonaga ne Pisila mo Akuila+ a ia, ne puke ne lāua a tou tagata kae fakamatala faka‵lei atu ki a ia a auala o te Atua. 27 E se gata i ei, ona ko tou tagata ne manako o fano ki Akaia, ne tusi atu a taina ki te kau soko i konā kae fakatonu atu ke talimalo ne latou a ia. Tela la, i tena okoatuga ki konā, ne fesoasoani malosi a ia ki a latou kolā ko oti ne tali‵tonu ona ko te alofa tauanoa o te Atua; 28 me ne finau malosi a ia o fakamaoni katoatoa atu i mua o tino katoa a te ‵se o tino Iutaia, kae ne fakatalitonu atu foki ne ia mai i Tusitusiga Tapu me i a Iesu ko te Keliso.+