Salamo
71 Au ne faka‵lafi ki a koe e Ieova.
Ke mo a eiloa au e fakamasiasigina.+
2 I tou amiotonu, fakaola aka au kae fakasao mai au.
Tuku mai ou taliga* ki a au kae fakaola mai au.+
3 Ke fai koe mo fai toku kaupapa malosi
Telā e mafai o ulu atu faeloa au ki ei.
Fai aka se fakatonuga ke fakaola au,
Me i a koe ko toku kaupapa mo toku ‵pui malosi.+
4 Toku Atua, fakasao aka au mai te lima o te tino amio masei,+
Mai te lima o te tino fakasaua kae fai mea sē tonu.
5 Me i a koe ko toku fakamoemoega, e te Aliki Sili ko Ieova;
Au ne talitonu ki a koe* talu mai te taimi koi talavou ei au.+
6 Au ne fakalagolago ki a koe mai taku fanauga;
Ko koe ne puke ne koe au mai te moegatama o toku mātua.+
Au e ‵viki atu faeloa ki a koe.
7 Ko fai au e pelā me se vavega ki tino e tokouke,
Kae ko koe ko toku lafiga malosi.
8 A toku gutu ko ‵fonu i ou vikiga;+
I te aso kātoa e faipati au e uiga ki tou gali.
9 Sa ‵pei kea‵tea ne koe au i te taimi ko matua ei au;+
Sa tiaki ne koe au i te taimi ko fanaifo ei toku malosi.+
10 A oku fili e fai‵pati ‵teke mai ki a au,
Kae ko latou kolā e taumafai o tamate au e fai fakatasi olotou aofaga ‵funa,+
11 Olotou muna: “Ko tiaki a ia ne te Atua.
Afuli a ia kae puke mai, me ko seai se tino ke fakaola ne ia a ia.”+
12 Te Atua, sa faka‵mao faeloa mai i a au.
Toku Atua, fakavave o fesoasoani mai ki a au.+
13 A latou kolā e ‵teke mai ki a au
Ke fakamasiasi atu kae ‵mate.+
A latou kolā e salasala ki oku puapuaga
Ke ‵fonu i fakatauemuga mo te masiasi.+
14 Kae pelā mo au, ka faka‵tali faeloa au;
Ka fakaopoopo ne au ou vikiga.
15 Ka takutaku atu ne toku gutu a tou amiotonu,+
Ko au faifaiga faka‵sao tino i te aso kātoa,
16 Ka vau au o faipati e uiga ki au faifaiga ma‵losi,
E te Aliki Sili ko Ieova;
Ka fakailoa atu ne au tou amiotonu, ko koe tokotasi fua.
17 Te Atua, ne akoako ne koe au i te taimi koi talavou ei au,+
Kae ke oko mai ki te taimi nei koi folafola atu eiloa ne au a galuega fakaofoofogia a koe.+
18 Ke oko ki te taimi ko matua ei au kae ko sinā, e te Atua, sa tiaki mai au.+
Tuku mai ke fakailoa atu ne au ki te suā kautama e uiga ki tou ‵mana
Kae e uiga foki ki tou malosi ki tino katoa kolā ka o‵mai.+
19 A tou amiotonu, e te Atua, e oko atu eiloa ki koga ma‵luga;+
Ne fai ne koe a mea fakaofoofogia;
E te Atua, ko oi e ‵pau mo koe?+
20 E tiga eiloa ne fai ne koe au ke fepaki mo puapuaga mo fakalavelave e uke,+
Toe fakamalosi mai au;
21 Ke fakaopoopo ne koe toku sili
Kae ke fakatamilo kae fakamafanafana aka au.
22 Tenā ko tavae ei ne au koe ki mea fakatagi‵tagi e isi ne uka i ei
Ona ko tou fakamaoni, e toku Atua.+
Ka usu atu ne au ou vikiga ki te kitala,
E te Atua Tapu o Isalaelu.