Levitiko

17 Ne fai atu a Ieova ki a Mose: 2 “Faipati atu ki a Alona mo ana tama tāgata mo tino Isalaelu katoa, kae fai atu ki a latou, ‘Tenei te mea ne fakatonu mai ne Ieova:

3 “‘“Kafai e tamate ne se tagata Isalaelu se pulumakau tagata io me se tamā mamoe io me se kouti i loto i te fakai io me kafai e tamate ne ia i tua o te fakai, 4 kae e se aumai ki te mataloa o te faleie o maopoopoga ke ofo atu e pelā me se taulaga ki a Ieova i mua o te faleie tapu o Ieova, ko agasala a te tagata tenā i te fakamaligi toto. Ko oti ne fakamaligi ne ia a toto, kae e ‵tau o tapale kea‵tea* a te tagata tenā mai i ana tino. 5 E fai te mea tenei ko te mea ke aumai ne tino Isalaelu olotou taulaga kolā e ofo atu nei i koga i tua ki a Ieova, ki te mataloa o te faleie o maopoopoga, ki te faitaulaga. E ‵tau o ofo atu ne latou a mea konei e pelā me ne taulaga ‵kai fakatasi ki a Ieova.+ 6 Kae ka fakamatulutulu ne te faitaulaga te toto ki luga i te fatafaitaulaga a Ieova i te mataloa o te faleie o maopoopoga kae ‵sunu a gako ko te mea ke au e pelā me se mea manogi gali ki a Ieova.+ 7 Tela la, ko se ‵tau mo latou o ofo atu a taulaga ki temoni*+ kolā e foliga pelā me ne kouti, ko mea kolā ne tau‵tali latou i ei mo te sē fakamaoni.*+ Ka fai a te mea tenei e pelā me se tulafono fakavae tumau mō koutou, i otou kautama katoa.”’

8 “E ‵tau o fai atu koe ki a latou, ‘So se tagata Isalaelu io me ko so se tino fakaa‵tea e ‵nofo mo koutou telā ne ofo atu ne ia se taulaga ‵sunu io me se isi taulaga 9 kae e se aumai ne ia te mea tenā ki te mataloa o te faleie o maopoopoga ke ofo atu ki a Ieova e ‵tau o tapale kea‵tea* te tino tenā mai i ana tino.+

10 “‘Kafai e kai so se tagata Isalaelu io me se tino fakaa‵tea telā e ‵nofo mo koutou ki so se vaegā toto,+ ka ‵teke atu eiloa au ki te tagata telā e kai ki toto, kae ka tapale kea‵tea* ne au te tino tenā mai i ana tino. 11 Me i te ola o mea ola katoa ko te toto,+ kae ko oti ne tuku atu ne au ki te fatafaitaulaga+ ke fai ne koutou te faka‵māga mō koutou, me ko te toto eiloa e fai i ei te faka‵māga+ e auala i te ola telā i loto i ei. 12 Tenā te pogai ne fai atu ei au ki tino Isalaelu: “E seai se tino i a koutou e ‵tau o kai ki te toto, kae e seai se tino fakaa‵tea telā e ‵nofo mo koutou+ e ‵tau o kai ki te toto.”+

13 “‘Kafai e afuli ne se tino Isalaelu io me se tino fakaa‵tea telā e ‵nofo mo koutou, se manu i te vao io me se manu eva telā e mafai o kai kae ‵po ne ia, e ‵tau o fakasali ne ia te toto ki tua+ kae tanu ki one. 14 Me i te ola o mea ola katoa ko te toto me maua te ola i loto i ei. Kae ne fai atu au ki tino Isalaelu: “E se ‵tau mo koutou o ‵kai ki toto o so se mea ola, me i te ola o so se mea ola ko tena toto. So se tino e kai ki ei ka tapale kea‵tea.”*+ 15 Kafai e isi se tino, faitalia me se tino tonu o te fenua io me se tino fakaa‵tea, e kai ki se manu ne maua atu ko mate io me ne saesae ne se manu fekai,+ e ‵tau o ‵ta ne ia ana gatu, koukou ki vai, kae ka se ‵ma a ia ke oko ki te afiafi;+ tenā ko ‵ma ei a ia. 16 Kae kafai e se ‵ta ne ia ana gatu kae e se koukou foki, ka fakasala a ia ona ko tena mea ‵se ne fai.’”+