Esekielu
43 Tenā ne ave ei ne ia au ki te mataloa telā e ‵fuli ki te feitu ki saegala.+ 2 I konā loa, ne lavea ei ne au a te ‵malu o te Atua o Isalaelu e vau mai i te feitu ki saegala,+ kae ko tena leo e ‵pau eiloa mo te ‵tagi o vai e ‵tafe;+ kae ko te lalolagi ne maina eiloa i tena ‵malu.+ 3 A te mea ne lavea ne au e ‵pau eiloa mo te fakaasiga ne lavea ne au i te taimi ne vau ei au* o aumai te fakamaseiga ki te fakai, kae ne foliga e pelā mo te mea ne lavea ne au i tafa o te vaitafe ko Kepala;+ kae ne fakasiga ifo au mo oku mata e ‵fuli ki te laukele.
4 Tenā ne ulu atu ei te ‵malu o Ieova ki te faletapu* e auala i te mataloa telā e ‵fuli ki te feitu ki saegala.+ 5 Ne fakatu aka au ne se agaga kae aumai ne ia au ki loto i te koga ateatea tafa ki loto, kae ne lavea ne au me i te faletapu ko ‵fonu eiloa i te ‵malu o Ieova.+ 6 Tenā ne lagona ei ne au se tino e faipati mai ki a au mai i te faletapu, kae ne vau se tagata o tu i oku tafa.+ 7 Ana muna ki a au:
“Te tama a te tagata, tenei te koga o toku nofogaaliki+ mo te koga e tuku i ei oku alofivae,+ telā ka ‵nofo fakatasi ei au mo te fenua o Isalaelu ki te se-gata-mai.+ A te kāiga o Isalaelu ka se toe fakalailai ne latou toku igoa tapu,+ ko latou mo olotou tupu, e auala i olotou faifaiga talitāgata i te feitu faka-te-agaga kae e auala i foitino ‵mate o olotou tupu i te taimi e ‵mate ei latou. 8 Mai te tukuatuga o te lotou mataloa i tafa o toku mataloa mo te lotou pou mataloa i tafa o toku pou mataloa, kae se ‵pui fua e ‵vae i ei au mai i a latou,+ ne fakalailai ne latou toku igoa tapu e auala i mea fakatakalia‵lia ne fai ne latou, tenā ne fakaseai ei ne au latou i toku kaitaua.+ 9 Nei la, fai ki a latou ke ave ke ‵mao kea‵tea mai i a au olotou faifaiga talitāgata i te feitu faka-te-agaga mo foitino ‵mate o olotou tupu, kae ka ‵nofo fakatasi au mo latou ki te se-gata-mai.+
10 “E pelā mo koe e te tama a te tagata, fakamatala atu a te faletapu ki te kāiga o Isalaelu,+ ko te mea ke ‵ma latou ona ko olotou mea ‵se,+ kae e ‵tau mo latou o sukesuke faka‵lei a tena ata.* 11 Kafai ko ‵ma latou i olotou mea katoa ne fai, e ‵tau o fakailoa atu ne koe ki a latou a te ata o te fakatokaga o te fola o te faletapu, ana fakatokaga, ana mataloa ki tua, mo ana mataloa ki loto.+ Fakaasi atu ki a latou a te ata kātoa o te fakatokaga o te fola mo ana tulafono fakavae, te ata o te fakatokaga o te fola mo ana tulafono, kae tusi ki lalo a mea konā i mua o latou, ko te mea ke lavea ne latou a te ata kātoa o te fakatokaga o tena fola kae tau‵tali i ana tulafono fakavae.+ 12 Tenei te tulafono o te faletapu. A te kogā koga kātoa mai luga i te taulu o te mauga ko te ‵toe koga tafasili eiloa i te tapu.+ Kiloke! Tenei te tulafono o te faletapu.
13 “Tenei te fua o te fatafaitaulaga i kupita+ (a kupita takitasi e fakaopoopo atu ki ei te lauefa o se alofilima).* A tena tafito e tasi te kupita, kae tasi te kupita te lauefa. E isi se fusi e tele fakatamilo i ana tafatafa telā e tasi te aga* te lauefa. 14 Mai te koga tafa ki lalo o te fola ke oko ki te lela tafa ki lalo telā e fakatamilo i ei, e lua kupita, kae ko tena lauefa e tasi te kupita. Mai te lela foliki telā e fakatamilo i ei ke oko atu ki te lela lasi telā e fakatamilo i ei, e fa kupita, kae ko tena lauefa e tasi te kupita. 15 A te koga tafu afi o te fatafaitaulaga e fa kupita te maluga, kae e ‵tu aka mai i te koga tafu afi o te fatafaitaulaga a suki e fa.+ 16 A te koga tafu afi o te fatafaitaulaga e sikuea, e 12 kupita te loa kae 12 kupita te lauefa.+ 17 A feitu e fa o te lela telā e fakatamilo i ei, e 14 kupita te loa kae e 14 kupita te lauefa; kae ko te fusi telā e tele fakatamilo i ei, e āfa kupita, kae ko tena tafito e tasi te kupita i feitu katoa.
“Kae ko ana sitepu e ‵fuli ki te feitu ki saegala.”
18 Tenā ne fai mai ei a ia ki a au, “Te tama a te tagata, konei a pati a te Aliki Sili ko Ieova ne fai mai: ‘Konei a fakatonuga ke tautali i ei māfai ko faite te fatafaitaulaga, ko te mea ke mafai o ofo atu a taulaga ‵sunu kātoa kae ke fakamatulutulu atu a toto ki luga i ei.’+
19 “‘E ‵tau mo koe o tuku atu se tamā pulumakau tagata mai te lafu mo fai te taulaga mō agasala+ ki faitaulaga Levi mai i tama a Satoka,+ kolā ne o‵mai ke tavini mai ki a au,’ ko te folafolaga a te Aliki Sili ko Ieova. 20 E ‵tau o puke ne koe ne toto mai i ei kae nani atu ki luga i suki e fa o te fatafaitaulaga, ki luga i ‵kōna e fa o lela e fakatamilo i ei, mo te fusi telā e tele fakatamilo i ei, ko te mea ke faka‵ma i ei mai i te agasala kae ke fakatapu foki.+ 21 Tenā ko puke ei te tamā pulumakau, ko te taulaga mō agasala, ko te mea ke ‵sunu i te koga ne fakatoka i loto i te faletapu, i tua o te koga tapuaki.+ 22 I te lua o aso ka ofo atu ei ne koe se kouti tagata ‵lei e pelā me se taulaga mō agasala; kae ka faka‵ma ne latou te fatafaitaulaga mai i te agasala e pelā eiloa mo te faka‵māga ne latou mai i te agasala ki te tamā pulumakau.’
23 “‘Kafai ko oti ne faka‵ma ne koe te mea tenā mai i te agasala, ka ofo atu ne koe se tamā pulumakau tagata ‵lei mai i te lafu mo se mamoe tagata ‵lei mai te lafu mamoe. 24 E ‵tau mo koe o ofo atu a mea konā ki a Ieova, kae e ‵tau mo faitaulaga o ‵pei atu a masima ki luga i mea konā+ kae ofo atu e pelā me ne taulaga ‵sunu kātoa ki a Ieova. 25 I aso e fitu ka ofo atu ei ne koe se kouti tagata e pelā me se taulaga mō agasala i aso takitasi,+ e pelā foki mo te tamā pulumakau tagata mai te lafu mo te mamoe tagata mai te lafu mamoe; ka ofo atu ne koe a manu kolā e seai ne olotou pona.* 26 I aso e fitu e ‵tau mo latou o fai te faka‵māga mō te fatafaitaulaga, kae e ‵tau o ‵fulu ke ‵ma ne latou kae fakatapu. 27 Kafai ko palele a aso konā, i te valu o aso+ mo aso mai tua ifo i ei, ka ofo atu ne faitaulaga otou* taulaga ‵sunu kātoa mo taulaga ‵kai fakatasi i luga i te fatafaitaulaga; kae ka fiafia au ki a koutou,’+ ko te folafolaga a te Aliki Sili ko Ieova.”