Levitiko
5 “‘Kafai e agasala se tino me ne lagona ne ia se faka‵pulaga ke molimau atu*+ kae ko ia se molimau io me ne lavea io me iloa ne ia te mea tenā kae e se fakaasi ne ia, e ‵tau o fakasala a ia ona ko tena mea ‵se.
2 “‘Io me kafai e patele se tino ki so se mea sē ‵ma, faitalia me se foitino mate o se manu sē ‵ma o te vao, se manu lata sē ‵ma, io me se manu foliki sē ‵ma,+ ko lailai a ia kae ko agasala foki faitalia me e se iloa ne ia te mea tenā. 3 Io me kafai e patele se tino ki mea sē ‵ma+ o se tino kae e se iloa ne ia—so se mea sē ‵ma telā e mafai o fai ei ke se ‵ma a ia—kae ko iloa fakamuli ne ia, e agasala eiloa a ia.
4 “‘Io me kafai e tauto fakavave se tino ke fai ne ia se mea—ke fai se mea ‵lei io me ke fai se mea masei, faitalia me se a te mea tenā—kae e se iloa ne ia, kae iloa fakamuli aka ne ia me ne sonafai fakavave tena tautoga, e agasala eiloa a ia.*+
5 “‘Kafai ko agasala a ia i se mea e tasi o mea konei, e ‵tau mo ia o fakaasi+ te auala ne agasala ei a ia. 6 Ka aumai foki ne ia tena taulaga mō mea ‵se ki a Ieova ona ko te agasala ne fai ne ia,+ se manu fafine mai tena lafu, kāti se tamā mamoe fafine io me se tamā kouti fafine, ke fai mo fai te taulaga mō agasala. Tenā ko fai ei ne te faitaulaga te faka‵māga mō ia ona ko tena agasala.
7 “‘Kafai e se mafai o ofo atu ne ia se mamoe, e ‵tau o aumai ne ia ki a Ieova a lupe e lua io me ne punua lupe+ e lua mo fai tena taulaga mō mea ‵se ona ko tena agasala, e tasi mō te taulaga mō agasala kae e tasi mō te taulaga ‵sunu.+ 8 E ‵tau o aumai ne ia ki te faitaulaga, telā ka ofo muamua atu ne ia a te manu mō te taulaga mō agasala kae ‵sele ne ia tena ua e aunoa mo te ‵kati ke tō. 9 Ka fakamotimoti ne ia ne mu toto o te taulaga mō agasala ki te feitu e tasi o te fatafaitaulaga, kae ko te ‵toega o toto konā ka fakasali ki lalo o te fatafaitaulaga.+ A te mea tenā se taulaga mō agasala. 10 Ka fai ne ia te suā manu mo fai te taulaga ‵sunu e ‵tusa mo te faifaiga masani;+ kae ka fai ne te faitaulaga te faka‵māga mō ia ona ko te agasala telā ne fai ne ia, ko fakamagalo ei a ia.+
11 “‘Kafai e se mafai o ofo atu ne ia a lupe e lua io me ne punua lupe e lua e ‵tau o aumai ne ia te tasi-vae-sefulu o te efa*+ o falaoa ‵mata kae ‵lei mo fai te taulaga mō agasala. E se ‵tau o fakaopoopo atu ne ia ne sinu ki ei io me tuku atu ki luga i ei ne pulu lipano, me i te mea tenā se taulaga mō agasala. 12 Ka aumai ne ia a te mea tenā ki te faitaulaga, kae ka faka‵fonu ne te faitaulaga ana lima ki mea konā mo fai te taulaga o fakamasauaga kae ‵sunu ko te mea ke au i luga i te fatafaitaulaga mai luga o te taulaga a Ieova telā e ofo atu i luga i te afi. A te mea tenā se taulaga mō agasala. 13 Ka fai ne te faitaulaga te faka‵māga mō te tino tenā ona ko te agasala ne fai ne ia, so se agasala mai agasala konei, ko fakamagalo ei a ia.+ A te ‵toega o te taulaga tenā ka tuku atu ma te faitaulaga,+ e pelā eiloa mo te taulaga meakai.’”+
14 Ne toe faipati atu a Ieova ki a Mose, ana muna: 15 “Kafai ne seki fakamaoni se tino kae e se iloa ne ia me ne agasala a ia ki mea tapu a Ieova,+ e ‵tau o aumai ne ia ki a Ieova se mamoe ‵lei mai tena lafu ke fai mo fai tena taulaga mō mea ‵se;+ kae e ‵tau o ‵pau tena ‵togi mo te aofaki o sekela* siliva e ‵tusa mo te sekela masani i te koga tapu.*+ 16 Kae ka toe ‵togi atu ne ia a mea mō te agasala ne fai ne ia ki te koga tapu kae ka fakaopoopo atu ne ia te tasi-vae-lima o te ‵togi o te mea tenā.+ Ka tuku atu ne ia a te mea tenā ki te faitaulaga, ko te mea ke fai ne te faitaulaga te faka‵māga+ mō ia ki te mamoe o te taulaga mō mea ‵se, ko fakamagalo ei a ia.+
17 “Kafai e agasala se tino me ne fai ne ia se mea telā ne fakatonu atu a Ieova ke se fai, kae e se iloa ne ia te mea tenā, e agasala eiloa a ia kae ka fakasala a ia ona ko tena mea ‵se.+ 18 E ‵tau o aumai ne ia ki te faitaulaga se mamoe ‵lei mai tena lafu mamoe e ‵tusa mo te ‵togi e ‵tau ki ei, ke fai mo fai te taulaga mō mea ‵se.+ Tenā ko fai ei ne te faitaulaga se faka‵māga mō ia ona ko te mea ‵se ne fai ne ia kae e se iloa ne ia, ko fakamagalo ei a ia. 19 A te mea tenā se taulaga mō mea ‵se. E agasala eiloa a ia i mua o Ieova.”