Te Muamua Samuelu

13 A Saulo ko . . .* ana tausaga te matua i te taimi ne fai ei a ia mo tupu,+ kae ne pule a ia i Isalaelu i tausaga e lua. 2 Ne filifili ne Saulo a tāgata e toko 3,000 mai Isalaelu; e toko 2,000 ne olo mo Saulo ki Mekemase mo te koga maugā o Peteli kae toko 1,000 ne olo mo Ionatana+ ki Kipea+ i Peniamina. Ne uga atu ne ia te ‵toega o tino ke ‵foki ki olotou faleie. 3 Tenā ne ‵ta ei ne Ionatana a sotia Filisitia+ i Kepa,+ kae ne ‵logo a tino Filisitia i te mea tenā. Kae ne fai ne Saulo ke ili a pu+ i te fenua kātoa, kae fai atu: “Fai ke ‵logo a tino Epelu!” 4 Ne ‵logo a Isalaelu kātoa i te tala: “Ko oti ne ‵ta ne Saulo a sotia Filisitia, kae nei ko fai a Isalaelu e pelā me se mea fakatakalialia ki tino Filisitia.” Tenā ne fakatonu atu ei ki tino ke tau‵tali i a Saulo i Kilikala.+

5 Ne maopoopo fakatasi a tino Filisitia o taua atu ki tino Isalaelu, e 30,000 olotou kaliota tau kae toko 6,000 tāgata faka‵tele solofanua mo olotou kautau ko tokouke e pelā eiloa mo one i te tafatai;+ kae ne olo aka latou ki Mekemase i te feitu ki saegala o Petavene.+ 6 Kae ne lavea ne tāgata Isalaelu me ko isi se fakalavelave ki a latou ona ko te lotou puapuaga; tenā ne olo ei a tino o ‵muni i ana,+ i pūga, i kaupapa, i lua, mo vaikeli ‵masa. 7 Ne olo atu a nisi tino Epelu ki te suā feitu o te Iolitana ki te fenua o Kato mo Kileata.+ Kae ko Saulo koi nofo loa i Kilikala, kae ko tino katoa kolā ne tau‵tali atu i a ia ne pole‵pole i te ma‵taku. 8 Ne faka‵tali eiloa a ia i aso e fitu ke oko ki te taimi tonu telā ne fakatoka ne Samuelu, kae ko Samuelu e seki oko atu eiloa ki Kilikala, kae ko tino ko kamata o olo kea‵tea mai i a ia. 9 Fakamuli ifo, ne fai atu a Saulo: “Aumai ki a au te taulaga ‵sunu mo te taulaga ‵kai fakatasi.” Kae ofo atu ne ia te taulaga ‵sunu.+

10 Kae i te otiga eiloa ne ofo atu ne ia te taulaga ‵sunu, kae oko mai a Samuelu. Tenā ne fanatu ei a Saulo o fakafetaui ki a ia kae fakamanuia atu ki a ia. 11 Tenā ne fai atu ei a Samuelu: “Se a te mea ne fai ne koe?” Ne tali atu a Saulo: “Ne lavea ne au me ko tiaki au ne tino,+ kae ko koe ne seki oko mai i te taimi tonu, kae ko tino Filisitia ko maopoopo fakatasi i Mekemase.+ 12 Tenā ne fai ifo ei au, ‘I te taimi nei a tino Filisitia ko o‵mai o taua mai ki a au i Kilikala, kae e seki ‵sala eiloa au ki te fesoasoani o Ieova.’ Tenā ne mafaufau ei au me e ‵tau o ofo atu ne au te taulaga ‵sunu.”

13 I konā ne fai atu ei a Samuelu ki a Saulo: “Ko oti ne fai ne koe se mea valea. A koe ne seki fakalogo ki te fakatonuga ne tuku atu ne Ieova tou Atua ki a koe.+ Moi ne fakalogo koe, ko fai ne Ieova ke ‵mautakitaki tou malo i luga i Isalaelu ki te se-gata-mai. 14 Kae nei la, a tou malo ka se tumau.+ Ka ‵sala ne Ieova se tagata e loto a ia ki ei,+ kae ka ‵tofi aka ne Ieova a ia ke fai mo takitaki o ana tino,+ me i a koe e seki fakalogo ki te fakatonuga ne fai atu ne Ieova.”+

15 Tenā ne tu aka ei a Samuelu kae fanatu mai Kilikala ki Kipea i Peniamina, kae ne lau ne Saulo a te aofaki o tino; a tino kolā koi ‵nofo mo ia e tusa mo te toko 600 tāgata.+ 16 A Saulo, mo tena tama ko Ionatana, mo tino kolā koi fakatasi mo lāua ne ‵nofo i Kepa+ i Peniamina, kae ko tino Filisitia ne ‵nofo i Mekemase.+ 17 Kae ne olo atu a te kau ‵fao mea mai te koga ‵nofo o tino Filisitia i potukau e tolu. E tasi te potukau e olo atu i te auala ki Ofala, ki te fenua o Sualo; 18 kae ko te suā potukau ne olo atu i te auala ki Peta-holono;+ kae ko te tolu o potukau ne olo atu i te auala telā e fanatu ki te tuakoi telā e mafai o lavea i ei a te vanu o Seipoima, i te feitu ki te koga lavaki.

19 E seai eiloa se tino faite mea ki fiti ne maua i te fenua kātoa o Isalaelu, me ne fai aka a tino Filisitia: “Ke fai penā ko te mea ke se mafai eiloa ne tino Epelu o faite se pelu io me se tao.” 20 Kae ko tino Isalaelu katoa e ‵tau o olo ifo ki tino Filisitia o fakamata olotou mea fakamalū laukele, mea tofa laukele, takū, io me ko naifi ‵kati saito. 21 A te ‵togi o te fakamataga o mea fakamalū laukele, mo mea tofa laukele, mo mea faigaluega matatolu, mo takū, mo te faitega fakavave o te mea e ‵taki ei pulumakau e ‵tusa mo te pime* e tasi. 22 Kae i te aso o te taua, e seai eiloa se pelu io me se tao ne maua atu i lima o tino kolā ne ‵nofo mo Saulo mo Ionatana;+ ko Saulo fua mo tena tama ko Ionatana e isi ne lā meatau.

23 I te taimi eiloa tenā, a sotia o te kau Filisitia ko oti ne olo atu ki te auala telā e fanatu i luga i se vanu foliki o Mekemase.+