Mika
7 Kalofa eiloa i a au! Au ko pelā me se tino telā,
Ka oti ne fakamaopoopo ne ia a fuagalakau o te tau ‵vela
Kae ne taetae mai ne ia a mea ‵toe mai tua o te ‵katiga o fuagavine,
Kae ko seai ne kaufui vine e maua ne au mo oku kai,
E seai ne mati ‵fou kolā ne manako malosi au ki ei.
2 Ko ‵galo atu a tino a‵lofa fakamaoni mai te lalolagi;
E seai se tino fai mea tonu e maua mai i tāgata.+
A latou katoa e alamati ki tino ke fakama‵ligi ei olotou toto.+
E afuli ne tino taki tokotasi olotou taina ki te tili.
3 E apo olotou lima i te faiga o mea ma‵sei;+
A te pelenise e fai ana mea e manako ki ei,
E fakamolemole atu te famasino ke maua se taui,+
A te tino takutakua e fakailoa atu ne ia ana manakoga,+
Kae e ga‵lue fakatasi latou ki ei.*
4 A toe tino ‵lei i a latou e fai pelā me ne lakau tala‵tala,
A toe tino fai mea ‵tonu i a latou e sili atu te lotou ma‵sei i lō te ‵pui lakau tala‵tala.
A te aso o otou leoleo mo te otou fakamasinoga ka oko mai.+
Nei la, ka pole‵pole latou.+
5 Sa fakatuanaki ki tou taugasoa
Io me talitonu ki se taugasoa pili.+
Fakaeteete i au pati e fai atu ki te tino e takato i tou lima.
6 Me i te tama tagata e takalialia ki tena tamana,
A te tama fafine e tu aka o ‵teke atu ki tena mātua,+
Kae ko te avaga a te tama tagata e ‵teke atu ki te mātua o tena avaga;+
A fili o te tagata ko tino eiloa o tena kāiga.+
7 Kae e pelā mo au, ka tumau au i te kilokilo atu ki a Ieova.+
Ka nofo fakatalitali* au ki te Atua o toku fakaolataga.+
A toku Atua ka lagona ne ia au.+
8 Ke mo a ma fiafia ona ko au, e toku fili.*
E tiga eiloa au ko siga, ka toe tu aka au ki luga;
E tiga eiloa e nofo au i te pouliga, a Ieova ka fai mo fai toku mainaga.
9 Ka fa‵ki ne au te kaitaua o Ieova
—Me i a au ne agasala ki a ia+—
Ke oko ki te taimi e fai ei ne ia taku tagi kae fai ne ia te fakamasinoga tonu mō oku.
Ka aumai ne ia au ki tua i te mainaga;
Ka kilo atu au ki tena amiotonu.
10 A toku fili ka lavea foki ne ia,
Kae ka ufi ne te masiasi a tou fafine telā e fai mai ki a au:
“Tefea a Ieova tou Atua?”+
Ka kilo atu oku mata ki tou fafine.
Nei la, ka lakalaka tou fafine ki lalo e pelā mo pela i te auala.
11 Ka fai pelā me se aso e faite ei ou ‵pui fatu;
I te aso tenā ka fakalasi aka ei te tuakoi.
12 I te aso tenā ka o‵mai latou ki a koe
Mai Asulia mo fakai o Aikupito,
Mai Aikupito ke oko atu eiloa ki te Vaitafe;*
Mai te tai ki te tai kae mai te mauga ki te suā mauga.+
13 Kae ko te fenua ka maofa valevale ona ko tino e ‵nofo i ei,
E pelā me ko te ikuga o olotou mea ne fai.*
14 Tausi ou tino ki tau tokotoko, ko te lafu mamoe o tou tofi,+
Ko te tino telā ne nofo tokotasi i te vao—i te kogaloto o se vao lakau kaina.
Fai ke ‵kai latou i Pasana mo Kileata+ e pelā eiloa mo aso mua.
15 “E pelā eiloa mo aso ne vau ei koe ki tua mo te fenua o Aikupito,
Ka fakaasi atu ne au ki a ia a mea fakaofoofogia.+
16 A atufenua ka lavea ne latou kae ma‵vale faitalia te lotou ma‵losi.+
Ka tuku atu olotou lima ki luga i olotou gutu;
A olotou taliga ka ‵tuli.
17 Ka sepo ne latou a ‵pefu e pelā me ne gata;+
E pelā mo manu ‵tolo o te lalolagi ka ‵mai latou mo te pole‵pole ki tua mo olotou taoa ma‵losi.
Ka o‵mai latou mo te ma‵taku ki a Ieova te ‵tou Atua,
Kae ka ma‵taku latou i a koe.”+
18 Ko oi te Atua e ‵pau mo koe,
E fakamagalo a mea ‵se kae fakapuli atu a amioga solitulafono+ a tino o tena tofi kolā ne ‵toe mai?+
E se puke ‵mau a ia ki tena kaitaua,
Me e fiafia a ia ki te alofa fakamaoni.+
19 Ka toe fakaasi mai ne ia te alofa fakamagalo;+ ka fakatakavale* ne ia ‵tou mea ‵se.
Ka ‵pei ne koe olotou agasala katoa ki koga ‵poko o te tai.+
20 Ka fakaasi atu ne koe te fakamaoni ki a Iakopo,
Te alofa fakamaoni ki a Apelaamo,
E pelā mo tau tautoga ki omotou tupuga mai i aso mua eiloa.+