Te Lua Nofoaiga Tupu

35 Ne fai ne Iosia te Paseka+ ki a Ieova i Ielusalema, kae ne tamate ne latou te manu mō te taulaga+ o te Paseka i te 14 o aso o te masina muamua.+ 2 Ne ‵tofi aka ne ia a faitaulaga ki olotou tiute kae fakamalosi atu ki a latou ke fai te lotou taviniga i te fale o Ieova.+ 3 Tenā ne fai atu ei a ia ki tino Levi, ko faiakoga o Isalaelu kātoa,+ ko tino tapu o Ieova: “Tuku te Pusa tapu i loto i te fale telā ne faite ne Solomona te tama tagata a Tavita te tupu o Isalaelu;+ kae e se ‵tau o toe sau ne koutou i otou tuauma.+ Nei la, tavini atu ki a Ieova te otou Atua mo ana tino Isalaelu. 4 Kae fakatoka koutou i kāiga i otou tamana e ‵tusa mo otou potukau, o tau‵tali atu i mea kolā ne tusi ne te tupu o Isalaelu ko Tavita+ mo tena tama tagata ko Solomona.+ 5 ‵Tu i te koga tapu i otou potukau e ‵tusa mo kāiga o otou taina i olotou tamana, ko tino katoa,* fakatasi mo se potukau o tino Levi i kāiga i olotou tamana. 6 Tamate te manu mō te taulaga o te Paseka+ kae fakatapu koutou kae fai a fakatokaga mō otou taina ke fai ne latou a fakatonuga a Ieova e auala i a Mose.”

7 Ne tuku fakameaalofa atu ne Iosia a lafu manu ki tino, ko mamoe tāgata mo tamā kouti tāgata, mo fai a taulaga o te Paseka mō tino katoa kolā e ‵nofo atu i konā, e ‵tusa mo te 30,000 te aofaki o manu konā, e pelā foki mo pulumakau e 3,000. A mea konei ne aumai eiloa mai mea a te tupu.+ 8 Ne fai foki ne ana pelenise a meaalofa e pelā me se taulaga e tuku atu mo te lotomalie ki tino, faitaulaga mo tino Levi. Ne tuku atu foki ne Hilikia,+ Sakalia mo Ieielu, ko takitaki o te fale o te Atua tonu, ki faitaulaga a manu e 2,600 mō taulaga o te Paseka kae 300 pulumakau. 9 A Konania mo ana taina ko Semaia mo Netanelu, fakatasi mo Hasapaia, Ieiela mo Iosapata, ko takitaki o tino Levi, ne tuku fakameaalofa atu ne latou ki tino Levi a manu e 5,000 mō te taulaga o te Paseka kae 500 pulumakau.

10 Ne palele te faiga o fakatokaga, kae ne ‵tu atu a faitaulaga i olotou tulaga kae ko tino Levi i olotou potukau,+ e ‵tusa mo te fakatonuga a te tupu. 11 Ne tamate ne latou a manu mō te taulaga o te Paseka,+ kae ne fakamatulutulu atu ne faitaulaga a toto ne maua mai i manu konā,+ kae ko tino Levi e ‵fole a pa‵kili o manu.+ 12 Oti aka, ne fakatoka ne latou a taulaga ‵sunu ko te mea ke tufa atu ki tino katoa, kolā e ‵nofo i potukau e ‵tusa eiloa mo kāiga i olotou tamana, ko te mea ke mafai o ofo atu a mea konā ki a Ieova e ‵tusa mo mea e tusi i te tusi a Mose; kae ne fai foki ne latou penā ki pulumakau. 13 Ne ‵tunu* ne latou te manu mō te taulaga o te Paseka i luga i te afi e ‵tusa mo tuu mo aganuu;+ kae ‵tunu ne latou a taulaga tapu i loto i ulo, ulo ‵lasi mo falai, kae oti aka, avatu fakavave ei ne latou ki tino katoa. 14 Tenā ne fai ei ne latou a fakatokatokaga mō latou eiloa mo te kau faitaulaga, me i faitaulaga, ko tino ne ‵tupu mai i a Alona, ne ofo atu ne latou a taulaga ‵sunu mo gako ke oko ki te po, tenā ne fai ei ne tino Levi a fakatokatokaga mō latou eiloa mo te kau faitaulaga, ko tino ne ‵tupu mai i a Alona.

15 Kae ko tino usu pese, ko tama tāgata a Asafo,+ ne ‵tu i olotou tulaga e ‵tusa mo te fakatonuga a Tavita,+ Asafo,+ Hemanu mo Ietutunu+ te tino fakamatala fakaasiga a te tupu; kae ko tino tausi mataloa e ‵tu i mataloa kese‵kese.+ E se manakogina ke tiaki ne latou te lotou taviniga, me ne fai ne olotou taina ko tino Levi a fakatokatokaga mō latou. 16 Tenā ne fakatoka ei a mea katoa o te taviniga ki a Ieova i te aso tenā ke fai a te Paseka+ kae ke ofo atu a taulaga ‵sunu i luga i te fatafaitaulaga a Ieova, e ‵tusa eiloa mo te fakatonuga a te Tupu ko Iosia.+

17 A tino Isalaelu kolā ne ‵nofo i konā ne fai ne latou te Paseka i te taimi tenā mo te ‵Kaiga Fiafia o Falaoa sē Faka‵fete i aso e fitu.+ 18 E seki ai eiloa se Paseka penā ne fai i Isalaelu talu mai aso o te pelofeta ko Samuelu; io me ne fai ne nisi tupu aka o Isalaelu se Paseka e ‵pau mo te mea ne fai ne Iosia,+ te kau faitaulaga, tino Levi, tino Iuta mo tino Isalaelu katoa kolā ne ‵nofo atu i konā mo tino Ielusalema. 19 A te Paseka tenei ne fai i te 18 o tausaga o te pulega a Iosia.

20 Mai tua o mea katoa konei, i te otiga ne fakatoka ne Iosia te faletapu,* ne vau a te tupu o Aikupito ko Neko+ o taua i Kakemisa i tafa o te Eufilate. Tenā ne fanatu ei a Iosia o taua ki a ia.+ 21 Ne uga atu ne ia a avefekau ki tou tagata, ana muna: “Se a tau fekau i te mea tenei, e te Tupu o Iuta? Au e se vau o taua ki a koe i te aso nei, kae ko au e vau o taua atu ki omotou fili, kae ne fai mai te Atua ko au ke fakavave. Tela la, mō tou ‵lei eiloa, ke mo a ma ‵teke atu koe ki te Atua, telā e fakatasi mai ki a au, i te mea ma fakamasei ne ia koe.” 22 Kae ko Iosia ne seki ‵fuli kea‵tea mai i a ia, kae ne ‵funa ana foliga+ ke taua atu ki a ia kae e se fia fakalogo ki pati a Neko, kolā ne aumai i te gutu o te Atua. Tenā ne vau ei a ia o taua atu i te Koga Laugatasi o Mekito.+

23 Kae ne sana a te Tupu ko Iosia ne tino sana matasana, kae fai atu te tupu ki ana tavini: “Ave kea‵tea au mai konei, me i a au ko pakia malosi.” 24 Ne puke a ia ne ana tavini ki tua mo te kaliota kae tuku atu ki te lua o ana kaliota tau kae aumai a ia ki Ielusalema. Tenā ne mate ei a ia kae tanu i te tanuga o ana tupuga,+ kae ko Iuta mo Ielusalema kātoa ne fanoa‵noa ona ko Iosia. 25 Ne usu te pese fanoanoa a Ielemia+ ona ko Iosia, kae ko tāgata mo fāfine usuusu katoa+ ne usu faeloa olotou pese e uiga ki a Iosia i te lotou fanoa‵noa ke oko mai ki te aso nei; kae ne fai se fakaikuga me e ‵tau o usu a pese konei i Isalaelu, kae ne tusi i pese o fanoanoa.

26 Kae ko te tala fakasolopito kātoa o Iosia mo ana faifaiga alofa fakamaoni, i te tausiga o mea kolā e tusi i te Tulafono a Ieova, 27 mo mea ne fai ne ia, mai te kamataga ke oko ki te fakaotiga, e tusi katoa i te Tusi o Tupu o Isalaelu mo Iuta.+