Te Tusi a Luka

24 Kae i te aso muamua o te vaiaso, ne olo atu latou ki te tanuga kae koi ‵malu mo mea fakama‵nogi kolā ne fakatoka ne latou.+ 2 Kae maua atu ne latou a te fatu ko oti ne fakateka kea‵tea mai te tanuga,+ 3 kae i te lotou uluatuga ki loto ne seki maua ne latou a te foitino o te Aliki ko Iesu.+ 4 Kae koi ‵numi latou i te mea tenei, kiloke! ne ‵tu atu i olotou tafa a tāgata e tokolua e ‵pei ki gatu malapu‵lapu. 5 Ne ma‵taku ou fāfine kae punou faeloa olotou mata ki lalo, telā ne fai atu ei a tāgata konā ki a latou: “Kaia e ‵sala ei ne koutou te tino ola mai tino ‵mate?+ 6 A ia e se nofo i konei, me ko oti ne fakatu aka. Masaua ana pati kolā ne fai atu ki a koutou kae koi nofo a ia i Kalilaia, 7 me e ‵tau eiloa o tuku atu te Tama a te tagata ki lima o tino agasala ke tamate i luga i te pou kae ka toetu aka i te tolu o aso.”+ 8 Tenā ne masaua ei ne latou ana pati,+ 9 kae ne toe ‵foki atu latou mai te tanuga kae fakailoa atu a mea katoa konā ki te toko Sefulutasi mo nisi soko katoa.+ 10 A latou konā ko Malia te Makatala, Ioana, mo Malia te mātua o Iakopo. Ne fai atu foki ne te ‵toega o fāfine kolā ne olo mo latou, a mea konei ki apositolo. 11 Kae ne foliga mai me e se ‵tonu a tala konei ki a latou, kae ne seki tali‵tonu latou ki fāfine konā.

12 Ne tu aka a Petelu kae tele atu ki te tanuga, kae i tena fatioatuga ki loto, ne lavea fua ne ia a laugatu lino i ei. Tenā ne fano ei a ia kae mafaufau me se a te mea ko oti ne tupu.

13 Kae kiloke! i te aso eiloa tenā ne faima‵laga atu ei se tokolua mai i a latou ki se fakai foliki e igoa ki a Emau, telā kāti e fitu maila te ‵mao mai i Ielusalema, 14 kae ne sau‵tala lāua e uiga ki mea katoa konei ne ‵tupu.

15 Kae koi sau‵tala kae tītī manatu lāua ki mea konei, ne fakasae atu a Iesu kae kamata o sa‵sale fakatasi mo lāua, 16 kae e se iloa eiloa ne lāua me ko tou tagata.+ 17 Ana muna ki a lāua: “Ne a mea konei e sau‵tala koulua ki ei i te auala?” Kae ne ‵tu lāua mo te mata fanoa‵noa. 18 Ne tali atu te tino e igoa ki a Kaleopa kae fai atu ki a ia: “E a, a koe se tino fou e nofo tokotasi i Ielusalema kae e se iloa* ne koe a mea ne ‵tupu i konā i aso konei?” 19 Ne fesili atu a ia ki a lāua: “Ne a mea konā?” Ne fai atu lāua ki a ia: “Ko mea e uiga ki a Iesu te Nasaleta,+ telā ne fai mo fai se pelofeta kae e ‵mana ana faiga mo ana pati i mua o te Atua mo tino katoa;+ 20 mo te auala ne tuku atu ei ne ‵tou faitaulaga pule mo tino pule ke fakasala a ia ki te mate,+ kae ‵tuki ne latou a ia ki te pou. 21 Kae ne fakamoe‵moe matou me tenei eiloa te tagata ka fakasao ne ia a Isalaelu.+ E tonu, kae i tafa o mea katoa konei, tenei te tolu o aso talu mai te taimi ne ‵tupu ei a mea konei. 22 E se gata i ei, ne ofo foki matou i omotou nisi fāfine, me ne olo atu latou ki te tanuga kae koi ‵malu+ 23 kae i te taimi ne seki maua ei ne latou tena foitino, ne ‵foki mai latou kae fai mai me ne lavea foki ne latou a agelu kolā ne fai mai i a Iesu ko toe ola. 24 Tenā ne olo atu foki a nisi tino o matou ki te tanuga,+ kae ne maua atu ne latou me e ‵tonu a mea kolā ne fai mai ne fāfine konā, kae ne seki lavea ne latou a ia.”

25 Fai atu ei a ia ki a lāua: “Ko oko eiloa koulua i te va‵lea kae fui tali‵tonu ki mea katoa kolā ne fai mai ne pelofeta! 26 E a, ne seki ‵tau o logo‵mae a te Keliso i mea konei+ ko te mea ke ulu atu a ia ki loto i tena tulaga ‵malu?”+ 27 Ne fakamatala atu ne ia a mea e uiga ki a ia i Tusitusiga Tapu, e kamata mai i a Mose mo te kau Pelofeta+ katoa.

28 Fakamuli ifo loa, ne pili atu latou ki te fakai foliki telā e faima‵laga atu lāua ki ei, kae ko ia e pelā me e faimalaga ki se koga tai ‵mao atu. 29 Kae ne taumafai lāua o taofi a ia, a lā muna: “Vau ke ‵nofo tatou, me ko pili o po.” Fanatu ei a ia o ‵nofo mo lāua. 30 Kae i te taimi ne ‵kai ei a ia mo lāua, ne puke ne ia te falaoa, fai te fakafetai, tofitofi kae tufa atu ki a lāua.+ 31 I konā eiloa, ne ‵pula aka ei a lā mata kae iloa ne lāua me ko ia, fakagalo ei a ia mai i a lāua.+ 32 Kae ne fai aka ei a lā pati i a lāua eiloa: “E a, e seki otia ‵ta loto i ana pati kolā ne fai mai ki a tāua i te auala, i te taimi ne fakamaina faka‵lei mai ei ne ia a Tusitusiga Tapu ki a tāua?” 33 I te itula eiloa tenā ne ‵tu aka lāua kae toe ‵foki atu ki Ielusalema, kae ne maua atu ne lāua te toko Sefulutasi mo nisi soko e maopoopo fakatasi, 34 a lā muna: “Se mea tonu eiloa me ko oti ne toetu aka te Aliki kae ne fakasae atu ki a Simona!”+ 35 Tenā ne fakaasi atu ei ne lāua ki a latou a mea ne ‵tupu i te auala mo te iloaga ne lāua a ia i te tofitofiga o te falaoa.+

36 Kae koi fai‵pati atu lāua ki mea konei kae tu atu a ia i olotou tafa kae fai atu ki a latou: “Ke i luga i a koutou te filemu.”+ 37 Kae ona ko te pole‵pole mo te ma‵taku ne mafau‵fau latou me ko lavea ne latou se agaga. 38 Fai atu ei a ia ki a latou: “Kaia e ma‵taku ei koutou, kae kaia e fakalotolotolua ei koutou? 39 ‵Kilo mai ki oku lima mo oku vae me ko au eiloa tenei; puke mai ki a au kae ka lavea ne koutou me i te agaga e seai ne ana ‵kano mo ivi, e pelā mo te mea e lavea ne koutou i a au.” 40 Mai ana pati konā, ne fakaasi atu ei ne ia ki a latou ana lima mo ana vae. 41 Kae koi tuai o tali‵tonu latou ona ko te lasi o te lotou fia‵fia mo te lotou ofo, fai atu ei a ia ki a latou: “E isi ne otou meakai ke kai aka au?” 42 Tenā ne tuku atu ei ne latou ki a ia ne mu ika tātā, 43 ne puke ne ia kae kai i olotou mua.

44 Ne fai atu a ia ki a latou: “Konei la aku pati ne fai atu kae koi ‵nofo fakatasi tatou,+ me i mea katoa kolā ne tusi i te Tulafono a Mose mo tusi a Pelofeta mo Salamo e uiga ki a au, e ‵tau eiloa o fakataunu.”+ 45 Tenā ne fakamaina faka‵lei atu ei ne ia ki a latou te uiga o Tusitusiga Tapu ko te mea ke malamalama ‵lei latou i ei,+ 46 kae ne fai atu a ia ki a latou: “Tenei te mea ne tusi: me i te Keliso ka puapuaga kae toetu aka mai te mate i te tolu o aso,+ 47 kae e auala i tena igoa, ka talai atu ei te salamō mo te fakamagaloga o agasala+ ki atufenua katoa+—e kamata mai i Ielusalema.+ 48 Kae ka fai koutou mo molimau ki mea katoa konei.+ 49 Kae kiloke! ka uga mai ne au ki luga i a koutou te mea telā ne folafola mai ne toku Tamana. Kae ke ‵nofo eiloa koutou i te fakai ke oko ki te taimi e maua ei ne koutou te ‵mana mai luga.”+

50 Ne ‵taki atu ne ia latou ke oko ki Petania, ne sisi aka ana lima ki luga kae fakamanuia atu ki a latou. 51 Kae koi fakamanuia atu a ia ki a latou kae ne masagi aka ki luga i tena auala o fano ki te lagi.+ 52 Ne ifo atu latou ki a ia kae ‵foki atu ki Ielusalema mo te fia‵fia lasi.+ 53 Kae ne ‵nofo faeloa latou i te faletapu o tavae atu ki te Atua.+