Salamo
Ki te takitaki o te kau fai pese; ne fai ki “Te Lili.” Ko te salamo a Tavita.
69 Fakaola mai au, e te Atua, me ko fakamataku a vai ki toku ola.+
2 Au ko pulu ki lalo i te pela ‵poko, telā e seai se laukele makeke i ei.+
Au ko fanaifo ki vai ‵poko,
Kae ko te ‵tafe o te tamā vaitafe ko ave kea‵tea ne ia au.+
3 Au ko fi‵ta i te kalaga atu;+
A toku kato ko ‵mae.
A oku mata ko ‵mae i te taimi e faka‵tali ei au ki toku Atua.+
4 A latou kolā e takalia‵lia mai ki a au e aunoa mo se pogai+
E tokouke atu i lō laulu i toku ulu.
A tino kolā e fia tamate ne latou au,
Ko oku fili faitogafiti,* ko tokouke.
Au ne faimālō ke tuku atu a mea kolā ne seki kaisoa ne au.
5 Te Atua, e iloa ‵lei ne koe toku valea,
Kae ko taku agasala e se ‵funa mai i a koe.
6 A latou kolā e fakamoe‵moe ki a koe ke mo a ma fakamasiasigina ona ko au,
E te Aliki Sili, ko Ieova o kautau.
A latou kolā e salasala ki a koe ke mo a ma fakalumalumagina ona ko au,
E te Atua o Isalaelu.
7 Ko logo‵mae au i te masiasi ona ko koe;+
A oku mata ko ufi ne te masiasi.+
8 Ko fai au e pelā me se tino fou ki oku taina,
Se tino fakaa‵tea ki tama tāgata a toku mātua.+
9 A te loto finafinau ki tou fale ko fai masei i loto i a au,+
Kae ko fakamaseiga a latou kolā e fakamasei ne latou koe ko oko mai ki a au.+
10 I te taimi ne fakamalalo ei au kae fakalikiliki,*
Ne fakatauemugina au ona ko te mea tenā.
11 I te taimi ne fai ei oku gatu ki lautaga masae‵sae,
Ne fai au pelā me se mea fai fa‵kata ki a latou.
12 Ne fai‵pati a tino kolā e saga‵saga i te mataloa o te fakai e uiga ki a au,
Kae ko tino ko‵nā e usu olotou pese e uiga ki a au.
13 Kae ke oko atu eiloa ki a koe taku ‵talo,
E Ieova, i te taimi tonu.+
I te lasi o tou alofa fakamaoni, e te Atua,
Tali mai ki a au e auala i au faifaiga faka‵sao tino mautinoa.+
14 Fakasao aka au mai te pela;
Sa fai ke pulu au ki lalo.
Fakasao aka au mai i a latou kolā e takalia‵lia ki a au
Kae e penā foki mai vai ‵poko.+
15 Ke mo a ma ‵tafe kea‵tea au ne te lofiaga,+
Io me talia ke folo au ne koga ‵poko,
Io me talia ke ‵pono a te gutu o te vaikeli mai luga i a au.+
16 Tali mai ki a au, e Ieova, me i tou alofa fakamaoni e ‵lei.+
E ‵tusa mo te lasi o tou alofa fakamagalo, ‵fuli mai ki a au,+
17 Kae sa ‵funa ou mata mai tau tavini.+
Tali fakavave mai ki a au, me i a au ko puapuaga.+
18 Vau ke pili mai koe ki a au kae fakasao aka au;
Fakasao aka au mai oku fili.
19 E iloa ne koe oku fakatauemuga mo toku ma mo toku masiasi.+
E lavea ne koe oku fili katoa.
20 Ko fatifati toku loto ona ko fakatauemuga, kae ko te pakiaga ko se mafai o faka‵lei.
Au ne fakamoemoe ke alofa mai se tino, kae seai,+
Ke maua ne tino fakamafanafana, kae seai se tino ne maua ne au.+
21 Ne tuku mai ne latou a mea poisini* e pelā me ne meakai,+
Kae i toku fiainu ne tuku mai ne latou a te vinika ke inu au ki ei.+
22 Ke fai te lotou taipola e pelā me se matasele ki a latou,
Kae ko te lotou manuia e pelā me se malei.+
23 Ke fakapouli atu olotou mata ke se lavea ne latou se mea,
Kae fai olotou kautega ke pole‵pole faeloa.
24 ‵Ligi atu ki luga i a latou a tou kaitaua,
Kae ke pule atu a tou kaitaua telā e ‵ka pelā me se afi ki luga i a latou.+
25 Ke fakamasei atu a koga e ‵nofo latou i ei;
Ke seai eiloa ne tino e ‵nofo i olotou faleie.+
26 Me ne afuli ne latou a te tino ne ta ne koe,
Kae fai‵pati faeloa latou ki te logo‵mae o latou kolā ne fakapakia ne koe.
27 Fakaopoopo atu a te agasala ki olotou agasala,
Kae ke seai eiloa se lotou vaega i tou amiotonu.
28 Ke ‵solo kea‵tea latou mai te tusi o te ola,+
Kae ke mo a e tusi fakatasi latou mo tino amio‵tonu.+
29 Au ko pokotia kae logo‵mae.+
Ke puipui eiloa au, e te Atua, ne tou malosi faka‵sao tino.
30 Ka usu atu ne au a pese o vikiga ki te igoa o te Atua,
Kae ka fakamaluga aka ne au a ia ki pati fakafetai.
31 Ka sili atu te fiafia o Ieova ki te mea tenei i lō se pulumakau tagata,
E sili atu i lō se tamā pulumakau tagata e isi ne ana sau mo alofivae.+
32 Ka lavea ne tino agamalu a te mea tenei kae fia‵fia.
A koutou kolā e ‵sala ki te Atua, ke fakama‵losi otou loto.
33 Me i a Ieova e fakalogologo ki tino ma‵tiva,+
Kae ka se takalialia a ia ki ana tino kolā e fai pelā me ne pagota.+
34 Ke vikia a ia ne te lagi mo te lalolagi,+
Te tai mo mea katoa e gasue‵sue i loto i ei.