Te Tusi Muamua ki te Kau i Tesalonia

1 Ko matou ko Paulo, Suliano*+ mo Timoteo+ ki te fakapotopotoga i Tesalonia telā e ‵kau fakatasi mo te Atua te Tamana mo te Aliki ko Iesu Keliso:

Ke i luga i a koutou a te alofa tauanoa mo te filemu mai te Atua.

2 E fakafetai atu faeloa matou ki te Atua i taimi e aofia ei ne matou a koutou katoa i omotou ‵talo,+ 3 me masaua faeloa ne matou te otou ga‵lue fakamaoni mo otou galuega a‵lofa, mo te otou kufaki ona ko te otou fakamoemoega+ i te ‵tou Aliki ko Iesu Keliso i mua o te ‵tou Atua te Tamana. 4 Me e iloa ne matou, e oku taina kolā e alofa ki ei te Atua, i te filifiliga ne ia o koutou, 5 me i te tala ‵lei telā ne talai atu ne matou ne seki oko atu ki a koutou i omotou pati eiloa kae i te ‵mana mo te agaga tapu mo te mautinoa ‵lei, e pelā eiloa mo te iloa ne koutou me ko matou ne vaegā tino pefea i te ‵nofo tasi mo koutou mō te ‵lei o koutou. 6 Kae ko koutou ne fakaakoako mai ki a matou+ mo te Aliki,+ i te lavea atu me ne talia ne koutou te muna mai lalo i puapuaga e uke+ mo te fiafia telā e maua mai te agaga tapu, 7 ko te mea ke fai koutou mo fakaakoakoga ‵lei ki tino tali‵tonu katoa i Maketonia mo Akaia.

8 Se mea tonu me ne seki fakasalalau atu fua ne koutou a te muna a Ieova* i Maketonia mo Akaia kae ko te otou fakatuanaki ki te Atua ko oti ne salalau atu ki koga katoa,+ tela la, ko se manakogina ke faipati atu ne matou se mea. 9 Me e fai‵pati faeloa a latou e uiga ki te taimi muamua ne fetaui ei matou mo koutou mo te auala ne ‵fuli atu ei koutou ki te Atua mai i otou tupua+ ke pologa ki se Atua ola kae tonu, 10 kae ke fakatali‵tali ki te oko mai o tena Tama mai te lagi,+ telā ne fakatu aka ne ia mai te mate, ko Iesu, telā ka faka‵sao ne ia tatou mai te kaitaua fakamataku o te Atua telā ka oko mai.+