Esoto
30 “E ‵tau o faite ne koe se fatafaitaulaga mo ‵sunu a mea ma‵nogi;+ ka faite ne koe mai te lakau ko te akasia.+ 2 E ‵tau o sikuea, e tasi te kupita te loa, e tasi te kupita te lauefa, kae lua kupita te maluga. Ana suki e ‵tau o ‵piki ki ei.+ 3 E ‵tau o ufi ne koe a te fatafaitaulaga ki te tinā aulo: ko tena koga mai luga, ana feitu katoa, mo ana suki; kae e ‵tau o fakatamilo ne koe se fusi aulo i ana kaugutu. 4 Ka faite foki ne koe ne ligi aulo e lua mai lalo i kaugutu o feitu e lua kolā e fakafesagai, kae ka faulu ki ei a amo kolā e sau ki ei te fatafaitaulaga. 5 Faite a amo mai te lakau ko te akasia kae ufi atu ki te aulo. 6 E ‵tau o tuku ne koe i mua o te ‵pui laugatu telā e pili ki te pusa o te Feagaiga,+ i mua o te ‵pono telā e tuku mai luga i te Feagaiga, i te koga telā ka fakasae atu ei au ki a koe.+
7 “Ka ‵sunu ne Alona+ a mea ma‵nogi+ i luga i ei,+ ko te mea ke fanaka te au i luga i te fatafaitaulaga i te taimi e fakatoka ei ne ia a moli+ i tafataeao katoa. 8 Kafai foki e faka‵ka ne Alona a moli i te afiafi kae koi tuai o pouli,* ka ‵sunu ne ia a mea ma‵nogi. A te mea tenā se taulaga manogi telā e masani o ofo atu i mua o Ieova i otou kautama katoa. 9 E se ‵tau mo koutou o ofo atu i luga i ei a mea ma‵nogi+ kolā e se talia io me se taulaga ‵sunu io me se taulaga meakai, kae e se ‵tau mo koutou o ‵ligi se taulaga meainu i luga i ei. 10 E ‵tau o fai ne Alona a te faka‵māga o ana suki fakatasi i te tausaga.+ E ‵tau o fai ne ia te faka‵māga+ o te fatafaitaulaga fakatasi i te tausaga ki nai toto mai te taulaga mō agasala, i otou kautama katoa. A te mea tenā se mea tafasili i te tapu ki a Ieova.”
11 Tenā ne fai atu ei a Ieova ki a Mose: 12 “So se taimi e lau ei ne koe a tino Isalaelu,+ e ‵tau o ofo atu ne tino taki tokotasi se togiola mō ia eiloa ki a Ieova i te taimi e fai ei te lauga o tino. E fai penā ko te mea ke seai se mala e oko atu ki a latou i te taimi e fakamau ei olotou igoa. 13 Konei a mea e ‵tau o tuku atu ne tino katoa kolā e fakamau olotou igoa: ko te āfa o te sekela* mai te sekela masani o te koga tapu.+ A te sekela e tasi e ‵pau mo kile* e 20. A te āfa sekela ko te tusaga tenā ki a Ieova.+ 14 A tino katoa kolā ne fakamau olotou igoa kae ko silia atu i te taki 20 olotou tausaga e ‵tau o avatu olotou tusaga ki a Ieova.+ 15 A tino mau‵mea e se ‵tau o uke olotou mea e tuku atu kae ko tino ma‵tiva e se ‵tau o mu‵tana ifo olotou mea e tuku atu i te āfa sekela e pelā me se tusaga ki a Ieova mō te faka‵māga o latou. 16 E ‵tau o puke ne koe a tupe siliva o te faka‵māga mai tino Isalaelu kae tuku atu mō te taviniga i te faleie o maopoopoga, ke fai mo fai se fakamasauaga mō tino Isalaelu i mua o Ieova, ke fai ei te faka‵māga o koutou.”
17 Ne toe faipati atu a Ieova ki a Mose, ana muna: 18 “Faite se pesini kopa+ mo tena tulaga kae tuku i te va o te faleie o maopoopoga mo te fatafaitaulaga kae utu ne vai ki ei.+ 19 E ‵tau o ‵fulu ne Alona mo ana tama tāgata olotou lima mo vae i ei.+ 20 Kafai e ulu atu latou ki te faleie o maopoopoga io me fakapili‵pili atu ki te fatafaitaulaga o tavini kae ofo a taulaga i luga i te afi ke fanaka te au ki a Ieova, ka faka‵ma latou ki te vai ko te mea ke se ‵mate latou. 21 E ‵tau mo latou o ‵fulu olotou lima mo olotou vae ko te mea ke se ‵mate latou, kae e ‵tau o fai a te mea tenā e pelā me se tulafono foliki tumau mō latou, ko ia mo ana tama, i olotou kautama katoa.”+
22 Ne toe faipati atu a Ieova ki a Mose: 23 “Ka oti ko puke ei ne koe a toe sinu ma‵nogi ‵lei: e 500 mulo ‵poto, mo te āfa o te aofaki tenā, e 250 kinamoni ma‵galo, e 250 kalamusi ma‵galo, 24 e 500 kasia kolā ne fua ki te sekela masani i te koga tapu,*+ fakatasi mo te hini* o te sinu olive. 25 Tenā ko faite ei ne koe mai i ei se sinu tapu mo faū a tino; e ‵tau eiloa o palu faka‵lei.*+ E ‵tau o fai mo fai se sinu tapu mo faū a tino.
26 “E ‵tau o fakatapu ne koe ki ei a te faleie o maopoopoga+ mo te pusa o te Feagaiga, 27 e pelā foki mo te taipola mo ana meāfale katoa, te tugamoli mo ana meāfale, te fatafaitaulaga o mea ma‵nogi, 28 te fatafaitaulaga o taulaga ‵sunu mo ana meāfale katoa mo te pesini mo tena tulaga. 29 E ‵tau o fakatapu ne koe a mea konā ko te mea ke fai mo fai a toe mea tafasili i te tapu.+ So se tino e patele ki ei e ‵tau o tapu.+ 30 Kae ka faū ne koe a Alona+ mo ana tama tāgata+ kae fakatapu latou ke tavini mai ki a au e pelā me ne faitaulaga.+
31 “Konei au pati ka fai ki tino Isalaelu, ‘E ‵tau o fai faeloa a te mea tenei mo fai se sinu tapu mo faū a tino ki a au i otou kautama katoa.+ 32 E se ‵tau o ‵mili ki ei te foitino o se tino, kae e se ‵tau o faite ne koutou se sinu penā. A te mea tenā se mea tapu. E ‵tau o fai faeloa e pelā me se mea tapu mō koutou. 33 So se tino e faite ne ia se sinu penā kae ‵mili atu ki se isi tino* e ‵tau o tapale kea‵tea* mai i ana tino.’”+
34 Tenā ne fai atu ei a Ieova ki a Mose: “Puke a sinu ma‵nogi konei kae fua ke ‵pau te lotou aofaki:+ te sitate, te onika, te kalipanamu mo te pulu lipano ‵ma. 35 Palu fakatasi mo fai se mea manogi;+ a mea manogi ‵gali konā e ‵tau o palu faka‵lei,* e fakamasima,+ e ‵ma kae tapu. 36 E ‵tau o tuki ne koe ne mea mai i ei ke liu pauta kae tuku atu ne nāi mea i mua o te pusa o te Feagaiga i loto i te faleie o maopoopoga, te koga telā ka fakasae atu ei au ki a koe. E ‵tau o fai ne koutou a te mea tenā e pelā me se mea tafasili i te tapu. 37 E se ‵tau mo koe o fakaaoga a te mea manogi tenā ne palu ne koe.+ E ‵tau o fai ne koe e pelā me se mea tapu ki a Ieova. 38 So se tino e faite ne ia se mea manogi penā ke sogisogi ki ei e ‵tau o tapale kea‵tea* mai ana tino.”