Numela

9 Ne faipati atu a Ieova ki a Mose i te koga lavaki o Sinai i te masina muamua+ i te lua o tausaga o te lotou ologa kea‵tea mai Aikupito, ana muna: 2 “E ‵tau o fakatoka ne tino Isalaelu a te taulaga o te Paseka+ i tena taimi tonu.+ 3 I te 14 o aso o te masina tenei i te afiafi kae koi tuai o pouli* e ‵tau o fakatoka ne koe a te mea tenā i tena taimi tonu. E ‵tau o fakatoka ne koe e ‵tusa mo ana tulafono fakavae mo ana faifaiga masani katoa.”+

4 Tenā ne fai atu ei a Mose ki tino Isalaelu ke fakatoka te taulaga o te Paseka. 5 Ne fakatoka ne latou te taulaga o te Paseka i te masina muamua, i te 14 o aso o te masina i te afiafi kae koi tuai o pouli,* i te koga lavaki o Sinai. Ne fai eiloa ne tino Isalaelu a mea katoa kolā ne fakatonu atu ne Ieova ki a Mose.

6 Kae e isi ne tāgata kolā e se ‵ma me ne pa‵tele ki se foitino mate,*+ ko se mafai ei o fakatoka ne latou te taulaga o te Paseka i te aso tenā. Ne olo atu a tāgata konā ki mua o Mose mo Alona i te aso tenā+ 7 kae fai atu: “Ko se ‵ma matou me ne pa‵tele matou ki se foitino mate. Kaia e se talia ei ke ofo atu ne matou a te taulaga ki a Ieova i tena taimi tonu fakatasi mo tino Isalaelu?”+ 8 E uiga ki te mea tenei ne fai atu a Mose ki a latou: “Faka‵tali i konā, ke fakalogo aka au me se a te fakatonuga a Ieova e uiga ki a koutou.”+

9 Tenā ne faipati atu ei a Ieova ki a Mose: 10 “Fai atu ki tino Isalaelu, ‘Kafai e isi se tagata i a koutou io me i otou kautama fakamuli ko se ‵ma i te patelega ki se foitino mate+ io me e fano i se malaga ‵mao, e ‵tau eiloa mo ia o fakatoka te taulaga o te Paseka ki a Ieova. 11 E ‵tau o fakatoka ne latou i te lua o masina,+ i te 14 o aso i te afiafi kae koi tuai o pouli.* E ‵tau o ‵kai latou ki ei fakatasi mo falaoa sē faka‵fete mo laulakau ‵kona.+ 12 E se ‵tau mo latou o faka‵toe ne mea ke oko ki te tafataeao,+ kae e se ‵tau o ‵fati ne latou se ivi mai i ei.+ E ‵tau o fakatoka ne latou a te mea tenā e ‵tusa mo tulafono fakavae katoa e uiga ki te Paseka. 13 Kae kafai se tagata e ‵ma io me e se fano i se malaga ‵mao kae fakatamala a ia o fakatoka te taulaga o te Paseka, e ‵tau o tapale kea‵tea* a te tagata tenā mai i ana tino,+ me ne seki ofo atu ne ia te taulaga ki a Ieova i tena taimi tonu. Ka fakasala eiloa te tino tenā ona ko tena agasala.

14 “‘Kae kafai e isi se tino fakaa‵tea e ‵nofo fakatasi mo koutou, e ‵tau foki o fakatoka ne ia te taulaga o te Paseka ki a Ieova.+ E ‵tau o fai ne ia te mea tenā e ‵tusa mo te tulafono fakavae o te Paseka mo ana faifaiga masani.+ E ‵tau eiloa o tasi te tulafono fakavae mō koutou, faitalia me ko te tino fakaa‵tea io me ko te tino tonu o te fenua.’”+

15 Kae i te aso ne fakatu aka+ ei te faleie tapu ne ufi a te faleie tapu, te faleie o te Feagaiga, ne te kaumana kae i te afiafi ne tu i luga i te faleie tapu se mea pelā me se afi ke oko eiloa ki te tafataeao.+ 16 Tenā eiloa te mea ne kamata o tupu: Ne ufi ne te kaumana a te faleie tapu i te ao, kae i te po se mea pelā me se afi.+ 17 I so se taimi e masagi aka ei te kaumana mai te faleie, ko tino Isalaelu eiloa ko tiaki fakavave ne latou te koga tenā,+ kae i te koga telā e tu ei te kaumana, tenā te koga ka ‵nofo ei a tino Isalaelu.+ 18 E ‵tusa mo te fakatonuga a Ieova e faima‵laga ei a tino Isalaelu, kae e ‵tusa mo te fakatonuga a Ieova e ‵nofo ei latou.+ E ‵tusa mo te leva e tu i ei te kaumana i luga i te faleie tapu, ka ‵nofo eiloa latou i konā. 19 Kafai e tu te kaumana i luga i te faleie tapu i aso e uke, e faka‵logo eiloa a tino Isalaelu ki a Ieova kae e se olo kea‵tea.+ 20 I nisi taimi a te kaumana e tu faeloa i luga i te faleie tapu i nai aso. E ‵tusa mo te fakatonuga a Ieova e ‵nofo ei latou, kae e ‵tusa mo te fakatonuga a Ieova e faima‵laga ei latou. 21 I nisi taimi a te kaumana e tu fua i te afiafi ke oko ki te tafataeao, kae kafai ko masagi aka te kaumana i te tafataeao, ko faima‵laga ei latou. Faitalia me se ao io me se po e masagi aka ei te kaumana, e faima‵laga eiloa latou.+ 22 Faitalia me e lua aso, se masina io me e leva atu, e ‵tusa mo te leva e tu ei te kaumana i luga i te faleie tapu, e ‵nofo eiloa a tino Isalaelu kae e se olo. Kae kafai ko masagi aka, ko faima‵laga ei latou. 23 E ‵tusa mo te fakatonuga a Ieova e ‵nofo ei latou, kae e ‵tusa mo te fakatonuga a Ieova e faima‵laga ei latou. Ne faka‵logo eiloa latou ki a Ieova e ‵tusa mo te fakatonuga a Ieova e auala i a Mose.