Esoto

29 “Tenei te mea e ‵tau o fai ne koe ke fakatapu latou ke tavini mai ki a au e pelā me ne faitaulaga: Puke se tamā pulumakau tagata, e lua a mamoe kolā e seai ne pona,+ 2 falaoa sē faka‵fete, falaoa puku‵puku sē faka‵fete kae palutasi mo sinu, mo falaoa manifinifi sē faka‵fete kae nani ki sinu.+ E ‵tau o faite ne koe a mea konā ki falaoa ‵mata mai te saito tafasili i te ‵lei 3 ko tuku ei ki loto i se kete kae ofo atu i loto i te kete+ tenā fakatasi mo te pulumakau tagata mo mamoe e lua.

4 “E ‵tau o faka‵tu ne koe a Alona mo ana tama tāgata i te mataloa o te faleie o maopoopoga,+ kae fakakou‵kou latou ki vai.+ 5 Tenā ko puke ei ne koe a gatu+ kae fakapei a Alona ki te gatu ‵loa, te gatu ‵loa o te efota e seai ne lima i ei, te efota mo te ufi fatafata, kae e ‵tau o ‵sai faka‵mau ne koe te fusi o te efota telā ne ‵laga faka‵lei ki tena taugasulu.+ 6 Ka fakapulou ne koe te pulou laugatu ki tena ulu kae tuku atu te fakailoga tapu o te tukuatuga* i luga i te pulou laugatu;+ 7 kae puke a te sinu mo faū+ a tino kae ‵ligi ki tena ulu ke fakaeke ei a ia.+

8 “Tenā ko aumai ei ana tama tāgata ki mua kae faka‵pei latou ki gatu ‵loa+ 9 kae fusi fakatamilo a fusi ki a latou, ko Alona fakatasi mo ana tama tāgata, kae fakapulou atu olotou pulou; kae ka fai mō latou a te tofi fakafaitaulaga. Tenei taku tulafono fakavae tumau.+ Tenei te auala e ‵tau ei o faka‵sopo ne koe a Alona mo ana tama tāgata ke tavini e pelā me ne faitaulaga.*+

10 “Nei la, e ‵tau o ofo atu ne koe te pulumakau i mua o te faleie o maopoopoga, kae ka tuku ne Alona mo ana tama tāgata olotou lima ki luga i te ulu o te pulumakau tagata.+ 11 Tamate te pulumakau tagata i mua o Ieova i te mataloa o te faleie o maopoopoga.+ 12 Puke ne toto o te pulumakau tagata i luga i tou matikao kae nani ki luga i suki o te fatafaitaulaga,+ kae ‵ligi ki tua te toega o toto ki te tafito o te fatafaitaulaga.+ 13 Tenā ko puke ei a gako+ katoa kolā e ufi i gakau, ko gako o te ate mo nonu e lua fakatasi mo gako kolā e ‵piki ki ei, kae ‵sunu a mea konā ko te mea ke au i luga i te fatafaitaulaga.+ 14 Kae ko ‵kano o te pulumakau tagata fakatasi mo ana pa‵kili mo ana fekau e ‵tau o ‵sunu ne koe mai tua o te fakai. A te mea tenā se taulaga mō agasala.

15 “Tenā ko puke mai ei te mamoe e tasi, kae e ‵tau o tuku atu ne Alona mo ana tama tāgata olotou lima ki luga i te ulu o te mamoe.+ 16 Tamate te mamoe kae puke ana toto kae fakamatulutulu atu ki feitu katoa o te fatafaitaulaga.+ 17 Katikati a te mamoe kae ‵fulu ana gakau+ mo ana vae, ko fakatoka ei a vaega katoa fakatasi mo tena ulu. 18 E ‵tau mo koe o ‵sunu te mamoe kātoa, ko te mea ke au i luga i te fatafaitaulaga. A te mea tenā se taulaga ‵sunu ki a Ieova, se mea manogi gali.+ Se taulaga e ofo atu i luga i te afi ki a Ieova.

19 “Ka oti, ko puke ei ne koe te suā mamoe, kae e ‵tau o tuku atu ne Alona mo ana tama tāgata olotou lima ki luga i te ulu o te mamoe.+ 20 Tamate te mamoe kae puke ne toto mai ei kae nani ki te feitu ki lalo o te taliga fakaatamai o Alona mo te feitu ki lalo o taliga fakaatamai o ana tama tāgata, mo matikao ma‵tua o olotou lima fakaatamai, mo matikao ma‵tua o olotou vae fakaatamai, kae fakamatulutulu a toto ki feitu katoa o te fatafaitaulaga. 21 Tenā ko puke ei ne toto mai luga i te fatafaitaulaga mo ne mu sinu mo faū+ a tino kae fakamotimoti atu ki luga i a Alona mo ana gatu e penā foki mo ana tama tāgata mo olotou gatu, ko te mea ke tapu a ia mo ana gatu, e pelā foki mo ana tama tāgata mo olotou gatu.+

22 “Tenā ko puke ei mai i te mamoe a gako, ko gako i te felo, ko gako e ufi i ei a gakau, ko gako i te ate, ko nonu e lua mo gako kolā e ‵piki ki ei+ mo te vae fakaatamai, me tenā te mamoe o te lotou faka‵sopoga.+ 23 Puke mai foki se puta falaoa mo se falaoa pukupuku telā ne palu fakatasi mo sinu mo se falaoa manifinifi mai te kete o falaoa sē faka‵fete i mua o Ieova. 24 E ‵tau o tuku atu katoa ne koe a mea konā ki lima o Alona mo lima o ana tama tāgata, kae e ‵tau o fakagasuesue ne koe ki mua mo tua e pelā me se taulaga fakagasuesue i mua o Ieova. 25 Tenā ko puke mai ei ne koe a mea konā mai i olotou lima kae ‵sunu a mea konā i luga i te fatafaitaulaga mai luga o te taulaga ‵sunu e pelā me se mea manogi gali i mua o Ieova. Se taulaga e ofo atu i luga i te afi ki a Ieova.

26 “Tenā ko puke ei a te fatafata o te mamoe o te faka‵sopoga+ telā ne ofo atu mō Alona, kae fakagasuesue ki mua mo tua e pelā me se taulaga fakagasuesue i mua o Ieova, kae ka fai a te mea tenā mo fai tou tusaga. 27 E ‵tau o fakatapu ne koe a te fatafata o te taulaga fakagasuesue mo te vae o te tusaga tapu telā ne fakagasuesue kae ne puke mai i te mamoe o te faka‵sopoga,+ mai i mea kolā ne ofo atu mō Alona mo ana tama tāgata. 28 Ka fai a te mea tenā ma Alona mo ana tama tāgata e auala i se tulafono foliki tumau telā ka tau‵tali ki ei a tino Isalaelu, me i te mea tenā se tusaga tapu, kae ka fai e pelā me se tusaga tapu e tuku atu ne tino Isalaelu.+ Ko te lotou tusaga tapu mō Ieova mai te lotou taulaga ‵kai fakatasi.+

29 “A gatu tapu+ o Alona ka fakaaoga ne ana tama tāgata+ mai ana tua māfai ko fakaeke kae faka‵sopo latou e pelā me ne faitaulaga. 30 A te faitaulaga mai ana tama tāgata telā ka sui ne ia a ia kae vau ki loto i te faleie o maopoopoga o tavini atu i te potu tapu e ‵tau o pei ki gatu konā i aso e fitu.+

31 “Ka puke ne koe a te mamoe o te faka‵sopoga kae saka ana ‵kano i se potu tapu.+ 32 Ka ‵kai+ a Alona mo ana tama tāgata ki ‵kano o te mamoe mo falaoa i loto i te kete i te mataloa o te faleie o maopoopoga. 33 E ‵tau o ‵kai latou ki mea kolā ko oti ne ofo atu mō te faka‵sopoga o latou e pelā me ne faitaulaga* mo te lotou fakatapuga. Kae e se ‵tau o kai ki ei se isi tino,* me i mea konā ne mea ko oti ne fakatapu.+ 34 Kafai e isi ne ‵kano mai te taulaga o te faka‵sopoga io me ko falaoa ne ‵toe ki te tafataeao, e ‵tau o ‵sunu ne koe a mea ‵toe konā ki te afi.+ E se ‵tau o kai ki ei se tino, me i mea konā ne mea ko oti ne fakatapu.

35 “E ‵tau o fai ne koe a te mea tenei ki a Alona mo ana tama tāgata e ‵tusa mo mea katoa kolā ne fakatonu atu ne au ki a koe. E fitu aso ka faka‵sopo ei ne koe a latou e pelā me ne faitaulaga.+ 36 Ka ofo atu ne koe te pulumakau tagata o te taulaga mō agasala i aso takitasi, kae e ‵tau o faka‵ma ne koe a te fatafaitaulaga mai agasala e auala i te faiga o se taulaga mō te faka‵māga o agasala, kae e ‵tau o faka‵malu ne koe kae fakatapu.+ 37 E fitu aso e ‵tau ei o fai ne koe te faka‵māga o te fatafaitaulaga, kae e ‵tau o fakatapu ne koe ko te mea ke fai mo fai te ‵toe fatafaitaulaga ‵malu.+ So se tino e patele ki te fatafaitaulaga e ‵tau o tapu.

38 “Konei a mea e ‵tau o ofo atu ne koe i te fatafaitaulaga: e lua mamoe kolā ko takitasi tausaga te ma‵tua, i taimi katoa.+ 39 Ofo atu te mamoe e tasi i te tafataeao kae ko te suā mamoe i te afiafi kae koi tuai o pouli.*+ 40 A te tasi-vae-sefulu o te efa* o falaoa ‵mata kae ‵lei kolā ne palu fakatasi mo te tasi-vae-fa o te hini* o sinu olive, mo se taulaga meainu mai te tasi-vae-fa o te hini o te uaina, e ‵tau o olo tasi mo te mamoe muamua. 41 Ka ofo atu ne koe te lua o mamoe i te afiafi kae koi tuai o pouli,* fakatasi mo taulaga meakai mo taulaga meainu e ‵pau mo mea kolā ne ofo atu i te tafataeao. Ka fai ne koe a mea konā e pelā me se mea manogi gali, se taulaga telā e ofo atu i luga i te afi ki a Ieova. 42 E ‵tau o fai pelā me se taulaga ‵sunu masani i otou kautama katoa i te mataloa o te faleie o maopoopoga i mua o Ieova, ko te koga telā ka fakasae atu ei au ki a koutou o faipati atu ki a koe i konā.+

43 “Ka fakasae atu au ki tino Isalaelu i te koga tenā, kae ka fakatapugina te koga tenā ona ko toku ‵malu.+ 44 Ka fakatapu ne au a te faleie o maopoopoga mo te fatafaitaulaga, kae ka fakatapu ne au a Alona mo ana tama tāgata+ ko te mea ke tavini mai latou ki a au e pelā me ne faitaulaga. 45 Ka ‵nofo fakatasi au mo tino Isalaelu, kae ka fai au mo olotou Atua.+ 46 Kae ka iloa ‵lei ne latou i a au ko Ieova te lotou Atua, telā ne aumai ne au latou kea‵tea mai te fenua o Aikupito ko te mea ke ‵nofo fakatasi au mo latou.+ Au ko Ieova te lotou Atua.