Esoto

16 I te otiga ne tiaki ne latou a Elima, ne oko atu te fakapotopotoga kātoa o tino Isalaelu ki te koga lavaki o Sini,+ telā e tu i te va o Elima mo Sinai, i te po 15 o te lua o masina mai tua o te tiakinaga ne latou a te fenua o Aikupito.

2 Tenā ne kamata ei o mui‵mui te fakapotopotoga kātoa o tino Isalaelu ki a Mose mo Alona i te koga lavaki.+ 3 Ne fai atu faeloa a tino Isalaelu ki a lāua: “E ‵lei atu moi ne ‵mate matou i te lima o Ieova i te fenua o Aikupito i te taimi e ‵kai ei matou ki ‵kano o manu,+ i te taimi e ‵kai ma‵kona ei matou ki falaoa. Ne aumai ne koulua matou ki te koga lavaki tenei ko te mea ke ‵mate te fakapotopotoga kātoa tenei i te fia‵kai.”+

4 Tenā ne fai atu ei a Ieova ki a Mose: “Ka faka‵to ifo ne au a meakai mai te lagi+ ma koutou, kae e ‵tau o olo a tino katoa o ‵tae mai olotou meakai e lava mō aso takitasi,+ ko te mea ke tofotofo ne au latou me e mata, e faka‵logo latou ki aku tulafono io me ikai.+ 5 Kae i te ono o aso,+ kafai ko fakatoka ne latou olotou meakai, e ‵tau o ‵tae mai ne latou e fakalua taimi te uke o mea e ‵tae sāle ne latou i aso takitasi.”+

6 Ne fai atu a Mose mo Alona ki tino Isalaelu katoa: “I te afiafi ka iloa ‵lei ne koutou me ko Ieova ne aumai ne ia koutou kea‵tea mai te fenua o Aikupito.+ 7 I te tafataeao ka matea ei ne koutou a te ‵malu o Ieova, me ko oti ne lagona ne Ieova a koutou e mui‵mui ki a ia. Ko oi la māua e ‵tau ei o mui‵mui mai koutou ki a māua?” 8 Ne toe fai atu a Mose: “Kafai e tuku atu ne Ieova a ‵kano o manu i te afiafi mo falaoa i te tafataeao mo ‵kai koutou ke ma‵kona, ka lavea ei ne koutou me ko oti ne lagona ne Ieova te otou mui‵mui ki a ia. Kae ko oi la māua? A koutou e se mui‵mui ki a māua, kae ki a Ieova.”+

9 Tenā ne fai atu ei a Mose ki a Alona: “Fai atu ki te fakapotopotoga kātoa o tino Isalaelu, ‘Fakapili‵pili mai ki mua o Ieova, me ko oti ne lagona ne ia te otou mui‵mui.’”+ 10 I te otiga eiloa o te faipatiga a Alona ki te fakapotopotoga kātoa o tino Isalaelu, ne ‵fuli atu latou o ‵kilo ki te koga lavaki, kae kiloke! ne sae aka te ‵malu o Ieova i loto i te kaumana.+

11 Ne toe faipati atu a Ieova ki a Mose, ana muna: 12 “Ko oti ne lagona ne au te mui‵mui o tino Isalaelu.+ Fai atu ki a latou, ‘I te afiafi kae koi tuai o pouli* a koutou ka ‵kai ki ‵kano o manu, kae i te tafataeao ka ma‵kona koutou i falaoa,+ kae ka iloa ‵lei ne koutou i a au ko Ieova te otou Atua.’”+

13 I te afiafi tenā, ne eva mai a manu ko salu* kae ne ‵fonu te koga ‵nofo o latou i manu konā,+ kae i te tafataeao ne lavea atu te ‵sau i tua o te koga ‵nofo o latou. 14 I te taimi ne liu afusaga ei te ‵sau, ne ‵toe mai i ei se mea manifinifi i luga i te laukele o te koga lavaki,+ e pelā eiloa me se kiona manifinifi i luga i te laukele. 15 I te laveaga ne tino Isalaelu a te mea tenā, ne fai atu te suā tino ki te suā tino, “Se a te mea tenā?” me e se iloa ne latou a te mea tenā. Ne fai atu a Mose ki a latou: “Ko te meakai ne tuku mai ne Ieova ma koutou.+ 16 Tenei te fakatonuga mai i a Ieova, ‘E ‵tau o ‵tae ne tino taki tokotasi te aofaki e mafai o kai ne ia. E ‵tau o ‵tae ne koutou e takitasi a oma*+ i tino taki tokotasi e ‵tusa mo te aofaki o tino i loto i tena faleie.’” 17 Ne kamata o fai ne tino Isalaelu a te mea tenā; ne ‵tae olotou meakai, a nisi tino ne ‵tae ne latou a mea e uke kae ko nisi tino e mu‵tana olotou mea ne ‵tae. 18 Kafai e fua ne latou ki te oma, a te tino telā e uke ana mea ne ‵tae e seai ne ana mea ne ‵toe, kae ko te tino telā e mu‵tana ana mea ne ‵tae ne lava ‵lei eiloa ana mea.+ Ne ‵tae eiloa ne latou taki tokotasi e ‵tusa mo olotou mea e mafai o kai.

19 Tenā ne fai atu ei a Mose ki a latou: “E seai se tino e ‵tau o tausi ne ia ana mea ke oko ki te tafataeao.”+ 20 Kae ne seki faka‵logo latou ki a Mose. I te taimi ne tausi ei ne nisi tino olotou mea ke oko ki te tafataeao, ne ‵fonu eiloa i ilo kae ‵pou, kae ne kaitaua a Mose ki a latou. 21 Ne ‵tae ne latou olotou mea i tafataeao takitasi e ‵tusa mo olotou mea e mafai o kai. Kafai ko ‵kasa mai te la ko te mea eiloa ko liuvai.

22 I te ono o aso, ne ‵tae ne latou olotou meakai e fakalua taimi te uke,+ e lua a oma i te tino e tokotasi. Ne olo atu a takitaki katoa o te fakapotopotoga o fakailoa atu te mea tenā ki a Mose. 23 Ne fai atu a ia ki a latou: “Tenā eiloa te mea ne fai mai ne Ieova. I te aso ma taeao ko te taimi malō‵lo,* ko te sapati ‵malu ki a Ieova.+ Tao ne koutou a mea kolā e ‵tau o tao, kae saka a mea kolā e ‵tau o saka;+ kae tausi a mea kolā e ‵toe ke oko ki te tafataeao.” 24 Ne tausi ne latou olotou meakai ke oko ki te tafataeao, e ‵tusa eiloa mo te fakatonuga a Mose, kae ne seki ‵pou a meakai konā io me ‵tolo ne ilo. 25 Tenā ne fai atu ei a Mose: “‵Kai ki mea konā i te aso nei me i te aso nei ko te sapati ki a Ieova. Ka seai ne meakai e maua ne koutou i luga i te laukele i te aso nei. 26 I aso e ono e ‵tae ei ne koutou a mea konā, kae i te fitu o aso, ko te Sapati+ tenā, ka seai ne mea e maua ne koutou i ei.” 27 Kae e isi ne tino ne olo o ‵tae olotou meakai i te fitu o aso, kae seai ne olotou mea ne maua.

28 Ne fai atu a Ieova ki a Mose: “E pefea te leva e ita ei koutou ma tausi ki aku fakatonuga mo aku tulafono?+ 29 Ke masaua me ko oti ne tuku atu ne Ieova te Sapati+ ki a koutou. Tenā te pogai ne tuku atu ei ne ia a meakai ki a koutou mō aso e lua i te ono o aso. E ‵tau mo tino katoa o ‵nofo i koga e ‵nofo latou i ei; e seai se tino e ‵tau o tiaki ne ia tena koga nofo i te fitu o aso.” 30 Tela la, ne tausi ne tino a te Sapati* i te fitu o aso.+

31 Ne fakaigoa ne tino Isalaelu a te meakai tenā ki te “manai.”* E ‵kena e pelā mo te fuaga o te koliano,* kae kafai e tami ki ei e pelā eiloa mo falaoa fakapa‵pa e kai mo te hani.+ 32 Tenā ne fai atu ei a Mose: “Tenei te fakatonuga a Ieova, ‘‵Fao se oma e tasi ki loto i se mea kae tausi te mea tenā i otou kautama katoa,+ ko te mea ke lavea ne latou te meakai telā ne tuku atu ne au ke ‵kai koutou ki ei i te koga lavaki, i te taimi ne aumai ei ne au koutou ki tua mo te fenua o Aikupito.’” 33 Ne fai atu a Mose ki a Alona: “Puke se tiā kae ‵fao atu se oma e tasi o te manai ki loto i ei kae tuku atu i mua o Ieova ke tausi i otou kautama katoa.”+ 34 E pelā eiloa mo te fakatonuga a Ieova ki a Mose, ne tuku atu ne Alona a te mea tenā i mua o te Pusa*+ ko te mea ke tausi i ei. 35 Ne ‵kai a tino Isalaelu ki te manai i tausaga e 40,+ ke oko ki te taimi ne oko atu ei latou ki te fenua telā e isi ne tino i ei.+ Ne ‵kai latou ki te manai ke oko ki te taimi ne oko atu ei latou ki te tuakoi o te fenua o Kanana.+ 36 A te oma ko te tasi-vae-sefulu o te efa.*