Te Muamua Samuelu

25 Fakamuli ifo, ne mate a Samuelu+ kae ne maopoopo fakatasi a Isalaelu kātoa o ‵tagi fanoanoa ona ko ia kae tanu foki a ia i tena fale i Lama.+ Oti aka, ne tu aka a Tavita kae fano ki te koga lavaki o Palana.

2 E isi se tagata i Maono+ kae e galue i Kalamelu.*+ A te tagata tenā e maumea ‵ki; e 3,000 ana mamoe mo ana kouti e 1,000 kae i te taimi tenā ne ‵vele ne ia a fulufulu o ana mamoe i Kalamelu. 3 A te igoa o te tagata tenā ko Napalu,+ kae ko te igoa o tena avaga ko Apikaila.+ A tena avaga se fafine e ‵lei ana faka‵tauga e fai kae taulekaleka, kae ko tena avaga tagata, se tino mai te matakāiga o Kalepo,+ se tagata kaitaua kae masei.+ 4 Ne logo a Tavita i te koga lavaki i a Napalu e ‵vele a fulufulu o ana mamoe. 5 Tenā ne uga atu ei ne Tavita ana tamataene e tokosefulu ki tou tagata, ana muna ki tamataene konā: “Olo ki Kalamelu, kae kafai e fetaui koutou mo Napalu fesili atu ki a ia e auala i toku igoa me e a mai a ia. 6 Tenā ko fai atu ei penei, ‘Ke ola leva koe kae ke manuia foki,* ke manuia tou kāiga, kae ke manuia foki au mea katoa. 7 Au nei ne logo me i a koe e ‵vele a fulufulu o au mamoe. I te taimi ne ‵nofo fakatasi ei matou mo au tausi mamoe, ne seki ‵ta ne matou a latou,+ kae seai foki se mea a latou ne galo i te taimi kātoa ne ‵nofo ei latou i Kalamelu. 8 Fesili atu ki au tamataene kae ka fakamaoni atu ne latou ki a koe. Ke talia la ne koe aku tamataene me ne o‵mai matou i se taimi fia‵fia.* Fakamolemole, kafai e isi ne mea e mafai o tuku mai ne koe ki au tavini mo tau tama ko Tavita ko tuku mai aka la.’”+

9 Ne olo atu a tamataene a Tavita kae fai atu ne latou a pati katoa konei ki a Napalu i te igoa o Tavita. I te lotou otiga, 10 ne tali atu a Napalu ki tavini a Tavita: “Ko oi a Tavita, kae ko oi te tama tagata a Iese? I aso nei ko tokouke a tavini ko oti ne ‵tele kea‵tea mai olotou matai.+ 11 E mata, e ‵tau o puke ne au aku falaoa mo aku vai mo ‵kano o aku manu kolā ne katikati ma aku tino ‵vele mamoe kae tuku atu fua ki tāgata kolā e se iloa ne au te koga ne o‵mai i ei?”

12 I konā eiloa ne ‵foki atu a tamataene a Tavita kae fakailoa atu ne latou a pati katoa konei ki a ia. 13 Ne fai atu a Tavita ki ana tāgata: “Faka‵mau katoa otou pelu!”+ Tenā ne faka‵mau katoa ei olotou pelu, kae faka‵mau foki ne Tavita tena pelu, kae e nofo ki se toko 400 tāgata ne olo mo Tavita, kae toko 200 tāgata ne ‵nofo o tausi a kope.

14 I te taimi tenā, e tokotasi te tavini ne fakailoa atu ne ia ki a Apikaila, te avaga a Napalu: “Kiloke! A Tavita ne uga mai ne ia ana avefekau mai te koga lavaki o fakamanuia te ‵tou matai, kae ne fai atu ne ia ne pati sē ‵lei ki a latou.+ 15 A tāgata konā ko latou eiloa ko ‵lei ki a matou. E seki ‵ta ne latou a matou, kae e seai eiloa se motou mea ne galo i te taimi kātoa ne ‵nofo fakatasi ei matou i te vao.+ 16 Ne fai latou e pelā me se ‵pui e puipui ei matou i te po mo te ao, i te taimi kātoa ne ‵nofo tasi ei matou o tausi a mamoe. 17 Nei la, mafaufau me se a tau mea ka fai, me ka oko mai eiloa a fakalavelave ki luga i ‵tou matai mo tena kāiga kātoa,+ kae ko ia se tagata e seai se aoga+ kae e se mafai o faipati se tino ki a ia.”

18 Tenā ne puke fakavave ne Apikaila+ e 200 falaoa, e lua a tiā uaina ‵lasi, e lima mamoe ko oti ne fakatoka faka‵lei, e lima sea* saito tao, e 100 keke vine ma‵lo, kae 200 keke mati ma‵lo kae tuku atu katoa ne ia ki luga i asini.+ 19 Ne fai atu a ia ki ana tavini: “Olo i oku mua; kae ka tautali atu au i a koutou.” Kae seai loa sena pati ne fai ki tena avaga ko Napalu.

20 I te taimi ne tele ifo ei tou fafine i te asini kae e se lavea me ‵pono ne te mauga, ne fetaui a ia mo Tavita mo ana tāgata kolā e olo atu i te auala tenā. 21 I te taimi nei, a Tavita ne fai aka penei: “E seai eiloa se aoga ne puipui ei ne au a mea katoa a te tagata tenei i te koga lavaki. E seai eiloa sena mea ne galo,+ kae taui mai ne ia ki te masei aku mea ‵lei ne fai.+ 22 Ke fai foki penā ne te Atua kae sili atu i ei ki fili o Tavita māfai e talia ne au se tagata* e tokotasi a ia ke sao ke oko ki te tafataeao.”

23 I te laveaga ne Apikaila a Tavita, ne tu fakavave a ia ki lalo mo te asini kae punou ifo i mua o Tavita kae ifo ki lalo i te laukele. 24 Ne fakasiga ifo tou fafine ki ana vae kae fai atu: “Toku aliki, ‵losi mai ki a au te ‵se tenā; talia mai ke faipati atu tau tavini fafine ki a koe, kae fakalogo mai ki pati a tau tavini fafine. 25 Fakamolemole, ke mo a eiloa e saga atu toku aliki ki te tagata sē aoga tenei ko Napalu,+ me i a ia e soko loa ki tena igoa. A tena igoa ko Napalu,* kae ko ia se tino valea fua. Kae ko au, tau tavini fafine, e seki fetaui mo tamataene a toku aliki kolā ne uga mai ne koe. 26 Nei la, e toku aliki, e pelā eiloa mo Ieova e ola kae pelā foki mo koe e ola, ko Ieova eiloa ne taofi ne ia koe+ mai te fakama‵ligiga o toto+ mo te sona taui ma sui atu. Ke fai eiloa ou fili mo latou kolā e taumafai o fakapakia a toku aliki ke pelā mo Napalu. 27 Talia mai a te meaalofa*+ tenei ne aumai ne tau tavini fafine ki toku aliki ke tuku atu ki tamataene kolā e tau‵tali i toku aliki.+ 28 Fakamolemole, fakamagalo mai a te amioga solitulafono a tau tavini fafine, me ka fai eiloa ne Ieova a te kāiga o toku aliki ke tumau,+ me i toku aliki e taua i taua a Ieova,+ kae seki ai eiloa se mea masei ne maua atu i a koe i tou olaga.+ 29 Kafai e tu aka se tino o afuli koe o tamate, a te ola o toku aliki ka puipui faka‵lei eiloa ne Ieova tou Atua i te taga o te ola, kae ko ola o ou fili ka ‵pei kea‵tea ne ia e pelā mo fatu i se siligi. 30 Kae kafai ko oti ne fai ne Ieova a mea ‵lei katoa ne tauto a ia ki toku aliki kae fakasopo aka ne ia koe ke fai mo takitaki o Isalaelu,+ 31 ka seai eiloa se loto fanoanoa io me se loto salamō i a koe ona ko te fakama‵ligiga o toto e aunoa mo se pogai tonu mo te sona taui ma sui atu.+ Kafai ko fai ne Ieova a mea ‵lei ki luga i toku aliki, ke masaua la ne koe tau tavini fafine.”

32 I konā ne fai atu ei a Tavita ki a Apikaila: “Ke vikia a Ieova te Atua o Isalaelu, telā ne uga mai ne ia koe i te aso nei ke fetaui mo au! 33 Kae ke fakamanuia atu ki a koe ona ko ou mafaufauga ‵lei! Ke fakamanuia atu eiloa ki a koe me ne taofi aka ne koe au i te aso nei mai te fakama‵ligiga o toto+ mo te sona taui ma sui atu. 34 E pelā eiloa mo Ieova te Atua o Isalaelu e ola, telā ne taofi aka ne ia au mai te faiga o se mea ki a koe,+ moi ne seki vau fakavave koe o fakafetaui mai ki a au,+ penei e seai se tagata e tokotasi a Napalu koi ola i te tafataeao.”+ 35 Tenā ne talia ei ne Tavita a mea kolā ne aumai ne tou fafine ki a ia kae fai atu ki ei: “Fano mo te filemu ki tou fale. Kiloke, ko oti au ne fakalogologo ki a koe, kae ka talia ne au tau fakamolemole.”

36 Ne foki fakamuli atu a Apikaila ki a Napalu, telā e fai tena ‵kaiga e pelā me se tupu i tena fale, kae ko Napalu* e fiafia kae konā malosi. E seai eiloa sena pati ne fai ki tou tagata ke oko eiloa ki te tafataeao. 37 I te tafataeao, i te taimi ko se konā ei a Napalu, ne fai atu ne tena avaga a mea katoa konei ki a ia. Ne mate tena fatu e pelā me se tagata ko mate, kae ne faka‵mate tena foitino kae takato e pelā me se fatu. 38 I se sefulu aso mai tua ifo, ne ta ne Ieova a Napalu, tenā ne mate i ei.

39 I te logoga a Tavita i a Napalu ko mate, ne fai aka a ia: “Ke vikia a Ieova, telā ne fai ne ia te fakamasinoga o taku tagi+ ki faifaiga a Napalu+ kae ne taofi aka ne ia tena tavini mai te faiga o se mea masei,+ kae ko oti ne toe fakafoki atu ne Ieova ki a Napalu a mea ma‵sei ne fai ne ia!” Tenā ne avatu ei ne Tavita tena fekau ki a Apikaila ke avaga lāua. 40 Ne olo atu a tavini a Tavita ki a Apikaila i Kalamelu kae fai atu ki ei: “A matou ne uga mai ne Tavita ki a koe ke puke atu koe mo fai tena avaga.” 41 Ne tu fakavave aka tou fafine kae punou ifo ki lalo kae fai atu: “Tenei te otou pologa ke tavini atu o ‵fulu a vae+ o tavini a toku aliki.” 42 Tenā ne tu fakavave aka a Apikaila+ kae sopo i tena asini mo ana tavini fāfine e tokolima e sa‵sale mai i ana tua; ne olo fakatasi atu a ia mo avefekau a Tavita kae ne fai ei a ia mo fai tena avaga.

43 A Tavita ne avaga foki mo Ainoama+ mai Ieseleelu,+ kae ne fai a te avā fāfine konā mo fai ana avaga.+

44 Kae ko Saulo ne tuku atu ne ia a tena tama fafine ko Mekala,+ te avaga a Tavita, ki a Palati+ te tama tagata a Laisa mai Kalima.