Sakalia
6 Tenā ne kilo aka au kae lavea ne au a kaliota e fa e o‵mai i te va o mauga e lua, kae ko mauga konā ne mauga kopa. 2 A te kaliota muamua e kula ana solofanua, kae ko te lua o kaliota, e uli ana solofanua.+ 3 A te tolu o kaliota e kena ana solofanua, kae ko te fa o kaliota e ilailā kae pule‵pule ana solofanua.+
4 Ne fesili atu au ki te agelu ne fai‵pati mo au: “Ne a mea konei, e toku aliki?”
5 Ne tali mai a te agelu ki a au: “A mea konei ko agaga e fa+ o te lagi kolā ko olo ki tua i te otiga ne ‵tu i olotou tulaga i mua o te Aliki o te lalolagi kātoa.+ 6 A te kaliota telā e uli ana solofanua e fanatu ki te fenua i te feitu ki mātū;+ a solofanua kena e olo atu ki te feitu ki togala;* kae ko solofanua ilailā e olo atu ki te fenua i te feitu ki saute. 7 Kae ko solofanua pule‵pule e ma‵nako o olo o sa‵sale i loto i te lalolagi.” Tenā ne fai atu ei a ia: “Olo o sa‵sale i loto i te lalolagi.” Kae ne kamata ei latou o sa‵sale i loto i te lalolagi.
8 Ne kalaga mai a ia ki a au, ana muna: “Kiloke, a solofanua kolā ne olo atu ki te fenua ki mātū ne fai ne latou te agaga o Ieova ke malōlō i te fenua ki mātū.”
9 Ne toe oko mai te fekau a Ieova ki a au, ana muna: 10 “Puke mai i a Heletai, Topita mo Ietaia a mea kolā ne aumai ne latou mai i tino ne ave fakapagota; kae i te aso tenā, e ‵tau mo koe o fano ki te fale o Iosia te tama tagata a Sefanaia fakatasi mo latou konei ne o‵mai mai i Papelonia. 11 E ‵tau mo koe o puke a siliva mo aulo kae faite se foualiki kae tuku atu ki te ulu o Iosua+ te tama tagata a Iosataka, te faitaulaga sili. 12 Kae fai atu ki a ia,
“‘Konei a pati a Ieova o kautau ne fai mai: “Tenei te tagata e fakaigoa ki a Somo.+ Ka somo aka a ia mai tena koga tonu, kae ka faite ne ia te faletapu o Ieova.+ 13 Ko ia te tino telā ka faite ne ia te faletapu o Ieova, kae ko ia te tino ka maua ne ia te ‵malu. Ka sagasaga a ia ki lalo i tena nofogaaliki kae pule i ei, kae ka fai foki a ia e pelā me se faitaulaga i luga i tena nofogaaliki,+ kae ka isi se feagaiga filemu i te va o te avā mea konā.* 14 Kae ko te foualiki ka fai pelā me se fakamasauaga ki a Helemi, Topita, Ietaia+ mo Heni te tama tagata a Sefanaia, i te faletapu o Ieova. 15 Kae ko latou kolā e ‵mao ‵ki ka o‵mai kae ga‵lue i te faitega o te faletapu o Ieova.” Kae ka iloa ei ne koutou me i a Ieova o kautau ne uga mai ne ia au ki a koutou. Kae ka tupu eiloa te mea tenā—māfai e se fakata‵mala koutou o faka‵logo ki te leo o Ieova te otou Atua.’”