Sakalia
4 Ne foki mai a te agelu telā ne fai‵pati mo au kae ‵fagu ne ia au, e pelā eiloa me ‵fagu ne ia se tino e moe. 2 Tenā ne fai mai ei a ia ki a au: “Se a te mea e lavea ne koe?”
Aku muna: “Ne kilo atu au, kae kiloke! se tugamoli aulo,+ mo se pōla i luga i ei. E isi ne moli e fitu i luga i ei,+ ao, e fitu, kae ko moli kolā e tuku i luga i ei, e isi ne paipa e fitu i ei. 3 Kae i ana tafa ko lakau olive e lua,+ e tasi i te feitu fakaatamai o te pōla kae tasi i te feitu fakamaui.”
4 Tenā ne fesili atu ei au ki te agelu telā ne fai‵pati mo au: “Se a te uiga o mea konei, e toku aliki?” 5 Ne fesili mai a te agelu telā ne fai‵pati mo au: “E se iloa ne koe te uiga o mea konei?”
Ne tali atu au: “Ikai, e toku aliki.”
6 Tenā ne fai mai ei a ia ki a au: “Konei a pati a Ieova ki a Selupapelu: ‘“E se auala i se kautau, io me se malosi,+ kae e auala i toku agaga,”+ ko muna a Ieova o kautau. 7 Ko oi koe, e te mauga sili? A koe ka fakalaugatasi+ i mua o Selupapelu.+ Kae ka aumai ne ia ki tua a te fatu tafa ki luga kae ko tino e ka‵laga atu: “Ko oko eiloa i te gali! Ko oko eiloa i te gali!”’”
8 Ne toe oko mai te fekau a Ieova ki a au, ana muna: 9 “Ko oti ne fakatakato ne lima o Selupapelu a te fakavae o te fale tenei,+ kae ka fakaoti ne ana lima a te mea tenei.+ Kae ka iloa ei ne koe me ne uga mai au ne Ieova o kautau ki a koutou. 10 Ko oi ne manatu māmā ki te aso ne kamata ei a mea fo‵liki?*+ Me ka fia‵fia latou kae ‵kilo atu ki te uka levolo i te lima o Selupapelu. A mea e fitu konei ko mata o Ieova, kolā e kilokilo atu ki te lalolagi kātoa.”+
11 Tenā ne fesili atu ei au ki a ia: “Se a te uiga o lakau olive e lua konei i te feitu fakaatamai mo te feitu fakamaui o te tugamoli?”+ 12 Ne toe fesili atu au ki a ia i te lua o taimi: “Se a te uiga o kaula e lua o te lakau olive kolā e ‵ligi ki tua i ei a te sinu aulo e auala i paipa aulo e lua?”
13 Tenā ne fesili mai ei a ia ki a au: “E se iloa ne koe te uiga o mea konei?”
Ne tali atu au: “Ikai, e toku aliki.”
14 Ana muna: “A mea konei ko tino fakaekegina e tokolua kolā e ‵tu i tafa o te Aliki o te lalolagi kātoa.”+