Esela

3 I te okoga ki te fitu o masina+ kae ko ‵nofo atu a tino Isalaelu i olotou fakai, ne maopoopo fakatasi latou i Ielusalema mō te pogai e tasi. 2 Ne ‵tu aka a Iesua+ te tama tagata a Iosataka mo ana taina faitaulaga mo Selupapelu+ te tama tagata a Salatielu+ mo ana taina o faite a te fatafaitaulaga a te Atua o Isalaelu, ko te mea ke mafai ne latou o ofo a taulaga ‵sunu i luga i ei, e pelā mo mea ne tusi i te Tulafono a Mose+ te tagata o te Atua tonu.

3 Ne fakatu ne latou a te fatafaitaulaga i tena koga mua, faitalia te lotou ma‵taku i tino o fenua i olotou tafa,+ kae ne kamata o ofo atu ne latou a taulaga ‵sunu ki a Ieova i luga i ei, ko taulaga ‵sunu+ i te tafataeao mo te afiafi. 4 Tenā ne fai ei ne latou te ‵Kaiga Fiafia o Fale Fakamalumalu* e ‵tusa mo mea kolā ne tusi ki lalo,+ kae i aso takitasi+ ne ofo atu ne latou a te aofaki o taulaga ‵sunu kolā e manakogina ke ofo atu. 5 Mai tua ifo, ne ofo atu ne latou a taulaga ‵sunu+ masani mo taulaga mō masina sae+ mo ‵kaiga fia‵fia kae ‵malu katoa+ a Ieova, e pelā foki mo taulaga mai i a latou katoa kolā e loto fia‵fia o ofo atu se taulaga o te lotomalie+ ki a Ieova. 6 Mai te aso muamua o te fitu o masina+ ne kamata ei o ofo atu ne latou a taulaga ki a Ieova, faitalia me ne seki fakatakato a te fakavae o te faletapu o Ieova.

7 Ne avatu ne latou a tupe ki tino ‵kati fatu+ mo tufuga faite mea,+ mo meakai mo meainu mo sinu ki tino Saitonu mo tino Tulo ona ko te aumaiga ne latou a laupapa alasi i te tai mai Lepanona ki Iopa,+ e ‵tusa mo te taliaga ne tuku atu ki a latou ne te tupu o Pelesia ko Kulesa.+

8 I te lua o tausaga mai tua o te lotou o‵maiga ki te fale o te Atua tonu i Ielusalema, i te lua o masina, ne kamata ei o fai a te galuega ne Selupapelu te tama tagata a Salatielu, Iesua te tama tagata a Iosataka mo te ‵toega o olotou taina, faitaulaga mo tino Levi, mo tino katoa kolā ne o‵mai ki Ielusalema mai te ‵nofoga fakapagota;+ ne filifili aka ne latou a tino Levi mai te 20 tausaga o fano ki luga ke fai pelā me ne tino fakatonutonu o te galuega i te fale o Ieova. 9 Ne ‵kau fakatasi a Iesua, ana tama tāgata mo ana taina, mo Katamiela mo ana tama tāgata, tama tāgata a Iuta o fakatonutonu aka a latou kolā e fai a te galuega i te fale o te Atua tonu, fakatasi mo tama tāgata a Henatata,+ olotou tama tāgata mo olotou taina, ko tino Levi.

10 I te taimi ne fakatakato ei ne kamuta a te fakavae o te faletapu o Ieova,+ ne ‵tu aka a faitaulaga mo olotou gatu o te faletapu mo pu,+ kae ko tino Levi, ko tama tāgata a Asafo mo sumepalo o ‵viki ki a Ieova e ‵tusa mo te takitakiga a te tupu o Isalaelu ko Tavita.+ 11 Kae ne kamata o usu+ atu ne latou a vikiga kae fakafetai ki a Ieova “me i a ia e ‵lei; a tena alofa fakamaoni ki Isalaelu e tumau ki te se-gata-mai.”+ Tenā ne paka‵laga atu ei a tino katoa o ‵viki atu ki a Ieova me ko oti ne fakatakato a te fakavae o te fale o Ieova. 12 E tokouke a faitaulaga, tino Levi, mo ulu o kāiga i olotou tamana—ko toeaina kolā ne lavea ne latou te fale mua+—ne ‵tagi i se leo maluga i te taimi ne lavea ei ne latou a te fakavae o te fale tenei ko oti ne fakatakato, kae ko nisi tino e tokouke ne paka‵laga mo te fia‵fia i se leo maluga.+ 13 Tela la, ko se mafai ne tino o faka‵kese a leo o tino e paka‵laga mo te fia‵fia mai tino kolā e ‵tagi, me i tino ko paka‵laga eiloa i luga kae ko mafai foki o lagona olotou leo mai i se koga ‵mao.