Failauga

10 E pelā eiloa mo lago ‵mate e fai i ei a te sausau ke manogi ‵pou kae masei, e penā eiloa te tamā faiga valea e fakaseaoga i ei te poto mo te ‵malu.+

2 A te loto o te tino poto e takitaki ei a ia ki te auala tonu, kae ko te loto o te tino valea e takitaki ei a ia ki te auala ‵se.+ 3 So se auala e sasale i ei te tino valea, e se lava tena faka‵tau,+ kae e fai ne ia ke iloa ne tino katoa i a ia e valea.+

4 Kafai e kaitaua malosi se tino pule ki a koe, ke mo a ma tiaki ne koe tou koga,+ me i te filemu e taofi i ei a agasala ‵lasi.+

5 E isi se mea fakafanoanoa ne lavea ne au i lalo o te la, ko te vaegā mea ‵se e fai sāle ne tino pule:+ 6 A tino va‵lea ne tuku ki luga i tulaga ma‵luga e uke, kae ko tino mau‵mea e tumau i tulaga ma‵lalo.

7 Ne lavea ne au a tavini i luga i solofanua mo pelenise e sa‵sale i olotou vae e pelā me ne tavini.+

8 A te tino e keli ne ia se lua e mafai o tō ki loto i ei;+ kae ko te tino e ofa ne ia se ‵pui fatu e mafai o ū ne se gata.

9 A te tino e keli ne ia a fatu e mafai o pakia i ei, kae ko te tino e fafaī ne ia a lakau e mafai foki o pakia i ei.*

10 Kafai se mea faigaluega fiti ko ‵tuka kae e se fakamata ne se tino a tena mata, e manakogina ke galue malosi a ia. Kae ko te poto e fesoasoani ke maua i ei te manuia.

11 Kafai e ū te gata kae seki ai ne pati fakalata ne fai, e seai se aoga o te mea tenā ki te tino poto i te faiga o pati konā.

12 A pati mai te gutu o se tino poto e fakafiafia,+ kae ko laugutu o te tino valea e fakamasei ei a ia.+ 13 A pati muamua e ‵to mai i tena gutu ne pati va‵lea,+ kae ko ana pati fakaoti ne pati fakavale‵vale. 14 Kae ko te tino valea e faipati faeloa.+

A te tagata e se iloa ne ia a te mea ka tupu; ko oi e mafai o fai atu ki a ia a mea ka oko mai i ana tua?+

15 A galuega ‵mafa a te tino valea e fakafi‵ta atu ki a ia, me e se iloa eiloa ne ia o ‵sala tena auala ki te fakai.

16 Ko oko eiloa i te masei ki te fenua māfai a te tupu se tamaliki tagata+ kae ko pelenise e kamata te lotou ‵kaiga i te tafataeao! 17 Ko oko eiloa i te fakafiafia ki te fenua māfai a te tupu se tama tagata mai te kāiga aliki kae ko pelenise e ‵kai i te taimi tonu ke maua i ei te malosi, kae ke se ko‵nā i ei!+

18 Ona ko te lasi o te paie e tau‵tau ifo ei a ‵saga o te tuafale, kae ona ko lima paie e ‵tulu ei te fale.+

19 A meakai ne fai ke kata‵kata ei a tino, kae ko te uaina e fai i ei ke gali te olaga;+ kae ko tupe e fakataunu i ei a manakoga katoa.+

20 Ke oko eiloa ki ou mafaufauga ‵loto, ke mo a ma fetū* ne koe a te tupu,+ kae ke mo a ma fetū ne koe a tino mau‵mea i loto i tou potu ‵moe; me e mafai ne se manu eva* o fakaoko atu te leo tenā,* io me se manu fai kapakau o toe taku atu ne ia a pati ne fai.