Te Muamua Samuelu

20 Tenā ne tele kea‵tea ei a Tavita mai Naiota i Lama. Kae ne fanatu a ia ki a Ionatana kae fai atu: “Se a taku mea ne fai?+ Se a taku mea ‵se ne fai, kae ne agasala pefea au ki tou tamana tenā ko ‵sala ei ne ia au ke tamate?” 2 Kae ne fai atu a Ionatana ki a ia: “E se taitai o fai se mea penā!+ A koe ka se mate. Kiloke! Ka se fai ne toku tamana se mea, se mea lasi io me se mea foliki, e aunoa mo te fakaasi mai ne ia ki a au. Kaia e ‵funa ei ne toku tamana a te mea tenei mai i a au? Ka se tupu eiloa te mea tenei.” 3 Kae ne toe tauto atu a Tavita ana muna: “E iloa ‵lei ne tou tamana me i a koe e fiafia mai ki a au+ kae ka fai aka a ia, ‘Sa fakailoa atu a te mea tenei ki a Ionatana i te mea ma kaitaua.’ Kae e pelā mo Ieova e ola kae pelā foki mo koe e ola, ko pili fua au o mate!”+

4 Tenā ne fai atu ei a Ionatana ki a Tavita: “So se mea e fai mai ne koe, ka fai eiloa ne au mō koe.” 5 Ne fai atu a Tavita ki a Ionatana: “Taeao ko te masina sae,+ kae e ‵tau mo au o sagasaga i tafa o te tupu o ‵kai mo ia; e ‵tau mo koe o uga au ke fano, kae ka ‵muni au i te fatoaga ke oko ki te afiafi o te tolu o aso. 6 Kafai e lavea ne tou tamana i a au e galo, ko fai atu ei koe, ‘A Tavita ne fakamolemole mai ki a au ke fano fakavave aka a ia ki tena fakai i Peteleema,+ me ka fai ne te lotou kāiga kātoa te taulaga o te tausaga i konā.’+ 7 Kafai e tali mai a ia, ‘E ‵lei,’ ko tena uiga ka maua ne tau tavini a te filemu. Kae kafai e kaitaua a ia, ko iloa ei ne koe me manako eiloa a ia o tamate au. 8 Fakaasi mai te alofa fakamaoni ki tau tavini,+ me ne aumai ne koe tau tavini ki loto i te feagaiga a Ieova ne fai mo koe.+ Kae kafai au e ‵se,+ ke tamate la au ne koe. Kaia e ave ei au ki tou tamana?”

9 Kae ne fai atu a Ionatana: “E se ‵tau o mafaufau koe penā e uiga ki a koe! Kafai ko iloa ne au me e manako a toku tamana o tamate koe, e a, ka se fakaasi atu ne au te mea tenā ki a koe?”+ 10 Tenā ne fai atu ei a Tavita ki a Ionatana: “Ko oi ka fakailoa mai ne ia ki a au māfai e tali kaitaua atu a tou tamana ki a koe?” 11 Muna a Ionatana ki a Tavita: “Vau ke olo tāua ki te fatoaga.” Tenā ne olo atu ei lāua ki te fatoaga. 12 Kae ne fai atu a Ionatana ki a Tavita: “Ke molimau eiloa a Ieova te Atua o Isalaelu me ka fakailoa atu ne au ki toku tamana i te taimi penei ma taeao io me i te tolu o aso. Kafai e fiafia eiloa a ia ki a Tavita, e a, ka se fakailoa atu ne au te mea tenā ke logo koe i ei? 13 Kae kafai e manako eiloa toku tamana o tamate koe, ke fai eiloa ne Ieova te mea tenā ki a Ionatana māfai e se fakailoa atu ne au ki a koe kae uga atu koe ke fano mo te filemu. Ke fakatasi atu a Ieova ki a koe,+ e pelā eiloa mo tena fakatasiga ki toku tamana.+ 14 E a, ka se fakaasi mai eiloa ne koe te alofa fakamaoni o Ieova ki a au i te taimi koi ola ei au e pelā foki mo te taimi e mate ei au?+ 15 Ke mo a eiloa ma ave kea‵tea tou alofa fakamaoni mai toku kāiga,+ māfai foki eiloa e fakaseai ne Ieova a fili katoa o Tavita mai i luga i te lalolagi.” 16 Tenā ne fai ei ne Ionatana se feagaiga mo te kāiga o Tavita, ana muna, “Ka fakasala eiloa ne Ieova a fili o Tavita.” 17 Ne fai ne Ionatana ke toe tauto a Tavita ona ko tena alofa mō ia, me ne alofa a ia ki tou tagata e pelā mo tena alofa ki a ia eiloa.+

18 Tenā ne fai atu ei a Ionatana ki a ia: “Taeao ko te masina sae,+ kae ka galo koe, kae ka seai se tino e sagasaga i tou nofoga. 19 I te tolu o aso, ka galo foki koe i ei, kae e ‵tau mo koe o fano ki te koga ne ‵muni foki koe i ei i te suā aso,* kae nofo i tafa o te fatu tenei. 20 Kae ka sana ne au a matasana e tolu ki tena feitu e tasi e pelā loa me sana au ki se taketi. 21 Kafai e uga ne au taku tavini, ka fai atu au ki ei, ‘Fano o ‵sala mai a matasana.’ Kafai e fai atu au ki te tavini, ‘Kiloke! A matasana konei i te feitu mai konei o koe, puke mai,’ tenā ko foki mai ei koe, me e pelā eiloa mo Ieova e ola, ko tena uiga e filemu a mea katoa mō koe kae e seai se mea fakamataku i ei. 22 Kae kafai e fai atu au ki te tamaliki tagata, ‘Kiloke! A matasana konā ki mua atu i a koe,’ tenā ko fano ei koe, me ko uga ne Ieova koe ke fano. 23 E pelā mo te tautoga ne fai ne tāua,+ ko koe mo au, ke nofo faeloa a Ieova i te va o tāua ki te se-gata-mai.”+

24 Tenā ne ‵muni ei a Tavita i te fatoaga. I te okoga ki te masina sae, ne sagasaga ifo te tupu i tena nofoga o kai.+ 25 A te tupu ne sagasaga eiloa i tena nofoga masani i tafa o te ‵pui. A Ionatana e fakafesagai atu ki ei, kae ko Apinelu+ e sagasaga i tafa o Saulo, kae seai se tino i te nofoga o Tavita. 26 E seai se pati a Saulo ne fai i te aso tenā, me ne fai ifo a ia ki a ia eiloa: ‘E isi se mea ne tupu tenā ko se ‵ma ei a ia.+ Ao, kāti a ia e se ‵ma.’ 27 I te aso mai tua o te masina sae, ko te lua o aso, ne seki ai eiloa se tino i te nofoga o Tavita. Tenā ne fai atu ei a Saulo ki a Ionatana, tena tama tagata: “Kaia e seki vau ei a te tama tagata a Iese+ o kai i te aso anafi mo te aso nei?” 28 Ne tali atu a Ionatana ki a Saulo: “Ne fakamolemole mai a Tavita ki a au ke talia aka a ia ke fano ki Peteleema.+ 29 Ana muna, ‘Fakamolemole talia mai ke fano au, me e isi se taulaga a te motou kāiga e fai i te fakai, kae ko toku taina eiloa tenei ne ‵kami mai ne ia au. Tela la, kafai e fiafia koe ki a au, fakamolemole tuku mai au ke fano ke fetaui au mo oku taina.’ Tenā te pogai ne seki vau ei a ia ki te taipola a te tupu.” 30 Ne kaitaua malosi a Saulo ki a Ionatana kae fai atu: “A koe se tama a se fafine ‵teke, i tau faka‵tau e se iloa ne au i a koe e kau i te feitu o te tama tagata a Iese, kae ko fakamasiasi ne koe a koe eiloa e pelā foki mo tou mātua? 31 I te taimi e ola ei a te tama tagata a Iese i te lalolagi nei, e se mafai eiloa o ‵mautakitaki a koe mo tau pulega fakatupu.+ Tela la, uga se tino ke aumai a ia ki a au, me e ‵tau eiloa a ia o mate.”*+

32 Kae ne fai atu a Ionatana ki a Saulo tena tamana: “Kaia e ‵tau ei o tamate a ia?+ Se a tena mea ne fai?” 33 I konā ne velo atu ei ne Saulo te tao ki a ia ke tamate a ia,+ tenā ne iloa ei ne Ionatana me manako eiloa tena tamana o tamate a Tavita.+ 34 Ne tu fakavave aka a Ionatana mai te taipola ona ko te kaitaua, kae seki kai eiloa a ia ki ne meakai i te lua o aso mai tua o te masina sae, me ko oko eiloa i ana fanoanoa ona ko Tavita+ kae ne fakamasiasi a ia ne tena tamana.

35 I te tafataeao ne fanatu a Ionatana ki te fatoaga telā ne fai ke fetaui lāua i ei mo Tavita, kae ne olo fakatasi lāua mo se tavini koi talavou.+ 36 Ne fai atu a ia ki tena tavini: “Tele aka fakamolemole o ‵sala mai a matasana konei ka sana ne au.” Ne tele te tavini, kae ne sana ne Ionatana a matasana ki mua atu i a ia. 37 I te okoga a te tavini ki te koga ne sana ne Ionatana te matasana ki ei, ne kalaga atu a Ionatana ki te tavini: “E a, e se tō mai mua atu i a koe a te matasana?” 38 Ne kalaga atu a Ionatana ki te tavini: “Fakavave! Tele ke vave! Sa fakatuai!” Ne puke aka ne te tavini a Ionatana a matasana kae toe foki mai ki tena matai. 39 E seai eiloa se mea a te tavini e iloa ne ia; ko Ionatana fua mo Tavita e iloa ne lāua te uiga o mea konā. 40 Ne tuku ne Ionatana ana meatau ki tena tavini kae fai atu ki ei: “Fano, ave a mea konei ki te fakai.”

41 I te fanoga a te tavini, ne tu aka a Tavita mai se koga pili mai i te feitu ki saute. Kae ne totuli ifo a ia ki lalo kae punou fakatolu, ne fakatau uma lāua kae tagi te suā tino ki te suā tino, kae ko Tavita eiloa ne tagi malosi. 42 Ne fai atu a Ionatana ki a Tavita: “Fano mo te filemu, me ko oti tāua tokolua ne tauto+ i te igoa o Ieova, penei, ‘Ke nofo a Ieova i te va o koe mo au mo te va o au tama* mo aku tama* ke oko ki te se-gata-mai.’”+

Tenā ne tu aka ei a Tavita kae fano, kae ko Ionatana ne toe foki ki te fakai.