Isaia
65 “Ne tuku atu ne au a au eiloa ke salasala ne latou kolā ne seki fesili e uiga ki a au;
Ne tuku atu ne au a au eiloa ke maua ne latou kolā ne seki salasala mai ki a au.+
Ne fai atu au, ‘Tenei au, tenei au!’ ki se atufenua telā ne seki ka‵laga mai ki toku igoa.+
2 Ko oti ne ‵fola atu oku lima i te aso kātoa ki se fenua loto ma‵keke,+
Ki a latou kolā e sa‵sale i te auala telā e se ‵lei,+
E tau‵tali eiloa i olotou mafaufauga;+
3 Se fenua telā e fakafanoanoa faeloa ne latou au i oku mua,+
E fai olotou taulaga i fatoaga+ kae ofo atu a taulaga ke fanaka te au mai i luga i puliki.
4 E saga‵saga latou i luga i tanuga,+
Kae e ‵nofo latou i olotou koga ‵muni i te po,
O ‵kai ki ‵kano o puaka,+
5 Muna a latou, ‘Nofo eiloa i a koe; sa fakapilipili mai ki a au,
Me i a au e ‵malu atu i a koe.’
A mea konei e fai pelā me ne au i loto i oku puisu, se afi e ‵ka i te aso kātoa.
6 Kiloke! Ko oti ne tusi i oku mua;
Au ka se tu malie,
Kae ka toe taui atu ne au ki a latou,+
Ka toe taui katoatoa atu ne au ki a latou
7 Ona ko olotou mea ‵se mo mea ‵se a olotou tupuga,”+ ko muna a Ieova.
“Me ko oti ne fai ne latou olotou taulaga ke au i luga i mauga
Kae taku fakamasei ne latou au i luga i tamā mauga,+
Kae muamua la ka fua ne au olotou ‵togi ke kātoa.”
8 Konei a pati a Ieova ne fai mai:
“E pelā eiloa mo te uaina fou telā e maua atu i se kaufui vine
Kae fai aka se tino, ‘Sa fakamaseigina me e isi loa se mea ‵lei* i loto i ei,’
Kae tenā loa te mea ka fai ne au mō te ‵lei o aku tavini;
Ka se ‵ta fakapalele ne au a latou katoa.+
9 Ka aumai ne au mai i a Iakopo se fanau
Kae mai i a Iuta ko te tino ke fai toku mauga mo fai tena tofi;+
A oku tino filifilia ka puke ma latou te mea tenei,
Kae ko aku tavini ka ‵nofo i ei.+
10 Ka fai a Salona+ mo laukele moukuā mō mamoe
Kae ko te Vanu o Akoa+ se koga malōlō o pulumakau,
Mō oku tino kolā ka salasala mai ki a au.
11 Kae ko koutou e aofia i a latou kolā e tiaki ne latou a Ieova,+
Ko latou kolā ka fakapuli toku mauga tapu,+
Ko latou kolā e fakatoka se taipola mō te atua o te Manuia,
Mo latou kolā e faka‵fonu ne latou a ipu uaina ko oti ne palu fakatasi mō te atua o Mea ne Fakaiku Aka me ka ‵Tupu.
12 Tela la, ka tuku atu ne au koe ki te pelu,+
Kae ko koutou katoa ka ifo ki lalo ko te mea ke tamate,+
Me i a au ne kalaga atu, kae ne seki tali mai koutou,
Ne faipati atu au, kae ne seki faka‵logo mai koutou;+
Ne tumau eiloa koutou i te faiga o mea ma‵sei i taku kilokiloga,
Kae ne filifili ne koutou a te mea telā e fakafanoanoa mai ki a au.”+
13 Tela la, konei a pati a te Aliki Sili ko Ieova ne fai mai:
“Kiloke! Aku tavini ka ‵kai, kae ko koutou ka fia‵kai.+
Kiloke! Aku tavini ka inu,+ kae ko koutou ka fiainu.
Kiloke! Aku tavini ka fia‵fia,+ kae ko koutou ka masiasi.+
14 Kiloke! Aku tavini ka ka‵laga mo te fia‵fia ona ko te tulaga ‵lei i olotou loto,
Kae ko koutou ka ‵tagi ona ko te logo‵mae i otou loto
Kae ka ‵tagi fanoa‵noa koutou ona ko te loto mafatia.
15 Ka lauiloa koutou i se igoa telā ka fakaaoga ne oku tino filifilia e pelā me se fakamalaiaga,
Kae ko te Aliki Sili ko Ieova ka tamate ne ia koutou taki tokotasi,
Kae ko ana tavini ka fakaigoa ne ia ki se isi igoa;+
16 Me ko so se tino e ‵sala ki se fakamanuiaga mō ia i te lalolagi nei
Ka fakamanuiagina ne te Atua o te munatonu,*
Kae ko so se tino e fai sena tautoga i te lalolagi nei
Me i fakalavelave mua ka fakapuli atu;
Ka ‵funa aka a mea konā mai i oku mata.+
17 Kiloke! Ko faite ne au se lagi fou mo se lalolagi fou;+
Kae ko mea mua ka se toe manatua i te mafaufau,*
Kae ka se toe ‵sae aka i te loto.+
18 Tela la, ke ‵lifu kae fia‵fia ki te se-gata-mai ki mea e faite ne au.
Kiloke! Ko faite ne au a Ielusalema mo fai se pogai o te fiafia
Mo ana tino e pelā me ko te pogai e ‵lifu ei.+
19 Kae ka fiafia au i a Ielusalema kae lifu i toku fenua;+
Ka se toe lagona atu i loto i ei a te ‵tagi mautuutu io me ko te ‵tagi o te puapuaga.”+
20 “Ka se toe ai se pepe i te koga tenā e ola fua mō ne nai aso,
Io me se toeaina telā e se mafai o ola i ana aso katoa.
Me i te tino e mate kae ko selau ana tausaga ka fai fua pelā me se tamā tamaliki,
Kae ka fakamalaiagina te tino agasala faitalia me ko selau tausaga tena matua.*
21 Ka faite ne latou olotou fale kae ‵nofo i ei,+
Kae ka ‵toki ne latou a togavine kae ‵kai ki olotou fuataga.+
22 Ka se faite ne latou a fale kae ‵nofo i ei a nisi tino,
Io me ‵toki ne latou a fuaga kae ‵kai ki ei a nisi tino.
Me i aso o oku tino ka pelā mo aso o se lakau,+
Kae ko galuega e fai ne olotou lima ka fia‵fia ki ei oku tino filifilia.
23 Ka se sona galue ‵mafa latou kae seai se mea e maua mai i ei,+
Kae ka se fa‵nau foki a tama‵liki mō te puapuaga,
Me i a latou ko tama* kolā ne fai ke fakamanuia ne Ieova,+
Fakatasi mo tino e ‵tupu mai i a latou.+
24 Koi tuai eiloa latou o ka‵laga mai, kae ka tali atu au;
I te taimi koi fai‵pati ei latou, ka lagona ne au.
25 A te kuli vao mo te tamā mamoe ka ‵kai fakatasi,
A te leona ka kai ki mouku e pelā eiloa me se pulumakau,+
Kae ko meakai a te gata ko ‵pefu.
Ka se fakamasei ne latou se mea io me fai ne latou ne mea ma‵sei i luga i toku mauga tapu kātoa,”+ ko muna a Ieova.